Ils 21 da favrer festivescha l'UNESCO il di internaziunal da la lingua materna. Perquai celebreschan «Noss Chors» en quest'emissiun la lingua e la patria rumantscha.

Tenor l'UNESCO è la lingua fitg impurtanta per promover l'identitad culturala d'in pajais. Perquai ha ella exclamà l'onn 2000 il di internaziunal da la lingua materna. Cun quai di vul l'Organisaziun da las Naziuns Unidas per l'educaziun, la scienza e la cultura far attent sin linguas minoritaras, l'instrucziun da linguas estras e la plurilinguitad. Sa chapescha è la lingua materna era per «Noss Chors» in grond tema. Quella emissiun porscha perquai chanzuns che dechantan la lingua e la patria rumantscha.