L'Emprima Guerra mundiala en il spievel da sias chanzuns.Chantond parta la schuldada la stad dal 1914 en la guerra. Ins spetga che tut daventia ina spassegiada da paucas emnas. Perencunter sa sviluppa il conflict ad ina guerra da posiziun pli che sanguinusa. Sper ils foss da protecziun sa avran era ils foss mentals. Cumbattì na vegn betg mo cun schluppet e baionetta, mabain era cun chanzuns. Las chanzunettas romanticas sa maschaidan cun il chant marzial patriotic però era cun chants da protesta e ravgia.Entant che la chanzun «Il Piave mormorava» è per ils generals talians in'arma uschè effectiva sco in'entira divisiun schuldads è la «Chanson de Craonne» per lur collegas franzos pli privlusa che 30'000 inimis. Ils potentats propagheschan e censureschan chanzuns, che sa laschan dentant grev dumestitgar e che na sa tegnan betg adina als cunfins naziunals ed ideologics.