En sia carriera da 50 onns è Corin Curschellas ida als limits. Ella ha publitgà 13 agens albums, è preschenta sco musicista sin 99 auters albums, ha collavurà cun numerusas musicistas e musicists da renum mundial, concertà sin tut il mund e mess bravamain en moviment la scena da musica rumantscha.

In'artista da talent nunditg saja Corin Curschellas, ina che haja l'abilitad da transfurmar l'entira vita en sun e tun. Quai noda l'anteriur cumpogn da musica da Corin Curschellas, il trubadur grischun Walter Lietha, en in pled da laud per il giubileum da tribuna da 50 onns da l'artista. Tals pleds da laud, liricas, memorias e fotografias en vegnidas publitgadas dacurt en in cudesch. Quel è da chattar ensemen cun quatter discs en ina box da giubileum cun il num «Collecziuns: Her Songs 1990–2010+2022».

La chantautura, multiinstrumentalista, cumponista, artista ed actura ha lavurà cun in team da diesch persunas vi da quella lavur retrospectiva. L'accent è vegnì mess sin atgnas cumposiziuns da Corin Curschellas dals onns 1990 fin 2010. Igl èn chanzuns en pliras linguas e differents stils. Tschernidas per ils discs èn ellas vegnidas dal musicist da jazz e fundatur dal Vienna Art Orchestra, Mathias Rüegg. Las chanzuns eran idas in pau en emblidanza, tant pli ch'ils portatuns da quel temp èn exausts.

Corin Curschellas, ch'è tranter auter vegnida undrada cun il Premi svizzer da musica da l'Uffizi federal da cultura lonn 2014, è oz surtut enconuschenta per sias novas versiuns tant finas sco frestgas da chanzuns popularas tradiziunalas rumantschas. Quellas ha ella arranschà e preschentà ils ultims dudesch onns en differentas furmaziuns.

Sia lavur actuala metta il focus puspè sin la multifaradad, ina caracteristica da Corin Curschellas. Avant che Corin Curschellas va sin turnea da giubileum, raquintan ella ed intginas da sias cumpognas e da ses cumpogns en la Marella da sia vita da pioniera. D'ina vita per e cun la musica, da collavuraziuns sur cunfins, da viadis enturn il mund, dal dachasa e da la lingua rumantscha, da muments magics ed er main magics.