Tgi che va cun skis sto dar in’egliada sin il privel da lavinas. E per pudair valitar lez sto l’Institut per la perscrutaziun da naiv e lavinas (SLF) far differentas mesiraziuns e quai di per di. Il «Minisguard» ha accumpagnà Chasper Buchli dal SLF sin l’areal da perscrutaziun en las muntognas da Tavau. Ed il cool – i na va betg be per guardar quanta naiv ch’igl ha dà e sche quella è loma u bletscha, mabain anc per in’entira massa autras chaussas.

La circulaziun da l'aua

Sin noss mund datti radund 1,4 trilliardas liters aua, la gronda part en furma d’aua da sal en las mars. Tut quest’aua fa part da la circulaziun d’aua. Grazia a la chalira dal sulegl è ella permanentamain en moviment e sa mida adina puspè da la furma liquida en vapur ed enavos. Ma tge capita precis?