Moiesstudio

De Lëtzebuerger Vibraphonist a Komponist Pascal Schumacher ass de Weekend mam OPUS KLASSIK 2025 ausgezeechent ginn. Hien huet zesumme mat der Däitsch/Griichescher Pianistin Danae Dörken an der Kategorie “Neue Klassik” gewonnen, fir hire gemeinsamen Album “Glass Two”.

De Pascal Schumacher ass 2012 schonn eng Kéier mam Echo Jazz ausgezeechent ginn - dem Virleeferpräis vum OPUS KLASSIK, deen aktuell gréissten Däitschen Industriepräis an der Klassikbranche ass.

D’100,7-Produktioun “Carambolage” iwwert d’Hannergrënn vum Milliounebedruch bei der Caritas krut zu Berlin beim Prix Europa den zweete Präis fir déi bescht europäesch Audio-Investigatioun. Ënnert 15 Nominatiounen an där Kategorie huet de Jury zwou Produktiounen ervirgehuewen: D’Auszeechnung “Special Commendation” fir de Caritas-Podcast "Carambolage" am Zeenewiessel, an den Haaptpräis fir “Det Vita Snusets Baksida” vum schweedeschen ëffentlech-rechtleche Radio iwwert d’Hannergrënn vun der Industrie vun de sougenannte wäissen Nikotin-Pouches. Am Ganze ware ronn 160 europäesch Produktioune fir de Prix Europa 2025 nominéiert ginn. D'Pia Oppel an de Jean-Claude Franck kucken op d'Ofschlosszeremonie zréck.

D’Stad Esch gëtt déi éischt Gemeng am Land, déi vum 1. Januar 2026 un eng Tax op eidele Geschäftslokaler wäert ophiewen. Den zoustännege Schäffen Pim Knaff (DP) erkläert.

Den DP-Deputéierte Gérard Schockmel gëtt an de soziale Medie massiv kritiséiert, wéinst engem Meenungsbäitrag am Wort vun ee Samschdeg. Kritik kënnt och aus der eegener Partei. D‘DP-Parteipresidentin Carole Hartmann sot am 100,7 Interview, de Gérard Schockmel hätt dat net am Numm vun der Partei geschriwwen.

Wat soten d'Leidelenger Bierger zu enger genereller Vitesslimitatioun op 30km/h an hirer Gemeng? De Buergermeeschter Lou Linster reagéiert op d'Resultat vun der Ofstëmmung.

De Roland Schaack, Ex-Spiller an -Trainer an der BGL Ligue, kommentéiert den Optrëtt vun de Roude Léiwen zu Sinsheim a kuckt no vir op de Match vun den Owend.

No hirer Expeditioun mat der Gobal Sumud Flotilla a Richtung Gaza a 4 Deeg an israeelescher Gefaangenschaft ass d'Nora Fellens Huberty nees doheem.

Am Spidol Robert Schuman ass haut en Dag dediéiert fir ob déi Mental Gesondheet opmierksam ze maachen. Paule Rodesch mellt sech live vun der Plaz.

Zu Berlin ass haut den Owend d’Ofschloss-Zeremonie vum Prix Europa. Ausgezeechent ginn do déi bescht europäesch Tëlles- a Radiosproduktioune vun dësem Joer. A fir déi alleréischte Kéier ass och Lëtzebuerg bei dësem Mediepräis vertrueden. Eis Podcast-Serie iwwer d’Caritas-Affär ass an der Kategorie “Audio Investigatioun” nominéiert.

De Literaturkenner a –kritiker Jérôme Jaminet iwwer de Laszlo Krasznahorkai, Laureat vum Nobelpräis fir Literatur vun 2025.