Co far pli bellas fotografias? – Tips e trics da Larissa Cathomen

Mintga di vegnan fatgas millis da fotografias, bellas e main bellas. Nus avain vulì savair da la fotografa Larissa Cathomen co ch’ins po far a moda simpla ina bella fotografia. Ronja ha visità la giuvna fotografa ed emprendì tge ch’ins sto resguardar per fotografar persunas, co ch’ins po duvrar la glisch e tge ch’è la differenza tranter fotografar cun il telefonin e cun ina camera professiunala.

Il svilup da la fotografia

La camera è vegnida inventada ditg avant la fotografia sco tala. Ditg na savev’ins però betg co arcunar il maletg, pia co far ina fotografia. L’onn 1824 è quai finalmain gartegià a l’inventader Joseph Niépce. Dapi lura è la tecnica da fotografar sa sviluppada fitg svelt ed i dat bleras fotografias che han muventà l’entir mund.