La nova regulaziun da l’intelligenza artifiziala

L’intelligenza artifiziala dovras ti dapertut ozendi. Sche ti vul chattar ina fotografia sin tes telefonin u er sche ti vul savair la pli sperta via a la lavur gida l’intelligenza artifiziala a tai. Ma i dat er tschella vart, la vart da la surveglianza e controlla che po vegnir duvrada per il bun u er per il schlet. Il Minisguard ha dà in sguard sin las schanzas ed ils ristgs da l’intelligenza artifiziala e co che questa duai vegnir regulada.

Co emprenda la intelligenza artifiziala? Deep learning & co.

Sco ils scolars e scolaras en scola, sto era l’intelligenza artifiziala emprender per vegnir megliera e per sa sviluppar vinavant. Quest emprender digital sa numna deep learning e machine learning. Duas metodas che funcziunan sumegliant a l'emprender en scola, ch’èn la fin finala dentant tuttina fitg differentas.