Moiesstudio

Um Dag vum Optakt vun den olympesche Wanterspiller an Norditalie froe mir de Raymond Conzemius, sportlechen Direkter vum COSL wat hien sech vun de Lëtzebuerger erwaart.

Nom Fall zu Péiteng froe mir de Marco Deepen, Responsabel fir déi non-formal Bildung am Ministère, wéi Mëssstänn a Crèchë festgestallt ginn a wéi et fir déi Betraffe weidergeet.

De Präis vum Gold hat d’lescht Woch ee Rekord vu bal 5.600 US-Dollar pro Onz (ronn 31 Gramm) erreecht. An den Deeg duerno goufen et gréisser Verloschter bei dësem Edelmetall.

Wat muss een an dësen Zäiten als Privatpersoun wësse wann een a Gold wëllt investéieren, a wat iwwer d’Entwécklunge beim Goldpräis? Doriwwer huet de Serge Kesseler mam Investment- a Portfolio-Manager Bryan Ferrari aus dem Beräich Private Banking bei der Spuerkeess geschwat.

Haut den Owend um 8 Auer ass d’Ouvertureszeremonie vun den Olympesche Wanterspiller 2026 an Norditalien. Fir d’éischt Kéier iwwerhaapt ass déi Zeremonie op véier Plaze gläichzäiteg. Den Haaptdeel wäert sech zu Mailand am Stadion San Siro ofspillen. Parallel sinn dräi Zeremonien an de Bierger geplangt dorënner an der pittoresker Dolomitte-Stad Cortina d’Ampezzo. Firwat dat sou ass a wat d’Athleete grad wéi d’Spectateuren den Owend erwaart huet de Pit Beffort zesumme gedroen.

De Ben Fayot iwwer e Buch mat Biographien vu 64 jüddesche Familljen, déi an den 1930er Joren hei am Land GE-, an duerno an verschidde Schicksaler erlieft hunn.

Et gëtt ëmmer méi schwéier fir erauszefannen op e Contenu um Internet echt ass, oder duerch KI generéiert gouf. D’Gesiicht op der Superheldefigur fënnt ee vläicht nach witzeg. Mee a groussem Stil agesat, kënnen Deepfakes déi ëffentlech Meenung manipuléieren, Politik a Wirtschaft beaflossen, oder fir Bedruch genotzt ginn. An ëmmer méi dacks gëtt et Fäll an deenen d’Kënschtlech Intelligenz genotzt gëtt, fir Mëssbrauchsduerstellunge mat Kanner hierzestellen. Wéi d’Luxembourg Times de leschte Freideg gemellt huet, géif de Parquet hei an der Stad aktuell an zwee esou Fäll enquêtéieren. Mat dëse sougenannten “Deep-Nudes” hätten déi sexualiséiert Inhalter vu Persounen eng nei Envergure kritt, erkläert de Jeff Kauffmann, Chargé de Projet vun der Plattform Bee Secure.

40 Residente vun Esch sollen zesumme Proposen ausschaffen, fir d'Zesummeliewen an der zweetgréisster Stad ze stäerken. Explikatioune vum Escher CSV-Buergermeeschter Christian Weis.

Kënnt et lo zu Unisex-Toiletten an de Schoulen oder net? Gefillt ginn et méi Meenunge wéi Fakten zu dësem Thema. No enger zimmlech onverständlecher Chamberkommissioun huet de Sujet Unisex Toilettë fir sou vill Opreegung gesuergt, datt den Educatiounsministère seng Erklärunge revidéiert huet. Sou oder sou sinn duerch d’Diskussioun ronderëm genderneutral Toiletten aner wichteg Themen an den Hannergrond geréckelt, mengt d’Sophie Schroeder a sengem Commentaire.

Gëschter Owend gouf zu Esch eng Aktioun vum Hären-Match vun Enn September tëscht Esch an Diddeleng widderholl: Um Resultat huet dat näischt geännert...

D'Patientevertriedung seet, an der Affär Wilmes hätten sech bis Ufank der Woch eng 25 Patient:inne gemellt, déi Problemer no Operatioune beim Dokter Philippe Wilmes gehat hätten. Wat kritiséieren si genee? Dat froe mer de Georges Clees vun der Patientevertriedung.