Larissa Tschenett e Maurus Malgiaritta èn omadus da la Val Müstair, han omadus 15 onns ed han in siemi communabel: daventar profi da tennis.Ils dus giuvenils na dattan betg mo tennis per lur divertiment. Tennis è lur passiun. La Marella mussa tge che quai vul dir sche dus giuvens talents emprovan lur fortuna en il mund dal sport da prestaziun, lunsch davent da chasa.

Il Tavulin litterar sin viadi en il mund d'ideas da dunnas.Al Tavulin litterar s'inscuntran questa giada Bettina Vital, romanista ed amatura da cudeschs, e Claudia Knapp, dunna da cultura e cuntadina d'ulivas. En il center da l'emissiun stattan dus cudeschs da duas auturas che vivan en Engiadina.«Luba und andere Kleinigkeiten» da Selma Mahlknecht, l'autura dal Vnuost che viva a Zernez, e «Granada Grischun» da Romana Ganzoni da Schlarigna. Nus accumpagnain duas dunnas tras lur quitads e confusiuns dal mintgadi.En ils 20 raquints da «Granada Grischun» vai per violenza e pussanza, ma er per amicizia ed amur. I va per il scriver e per il quintar e per la tema da tut quai.L'istorgia da Luba dal segund cudesch cumenza cun dus stritgins sin il test da gravidanza: ella è en speranza. Uss van milli chaussas tras il chau da Luba, enfin ch'ella chatta sia rolla.

Suzanne von Blumenthal ha marcà la psichiatria en il Grischun ils davos 20 onns sco anc paucs. Sco schefmedia da la clinica Beverin a Cazas e manadra dals servetschs psichiatrics dal Grischun PDGR è ella s'engaschada per ina psichiatria pli averta.Suzanne von Blumenthal ha laschà stgarpar giu mirs enturn la clinica e – il pli impurtant – en ils chaus. Ella ha accumpagnà la sanaziun totala da la clinica Beverin, dad in cumplex istoric ad in'instituziun averta e moderna. Ella ha bajegià or ils servetschs psichiatrics en las valladas ed introducì la medischina cumplementara en la psichiatria dal Grischun. Dacurt ha Suzanne von Blumenthal bandunà sias funcziuns per sa deditgar al svilup d'ina nova metoda, la logosintesa. La Marella fa cun ella ina spassegiada tras il Beverin e guarda enavos sin l'istorgia da la psichiatria dal Grischun.Redacziun: Christina Caprez

Tschertgà urgentamain: scrinaris, miradurs, in­stallaturs, mecanists, lainaris, poliers .... mastergnants èn lavurers tschertgads sin il martgà.La Marella ha visità impressaris en l'entir Grischun – il tenor è dapertut il medem: chattar bunas persunas qualifitgadas è fitg grev. Raschuns datti pliras – l'impurtanta è la depopulaziun. Dentant era la stima ed il prestige giogan ina rolla. E sch'ins guarda las cifras da las naschientschas vegn la situaziun anc pli precara en il futur. Giavischadas èn soluziuns ed ina midada en il pensar.

En questa segunda emissiun davart ils Grischuns en Russia vai per ils tumults ch'han marcà l'imperi al cumenzament dal 20avel tschientaner.1917 – l'onn da las revoluziuns en Russia: l'emprim quella da favrer (che maina a la fin da la monarchia) e lura quella d'october (nua ch'ils bolschevics prendan la pussanza).Ma gia avant il 1917 era l'imperi da Zar Nikolaj II vegnì zaccudì da chaumas, revoltas e guerras.Questas revoluziuns èn stadas la fin dals onns grass per las fatschentas dals migrants, saja quai per ils Conradis e lur fabrica da tschigulatta u per ils Rischs e lur fabrica da textilias.

Durant bun 150 onns è la Russia stada in pajais attractiv per emigrants grischuns, cunzunt per pastiziers, martgadants u magisters.Co pomai èn Caviezels arrivads a Riga? Co è in Albin da Tersnaus daventà medi dal zar? E tge impressiun ha la cuntrada russa fatg ad in giuven da Trin?La marella dat in sguard sin l'unda d'emigraziun grischuna en Russia ch'è ida a fin il 1917 cun las revoluziuns.

«200 tütsch myl» è Hans Ardüser ì a pe l'onn 1590, co el scriva en ses diari. Quai èn 1'500 kilometers ch'il pictur, poet, scolast e cronist ha fatg en crusch ed a travers il Grischun, a la tschertga da lavur.La Marella da questa dumengia ans maina sin ils fastizs da Hans Ardüser, viandond cun el dad Alvaschagn a Giuvaulta. Nus contemplain elefants, draguns ed unicorns ch'el ha picturà sin chasas ed en la baselgia da Tumegl. Ed il multitalent tranter temp medieval e temp modern ans vegn a raquintar da ses plaschairs, da sia lavur e da las dolurs da l'amur.Redacziun: Rafael Müller

Il Tavulin litterar cun nova litteratura svizra. Clà Riatsch, professer da litteratura rumantscha a l'universitad da Turitg s'inscuntra cun Martin Camenisch, istoricher e romanist.«Hagard» da l'autur svizzer Lukas Bärfuss e «Herr Brechbühl sucht eine Katze» da Tim Krohn, il scrivent da success che viva dapi in pèr onns a Sta. Maria en Val Müstair - quai èn ils dus cudeschs sin il Tavulin litterar.Ils dus romans ans mainan a Turitg, nua che nus entupain protagonists fitg differents. En ina chasa da pliras famiglias lascha Tim Krohn cumparair 11 persunas che passentan ensemen ils daletgs e las sfidas dal mintgadi.En il pli nov roman da Lukas Bärfuss sa metta in um sin ils fastizs d'ina dunna nunenconuschenta. Tge vul el dad ella? È el in stalker? Sia vita mida cur che l'accu da ses telefonin è tuttenina vid.Redacziun e moderaziun: Esther Krättli

Cura avais vus discurrì la davosa giada da l'aura? Cura dà la davosa giada in'egliada or da fanestra? L'aura pertutga nus tuts. Ensemen cun Arnold Spescha ch'è s'occupà scientificamain ed era litterarmain cun l'aura, giain nus sin in viadi meteorologic. Sin quest viadi inscuntrain nus il numer 162 ed era in'exposiziun da l'aura. Nus discutain cun il climatolog Jan Sedlacek, e l'architect Maurus Frei declera pertge che l'architectura ha gì bler da far cun l'aura.

Nus tuts enconuschain els – ils ustiers. Magari avain nus schizunt il giavisch da sezs ina giada esser in – in ustier. In'atgna ustaria pitschna, simpatica, adina plaina. La realitad vesa dentant ora auter: I dovra dapli che be dad esser in bun ospitant.En questa Marella visitain nus l'ustiera Sandra Albin da Breil. Pertge ha ella fatg la midada da la scolasta tar l'ustiera, e co vesa ses mintgadi ora? Era Sina e Didi Gapp-Caprez da Guarda vivan dapi blers decennis la vita d'ustiers. Els tradeschan lur recept da success ed il motiv da lur passiun.