Ils 26 da settember è il di da las linguas europeicas. In di d'acziun per celebrar ed appreziar las linguas e las culturas. Uschia vulain nus deditgar quest'emissiun da Noss chors a las linguas svizras.

L'onn 2001 è vegnì numnà l'onn da las linguas europeicas. Durant quel han ins introducì il di europeic da las linguas. Il Cussegl da l'Europa ha la finamira da promover la stima per tuttas linguas e culturas, da mussar si ils avantatgs da la plurilinguitad e da mantegnair il stgazi cultural da las bun 200 linguas europeicas.

Circa dus terzs da la populaziun svizra discurra almain ina giada per emna dapli ch'ina lingua. Quai cumenza gia en scola nua che mintgin e mintgina emprenda sper sia lingua materna almain anc in'ulteriura lingua naziunala. Quella diversitad vegn era celebrada dals chors en quest'emissiun.