Gnanc in nivel al firmament, las muntognas ennavadas glischan sco argient en il sulegl, tut para paschaivel en il Grischun. Ma tgi che sa leger sa: Sut il tschiel blau èsi privlus. Suenter mintga laresch mellen po sa zuppar in morder, en mintga sfendaglia da glatscher fraida ina bara.

Quasi sco che Massimo Capaul, Giulia de Medici, Matti Coray e consortas stattan in a l'autra sin ils pes, tants policists e tantas schef-investigaturas lavuran instancablamain en il mund dal crimi regiunal grischun.

Lur lavur vegn prendida sut la marella da scienziads sco Thomas Barfuss da l'Institut grischun per la perscrutaziun da la cultura u da la romanista Annetta Ganzoni – ma er da las bibliotecaras Claudia Denoth e Marina Willi e l'editur Daniel Kampa.

E la «Marella» da RTR, quella è sa messa ensemen cun ellas ed els ad investigar in fenomen – quel dal boom dal crimi regiunal ed il Grischun.