Moiesstudio

Wien u Militärgeschicht interesséiert ass, ka sech neierdéngs eng frësch restauréiert däitsch Panzerabwehrkanone vum Typ PAK 43 op Ëlwen ukucke goen. De Maurice Molitor huet sech mam Hobby-Historiker Daniel Reiland a mam Ëlwener Schäffe Guy Henckes iwwer déi beweegte Geschicht vun deem Geschütz ënnerhalen.

D'Air Rescue huet gëschter zwee potentiell Hantavirus-Patiente zeréck an hir Heemecht bruecht. Wéi verleeft esou eng Operatioun? Froen un de President René Closter.

1 vu 7 Schüler:innen geet net an eng ëffentlech Schoul. Privatschoulen droen zwar zu enger méi diverser Offer bäi - hunn awer keng divers mee éischter eng privilegéiert Schülerschaft, esou ee Rapport vum nationalen Observatoire fir Kandheet, Jugend a Schoulqualitéit.

Wärend UEL a CGFP eng "schlank" Dagesuerdnung privilegiéieren, wëllen OGBL an LCGB Kafkraaft, Aarbechtsplazsécherheet, Logement a Gesondheetssystem thematiséieren. Bis de Weekend soll den defintiven Ordre du jour stoen.

D’Zuele vun de Leit, déi ouni Autorisatioun an d’EU areesen, gi kontinuéierlech erof. Net well manner Leit op der Flucht wieren, mee well d’EU an hir Memberlänner de Wee fir eran ëmmer méi schwéier maachen. Repressioun eleng, ouni alternativ Immigratiounsméiglechkeeten, bleift kuerzsiichteg Politik a stellt keng nohalteg Léisung duer, mengt de Frank Wies, Affekot a Mënscherechtsaktivist, a sengem Fräie Mikro.

Zu Lëtzebuerg landen nach ëmmer ze vill Pestiziden an Dünger an de Gewässer. Fir iwwer Ursaachen, Léisungen a Contrainten ze schwätzen, mellt d'Pia Oppel sech live vum Rommeschterhaff zu Steesel. Fir ee Gespréich mam Landwirt Charel Cannivé, der Waasserschutzberoderin Lena Rodenbusch, an dem President vun der Landwirtschaftskammer Christian Hahn

Een neit Format gëtt Lëtzebuerger Museker:inne gewidmet, en anert neit Format fënnt a kengem vun de Concertssäll vun der Philharmonie statt. Dem Beethoven säin 200. Doudesdag dominéiert programmatesch zimmlech staark an der Saison 26/27 vun der Philharmonie. Deen neie Chefdirigent vun de Lëtzebuerger Philharmoniker, de Martin Rajna, wäert een Drëttel vun all senge Concertsprogrammer an der Philharmonie dem Beethoven widmen. Säin Amtsuntrëtt mécht hien allerdéngs mat Kurtàg, Bartók a Mahler. Hien huet och verroden, firwat hie grad dës Komponiste fir säin éischte Concert als Chefdirigent den 2. Oktober erausgesicht huet.

De Mëtteg ass d'Fréijoers-Quadripartite an där d'Prestatairen, d'Sozialpartner an d'Vertrieder vum Staat iwwer néideg Spuermesurë vun der CNS decidéieren. Den Defizit vun der CNS gëtt ëmmer méi grouss, dat ass kee Geheimnis. Wat kann ee sech erwaarden?

Verschidde grouss Länner vun der Europäescher Unioun sinn der Meenung, datt d’EU sollt zesummen op d’Energiekris reagéieren. Si fuerderen zum Beispill eng zousätzlech Steier op exzeptionell Gewënner fir Energie-Entreprisen oder méi labber Budgetsreegelen, fir Investitioune méi einfach ze maachen.

Bréissel awer wénkt of. D’EU-Kommissioun wëllt den Ament keng gemeinsam europäesch Mesurë proposéieren.

Dat waren déi kloer Wierder vum zoustännegen EU-Kommissär Valdis Dombrovskis.

D’Danièle Weber iwwer d’Diskussiounen, déi ënner den EU-Finanzministere geféiert gouf.

Déi neisten demographesch Zuele soen, datt op den 1. Januar 2026 méi wéi 690.000 Leit zu Lëtzebuerger gelieft hunn. Dat waren der knapp 10.000 méi wéi d'Joer virdrun. Dee Wuesstem wier zu 87 Prozent op d'Migratioun zeréckzeféieren, erkläert de Charlie Klein vum STATEC.