Ils set d'october ha provocà la mazzacra da la gruppa da terror Hamas ina nova guerra en il Proxim Orient. Ussa furiescha l'armada israeliana cun tut sia pussanza militara tras la Strivla da Gaza. Millis e millis da persunas civilas vegnan victimas. 

Cun tut quai che succeda è era sa resveglià in malspiert, che tutgava per bleras e blers da nus plitost tar il passà – l'antisemitissem. La Marella s'approximescha a quest fenomen e dumonda tge ch'è antisemitissem, danunder ch'el vegn e daco ch'el è anc adina qua. Scleriment dat il directur dal Museum gidieu a Hohenems, il scienzà e publicist Hanno Loewy. Ensemen cun ses team s'engascha el dapi onns per il dialog e l'intermediaziun da las culturas differentas.