Kosmos 94.1

Die regering doen ’n beroep op dringende en betroubare befondsing om wêreldwye verbintenisse oor vroue, vrede en veiligheid in konkrete aksie om te sit. Penda Naanda, Namibië se permanente verteenwoordiger by die Verenigde Nasies, het die VN-Veiligheidsraad toegespreek en gesê voorspelbare, volhoubare en buigsame finansiering is noodsaaklik. Namibië dring daarop aan dat die VN en lidlande hul beloftes met voldoende hulpbronne rugsteun, insluitend groter steun vir nasionale aksieplanne en vennootskappe om dié agenda te bevorder.

'n Belangrike bulletin misgeloop? Geen probleem, luister na elke bullie net hier. Al die hoof nuus op een plek.

Nagenoeg 11 rubberduck-bote neem môreoggend aan die Oanob Lake Grand Prix-reeks by die Oanobdam deel. Elke boot se span bestaan uit 'n stuurman en 'n navigator, wat voor in die boot sit en help om die boot te stuur. Die sport was eens baie gewild, maar het mettertyd veld verloor. Nou probeer 'n groep passievolle sport-entoesiaste die sport weer nuwe lewe gee. Kosmos 94.1 Nuus se Francois Lottering vertel ons meer.

Die ministerie van visserye het 'n nuwe raad vir die staatsbeheerde Namibiese Visverbruik-bevorderingstrust vir 'n termyn van vyf jaar aangestel. Die nuwe voorsitter, Lot Ndamanomhata, sê die planne sluit in die vestiging van drie nuwe gemeenskapsvismarkte in minderbevoorregte binnelandse gebiede om voedsel- en voedingsekerheid te verbeter.

Ongeveer 87 000 tersiêre studente het in 2026 staatsgesubsidieerde klas- en registrasiegelde ontvang. Volgens die adjunkminister van onderwys, Dino Ballotti, word dié befondsing ook onder die hersiene begroting beskerm. Hy het aangekondig dat die ministerie 150 miljoen Namibiese dollar verskuif het om sy ontwikkelings-begroting tot 738 miljoen dollar te verhoog. Dit het onder meer die bou van 25 nuwe skole, die voltooiing van meer as 1 000 klaskamers en 126 rekenaar-laboratoriums moontlik gemaak, asook die aanstelling van 3 634 nuwe personeellede.

Die land staan op die punt om sowat een miljard Namibiese dollar aan klimaatfinansiering te ontvang om groenwaterstofprojekte en nywerheidsinisiatiewe wat koolstofvrystellings verminder, te bevorder. Dit volg nadat die Groen Klimaatfonds 'n befondsingspakket van 140 miljoen Amerikaanse dollar vir Suider-Afrika goedgekeur het. Jona Musheko, woordvoerder van die Namibië Groenwaterstofprogram, sê die befondsing sal help om projekte van die vroeë ontwikkeling-s-fase na die konstruksiefase te neem.

In jou finansiële nuus vanoggend: Dis weer daai tyd van die maand - verbruikers sit pieringoog en wag om te hoor hoe die brandstofprys hul beursie gaan skud. KosmosKapitaal kyk na die opsies. En in Rusland het presidente Netumbo Nandi-Ndaitwah en Vladmir Putin ekonomiese samewerking gesels.

Private gesondheidsorgverskaffers sê die verhoging in mediese fonds-maatstaftariewe doen min om die groeiende gaping tussen die koste van gesondheidsorg en die vergoeding wat mediese fondse bied, aan te spreek. Die Namibiese Vereniging van Mediese Hulpfondse, Namaf, het 'n gemiddelde verhoging van 4,6 persent in maatstaf-tariewe vir 2027 aangekondig. Dr. Jürgen Hoffmann, uitvoerende hoof van die Namibiese Privaat Praktisynsforum, sê aan Kosmos 94.1 Nuus dat die aanpassing nie die stygende koste van die bedryf van mediese praktyke weerspieël nie.

'n Belangrike bulletin misgeloop? Geen probleem, luister na elke bullie net hier. Al die hoof nuus op een plek.

Luister na vandag se boodskap met Ds. Johan Els