Per bleras e blers è la tschintgavla stagiun da l'onn la pli bella! Damai che nus essan entamez quella, procura er l'instrumentala per in zic atmosfera da tschaiver.

Musicantas e musicants da tut il mund èn pronts e sunan per vus ina schelta da melodias divertentas plain temperament, melodias sco fatgas per ina saira da tschaiver.

Il bainvegni fa la Black Dyke Band cun il marsch «Belfords Carnival March». Plinavant datti da tadlar il «Carnival Cocktail», ils hits «Samba de Janeiro» e «Carnaval de Paris» ed anc bleras autras bellas melodias per il temp da barlot. Er musicas da tschaiver dal grischun diverteschan vus, uschia per exempel las Tschapatalpas, las Fifferlottas da Segnas u las Patlaunas.