Cun l'illustratur Jon Bischoff fa la «Marella» in gir tras Vicosoprano, nua che la Biennale Bregaglia ha lieu questa stad.

Per la segunda giada ha lieu ina biennala d'art contemporan en Bregaglia, questa giada a Vicosoprano. Cun Jon Bischoff, ch'è tranter auter commember da la suprastanza da vischnanca e responsabel per la cultura, fa la «Marella» in gir tras l'exposiziun.

Dapi bun 10 onns organisescha l'uniun «Progetti d'arte Val Bregaglia» occurrenzas d'art en la val. L'iniziativa è vegnida dal galarist Luciano Fasciati, e durant onns è el era stà quel che ha curà ils projects. Per las proximas biennalas vul l'uniun dentant surlaschar il curatar mintg'onn ad ina nova persuna, quai per promover la variaziun.

Per l'ediziun da questa stad han las duas curaturas Anna Vetsch e Bigna Guyer incumbensà diversas artistas ed artists da sa fatschentar cun la Bregaglia e crear in'ovra sin mesira. Il resultat èn 12 ovras che n'èn betg simplamain «bellas», mabain che han in messadi, che pon provocar, far pel giaglina ubain era laschar dumondas avertas.