Við töluðum við framkvæmdastjóra VIRK í síðustu viku og komum meðal annars inná nýja skilgreiningu WHO, Alþjóðaheilbrigðisstofnunarinnar, á kulnun en samkvæmt henni er kulnun heilkenni sem er afleiðing langvarandi streitu á vinnustað sem ekki hefur tekist á árangursríkan hátt að ná stjórn á. Við fengum til okkar tvo sálfræðinga og verkefnisstjóra hjá VIRK til að segja okkur frá þróunarverkefni tengt kulnun sem hófst árið 2020 og rýndum í fyrstu tölur, en kveikjan að verkefninu var einmitt þessi nýja skilgreinging WHO. Þær Berglind Stefánsdóttir og Guðrún Rakel Eiríksdóttir sálfræðingar og verkefnisstjórar hjá VIRK komu í þáttinn og fóru með okkur yfir þetta verkefni og hvernig það nýtist í greiningu og meðferð.

Undanfarið hefur verið nokkur umfjöllun, sérstaklega í erlendum miðlum, um endurnýjaðan áhuga á fljúgandi furðuhlutum, t.d. hjá bandaríska hernum. Í tilefni þess var grafið ofan í safn Ríkisútvarpsins og fannst þar viðtal sem tekið var 1995 við Pétur H. Ólafsson og Örn Þorláksson um atburð sem gerðist árið 1971. Viðtalið var tekið fyrir þáttinn Fréttaauki á laugardegi af Þorvaldi Friðrikssyni og það var Þór Fjalar Hallgrímsson, starfsnemi hér á RÚV, og nemi í Hagnýtri menningarmiðlun við Háskóla Íslands sem fann það.

Lesandi vikunnar í þetta sinn var Einar Þór Jónsson framkvæmdastjóri HIV á Íslandi. Einar gerði upp fyrstu sextíu ár ævi sinnar í bókinni Berskjaldaður sem kom út 2020, en hún var rituð af Gunnhildi Örnu Gunnarsdóttur. Í bókinni er sögð saga glímunnar við HIV á níunda og tíunda áratugnum, þyrnum stráð saga þeirra sem smituðust af HIV veirunni áður en lyf við henni komu á markað þróuðust í þau sem nú fást. Einar Þór sagði okkur frá bókinni og svo auðvitað frá þeim bókum sem hann hefur verið að lesa undanfarið og hvaða bækur og höfundar hafa haft mest áhrif á hann í gegnum tíðina.

UMSJÓN: GUNNAR HANSSON OG GUÐRÚN GUNNARSDÓTTIR