Statt mit emnä Bier stossä mer i derä Foug mitemnä Kaffi ah (es isch aber es schumigs Kaffi).Mir steue üs wiedermau es paar spannendi Frage, bispiuswys, öb es Autersheim wie ä Landschueuwuchä isch - eifach für sehr auti Lüt oder öb ästhetischi Zahle Brüscht hei oder nid. Und natürlech rede mer ou überä Spotify Jahresrückblick, wobi mr ou churz die KIZ-Schlager-Buebä behandlä. Gägä Schluss wird no über öppis gschwätzt, wo d'Steiner ähnlech liebt wie frömdi Lümpä: Schuttä.

Wieso schaffet mä aus das wo mä schaffet? Wahrschinlech wüu mä im BIZ mit Flyer isch penetriert worde, wo drin steit, wie stressfrei dä und dä Job isch. I derä Foug si mir aber ou pragmatisch ungerwägs; wär ä Zug chouft, muess kes GA finanziere - bitte für dä Lifehack! Aschliessend diskutiere mer drüber, öb "du bisch überraschend intellgient" es Kompliment oder ä Beleidigung isch und was hupendi Fuessgänger usmacht.

Villech füuht sech ä Kater ah wie aut si (ds chönnt mä auti Lüt wo ä Nissan Micra fahre eigentlich mau frage). Evtl. chönnt mä da - oder spätistens, wenn sech Schlägli und Morphium dHand gäbe - ou grad ä Kniestuhl isetzä. Irgendwie wärde da Gedanke witergspunne und schwupps wird ä Verglich vo Velo und Rollstuehl zoge. Mir würde unger Umständ Cornflakes mit Bier ässä, aber eigentlich liegts arä Teigtäschä, wieso mer mit dere Foug es bitzeli früecher hörä.

Mir hei es Dilemma mit und ohni Alkohol. Ohni Übergang geits witer zur Benennig vo de einzelne Zähie, Spoiler: Digitus Minimus ghört ab sofort zu üsem Vokabular. Ja item, i derä Foug erfahret dr ou, wie eim dTastatur vomne Sony Ericsson cha häufe, nid zgränne oder weniger Angst zha im Dunklä. Ahja und für öpper vo üs drüne gseht es Jahr us wiene Ring und ä Wuche wienes Lineau.

Die Foug hei mer ohni Chopfhörer müessä ufnäh – evtl. wüu dr Claudio si Traktor-Ohrstecker nid het wöue usenäh – mä weiss es nid. Uf jedä Fau düe mer zum Start unverhäutnismässig viu Slogans vorläsä (teilwis si sie aber würk luschtig, schwöre) und aber ou unagnähm lang über Berlin schwätzä. Drfür chunnt i dere Foug ou ä Büppilade vor :-)

I die 10. Foug vo üsem Qualitätspodcast starte mer mit Rääfeni, Chüttenä und Häpperä. Aschliessend tusche mer üs drüber us, wie und öb mä es Zimmer inkl. 90er Bett sött usräuke, damit mä nid vo Geodrüegg-Chöpf träumt. Äbefaus erkläre mer euch, wieso Füess i Form vo Händ nid nur ungäbig wäre… Und wüus bis dahäre no nid gnueg weird isch, schwätze mer no chly über Stärnzeichä. Voila.

Da scho gnueg über Ueli Murers Pension gschwätzt wird, thematisiere mer eifach numä sini Veneers und Grillz. Apropos Pension und aut: Versicherigsmannä düe eim vor Ouge füehre, dass dChöste ab 25i bärguf göh, während dGsamtsituation aber bärgab geit. Und wüu mr vom Fach si, düe mer uf aus ufä ou no über zSchueusystem redä. Diese und weitere spannende Themen erwarten Sie in dieser Ausgabe des „Mäntigsschum“ - viu Freud!

Dasmau gits ä Deeptalk – ohni d’Steiner :-) Es geit unger angerem um d’Vergänglechkeit vo Momänte, wo me sech wiederum viu zviu Gedanke drüber macht. Und drum, dass dr Stärnehimmu damisalami unändlech isch – hie und da sogar mit emnä mathematische Touch.

Die Foug isch prägt vo rassigä Pornotitlä, sitzend Bier trinkä, Celebrity Crushes und gäbige / ungäbige Umarmige. Ds Wort „geil“ chunnt unagnähm oft vor - eigentlech ä Steilvorlag fürnes Trinkspiu, aber wär lost scho im Kollektiv Podcasts…

Die Foug beinhautet ke Clödä, drfür ä müedä Recap vo de letschte 2-3 Wuchä. Dr Oli isch im Militär gsi (und betitlet Bernd das Brot übrigens aus „bester Mann“) und dSteiner isch gah bierwandere und het meh oder weniger ribigslos züglet.