Bernelle Verster, een van die Mail & Guardian se top 200 Jong Suid-Afrikaners in 2012, se groot liefde is water. Sy doen navorsing vir haar doktorsgraad oor hoe afvalwater herwin, en in 'n waardevolle produk omskep kan word.

Op 22 November 1963 is Amerika tot stilstand gedwing deur die sluipmoord op president John F. Kennedy. Ettienne Ludick kyk terug na hierdie dag wat diep in mense se geheue vasgelê is.

Op 22 November gaan die Argentyne stembus toe. Die nuwe leier sal die leisels oorneem by president Christina Fernández de Kirchner, wat in 2007 geskiedenis gemaak het deur die eerste vrouepresident van Argentinië te word. De Kirchner is dikwels vergelyk met die ikoniese Eva Peron, alhoewel die vergelyking nie deur almal beaam word nie. Eva Peron, het as Juan Peron se regterhand baanbrekerswerk gedoen, en haar nalatenskap en invloed op Argentinië se politiek en kultuur is steeds sigbaar. Este Gross vertel meer van die ikoniese Evita.

Mense regoor die wêreld eet al eeue lank goggas of insekte, enigiets van kewers, springkane en wurms tot termiete en krieke. Die praktyk staan bekend entomofagie. Daar is meer as 2000 soorte insekte wat geëet word, en sowat tweemiljard mense is afhanklik van insekte in hulle dieet. Insekte word gebraai, gedroog, gemaal tot meel, en somtyds net so rou geëet. Insekteboerdery is besig om te groei, en selfs winsgewende te word. Fritz Klaaste vind meer uit oor goggaspyseniering.

Ian-toniem het hierdie week se brief geskryf. Ian Wessels het onlangs 'n dag saam met siggestremdes deurgebring en met nuwe motivering teruggekeer. Hy deel die grootste les wat hy geleer het.

In die TV-reeks, The Addams Family, is daar 'n hand wat orals op sy eie rondskarrel. Sy naam is Thing T. Thing. Die datahandskoen herinner nogal aan hierdie fiktiewe karakter. Die oomblik wanneer jy 'n datahandskoen aantrek, boots hy jou bewegings op 'n rekenaarskerm na. Este Gross praat met Paul Olckers, bestuurshoof van 5 DT, oor hierdie tegnologie.

Franklin John Fredericks is beter bekend as JohnnyBoy in sy tuisdorp, Calvinia. Jy mag hom dalk herken van SA's Got Talent waar hy 'n deelnemer was wat vreemde voorwerpe op sy ken balanseer het. Hy vertel waar alles begin het, en hoe maklik of moeilik dit is om dinge te balanseer.

Die afgelope naweek was 'n donker naweek vir lugvaart in Suid-Afrika. Vier vliegyuie was in ongelukke betrokke. Sondag het 'n ligte vliegtuig in 'n woonhuis in Midrand vasgevlieg; Saterdag het 'n vliegtuig in Port Elizabeth geval en een in Richardsbaai. En Vrydag het 'n mikroligtevliegtuig buite beheer geraak en in Randburg neergestort. Maar Suid-Afrika het tog 'n trotse lugvaartgeskiedenis. En Kimberley in die Noord-Kaap het 'n groot rol hierin gespeel. Die eerste lugvaartskool is daar gestig in 1913, bekend as die Paterson Aviation Syndicate School of Flying. 'n Replika van Die Compton Patterson Biplane word bewaar by die Pioniers van Lugvaart-museum in Kimberley. Daar is slegs twee van hierdie vliegtuie gebou deur Cecil Compton Patterson. Fritz Klaaste het met Eric Palmer, 'n vlieginstrukteur, gesels oor die museum, wat bestaan uit 'n saal, 'n klein landingsarea en 'n gedenkplaat.

Wie sal dit waag om in 'n wankelrige gebou, net ná 'n groot aardbewing, te gaan soek vir slagoffers? Met die hulp van 'n slim robot is dit nie nodig om lewens te waag nie. 'n Beweeglike robot kan plekke verken wat mense nie altyd kan bereik nie. Die robot neem data in 3D op, en help so om die rampgebied te karteer. Die inligting word teruggestuur na die instrukteur, en reddingswerkers kan dadelik sien waar om te begin soek. Este Gross praat met Beatrice van Eden oor die WNNR se robotkartering-projek.

Die jaarlikse SA Modeweek gee ons 'n voorskou van al die modes wat die volgende seisoen te sien sal wees. Die loopplank was vanjaar weer vol interessante en kreatiewe ontwerpe, maar daar is baie wat moet gebeur vóór alles op die loopplank gewys kan word. Martin Headger gesels met ontwerper JJ Schoeman by sy vertoning by die modeweek om te hoor wat alles agter die skerms gebeur.