Batheeletsi bosegong bja lehono re tlo ba re boledisana le lesogana leo le re kgopetsego gore re le kopantshe le batho bao le ba kwesitsego bohloko ka go ba utswetsa dichelete le dithoto tsa bona. Batho ba, ba bangwe ba bona ba amana le lesogana le ka madi mola ka go le lengwe ba bangwe e le batho fela. Bjalo re tlo boledisana le lesogana le le ba bangwe ba batho bao, le ge e le gore ba bangwe bona ga se ba dumela go tla moyeng ka la gore ba sa ikgopola.

Re tlo boledisana bosegong bja lehono le moswa yowe a kgopelago go nyakiswa mosadi ka ge a nyaka go nyala.

Bosegong bja lehono re tlo boledisana le ditsebi ka Thobalano le Bolwetsi bja Sukiri. Magareng ga tse dingwe re tlo nyaka go tseba gore naa banna le basadi ba ka amana bjang thobalanong ka katlego ba dutse ba phela ka bolwetsi bja sukiri bjowe bo tsebegago bo sitisa balwetsi ba bjona go tsenela thobalano.

Go Diagametse re tlo boledisana le mogolo le moratho ka diphapano tsa bona ka gae tsa moratho yowe a latofatswago ka gore ga a hlokomele bana ba gagwe ebile o somisa maseleng a bona a mmuso a mphiwafela go nwa bjala ka ona. Tabeng ye go ngongorega gape le mma-motswadi yowe a llago ka la gore morwedi wa gagwe yo monnyane o no kgona go sepela a ya masoganeng a gagwe a tlogetse bana ba se na mohlokomedi, mme ge a botswa o tsosa dikgaruru ka gae

Batheeletsi bosegong bja lehono re tlo boledisana le moswa yowe a llago ka tshwaro ya makgwakgwa go tswa go tatagwe yowe e se go wa madi. Magareng ga tse dingwe moswa yo o ile a ba a nagana le go ka ipolaya ka lebaka la tlaiso ya monna yo go yena le morwarragwe.

Bosegong bja lehono go Diagametse re tlo boledisana le mma yowe a ilego a imiswa ka go katwa, bjale ka morago ga ge a ile a ikgodisetsa ngwana wa gagwe, mokati wa gagwe a tla a mo tseela ngwana yowe mola a se tse a godile. Mma yo yena ge a be a ikgodisetsa ngwana yowe o ile a tsea sephetho sa gore a ka se mo tsebise ka mokgwa owe a tlilego ka gona lefaseng.

Batheeletsi bosegong bja lehono go Tsa ka Pukung re tlo feleletsa go boledisana le mongwadi wa puku ya kanegelophelo ya go bitswa A Fractured Journey, The Road to Redemption. Yo ke mosadi yowe bophelo bja gagwe bo ilego bja fetoga ka pong ya leihlo ka morago ga lehu la mogatsagwe mme ka madimabe mohlako wa mo gapeletsa go ya go thoma go gweba ka diokobatsi. Mosadi yo o rile go swarwa nageng ya ka ntle a amogela Modimo le go hloma kereke ka kgolegong. Re feleletsa ditaba tsa gagwe lehono

Bosegong bja lehono re tlo bolela ka go bogela diswantsho le difilimi tsa thobalano(Pornography) le dipoelo tsa seo tse di botse le tse mpe. Ge re fetola mawa re tlo bolela ka dilo tseo thobalano e di direlago lephelo (health) la rena.

Batheeletsi le bosegong bja lehono re sa no tswelapele ka go tlisa mogasi wa mafelelo yowe lenanego le la Moremogolo le thomilego ka ena. Yena ke tate Peter Sebothoma ebilego a ilego ya ba gape molaodi wa setisi se sa Thobela FM nakong yeo se be go se sa bitswa Radio Lebowa. O be a tumile ka leina la gore ke Papa-Sepanere.

Ge re tlo fetola mawa re tlo bala lengwalo la mokgekolo yowe a re go o godisitse bana ba gagwe a le tee monna a kitima le mathari a gauteng, Mme ga bjale bana ba gagwe le ba bogadi ba mo gapeletsa gore a amogele monna yowe ga bjale a boilego gauteng a lwala.