Moiesstudio

An der Schoul zu Rued-Sir gouf bannent de leschten zwee Deeg intensiv geraumt a gebotzt, fir datt de Schoulbetrib e Méindeg nees normal ufänke kann. Um Ouschterweekend waren Onbekannter an d’Gebai agebrach an hunn do randaléiert an haaptsächlech technescht Material futtigemaach.

E Sonndeg ass et nees esouwäit: Am Cyclissem steet Paris-Roubaix um Programm. Eng Course, déi fir vill Vëlosfans nieft dem Tour de France zu de groussen Highlighte vun der Saison zielt. De Grond, firwat dës Eendagescourse esou bekannt a beléift ass, sinn déi sëllege Pavé-Secteuren, déi de Coureuren an dem Material alles ofverlaangen. Méi Detailer huet de Jo Diseviscourt fir eis.

Den Ëmweltministère huet finanziell Hëllefe fir d'Ewechmaache vun Näschter op privaten Terraine festgeluecht. Wéi kann een dovu profitéieren? D'Sonja Thill gëtt Prezisiounen.

Dee renomméierten Alpefuerscher Werner Bätzing gesäit d'Grënn beim Klimawandel, awer och bei engem falsche Sécherheetsgefill bei de Schi- a Snowboardfuerer.

Mat der Hausse vun den Energiekäschte geet och de Joresinflatiounstaux erop. De STATEC schafft hei bei senge Previsioune mat verschiddenen Zenarien. Mëttlerweil géif et net méi nëmmen drëm goen, d’Inflatioun virauszesoen. Aufgab vum STATEC wier et och, d’Warscheinlechkeet vun ënnerschiddleche geopoliteschen Zenarie virauszesoen.

250 Demandë wieren an den éischten dräi Stonne bei der Steierverwaltung agaangen, esou den Direkter Jean-Paul Olinger am 100,7-Interview. Zënter 2022 kann ee seng Steiererklärung och mat Hëllef vum sougenannten elektroneschen Assistent maachen. Dësen Tool géif all Joer weider ausbaut ginn. Bis Steierjoer 2028 hofft d’Verwaltung op 85 Prozent digital Steiererklärungen ze kommen. E wäite Wee, well den Ament reechen nach ronn 70 Prozent hir Deklaratioun iwwer Pabeier eran.

Mam Start vun der Ouschtervakanz leschte Weekend hunn och vill Lëtzebuerger nees de Fliger geholl fir a Richtung Sonn ze fléien. Nieft de méi klassesche Reesdestinatioun a Südeuropa sinn déi lescht Joren och Destinatioune wéi d’Tierkei oder déi arabesch Hallefinsel ëmmer méi beléift ginn. Wéinst dem Krich am Mëttleren Oste wäerten awer dëst Joer vill Leit zécke fir op dës Plazen ze fléien. Mee a wéi wäit kann eng Reesversécherung opkommen, wann ee seng Rees ofseet?

Zu Esch ass Ufank Februar d’Maison Sourrire opgaangen. Et soll eng Plaz sinn, op där vulnerabel Leit sech kënnen nei Kompetenzen a verschidde Beräicher uneegnen, mam Zil, duerno eng Aarbechtsplaz ze fannen. Et ass déi zweet Struktur an dësem Genre hei am Land, déi éischt fënnt een zu Diddeleng, an hanner dem Projet stécht d’Marie Laurini. D’Paule Rodesch war sech virun e puer Deeg de Betrib an der Maison Sourrire zu Esch ukucken an huet sech mat der Psychologin iwwer de Projet ënnerhalen, déi den Numm "Sourrire" mat zwee "r" iwweregens ganz bewosst gewielt huet.

Wéinst verstäerkte Kontrollen a Frankräich wielen ëmmer méi Migranten d'Belsch als Ausgangspunkt fir hir Flucht a Groussbritannien.

Dem Donald Trump säin Ultimatum ass an der Nuecht ausgelaf. Wéi geet et elo weider? Mir froen d'Expertin fir den Noen Osten vun der Heinrich-Böll-Stiftung, d’Bente Scheller.