In'emissiun sur dal saut? En quests temps da crisa? Gea. Pli che mai! L'uman sauta dapi millennis. L'emprim era quai tgunsch in act natiral e spontan – pli tard lura cunzunt er in act da ritual. Lura è il saut daventà ina furma da sa divertir en cumpagnia u er in'expressiun artistica.

Ma igl emporta pauc, sch'il saut è hobi, mastergn ubain terapia: igl è demussà che saut è bun per noss spiert e noss corp (cunzunt er per noss sistem d'immunitad). Perquai envida La Marella gist bel ed aposta ad in'emissiun che ans maina davent dad isolaziun sociala e pandemias. Nus sautain tras l'emissiun cun trais protagonistas:

Eleni Casanova – passiunada da flamenco

Cun tschintg onns ha Eleni Casanova vesì in placat da reclama per ina festa en Spagna. E dapi lura ha ella savì, ch'ella veglia in di sautar flamenco! Ussa va Eleni mintg'emna ad in curs da flamenco a Turitg e numna quest saut sia passiun, ma era sia terapia.

Christina Thurner – professuressa per scienzas da saut

En la Marella raquinta Christina Thurner da las entschattas dal saut, da sia impurtanza e funcziun ed ella declera er, pertge ch'ella pensa che nus Svizzers sautain memia pauc.

Dina Sennhauser – sautunza e choreografa

Per Dina Sennhauser (25), creschida si en Surselva e che viva oz a Berlin, è saut passiun e mastergn. L'atun passà ha ella fatg en Germania ses master en choreografia, avant ha ella studegià saut contemporan en Svizra.

Pertge ch'ella è sa decidida per il saut enstagl ils skis, pertge ch'ella inscenescha gugent choreografias senza musica e tge plans ch'ella ha per ses avegnir sco artista independenta – tut quai tradescha ella en la Marella.