Lau proiektu desberdin ekarri ditu aste honetarako, bere ustean «momentu onean dauden talde interesgarriak» dira, underground zirkuituan dabiltzanak eta akaso Euskal Herrian hain ezagunak ez dira. «Disko interesgarriak argitaratzen ari dira eta ezagutzera ematea ongi dago beti», dio lemoaztarrak.

Lilo taldea Maria Mateoren musikari forma emateko proiektua dela esan genezake. Nekane Iberorekin gitarra klaseak hartzen hasi eta pixkanaka garatzen joan zen proiektua. Pello Iturria bateria-jotzailea izan zen batzen hurrena eta harekin eta Mateorekin izan gara hizketan; ‘Nora goazen jakin gabe’.

Uger taldea entzuten genuenean, alboko gelako armairutik abesten zigun mutilaz hitz egiten genuen. Bada, armairutik atera da Jon Gago eta beste soinu batekin datoz orain. Iaz ‘Lau-bat’ deituriko EPa kaleratu zuten, aurten gauza gehiago ere bai. MusikHaria saioan izan da taldeko abeslaria.

Karma taldea Behe Nafarroko taldea dela esan dezakegu, Donapaleukoa, baina ez dakigu non kokatu. Benjamin Delabaca, Miguel Etcheverry eta Antton Araspinek osatzen dute, bakoitza punta batekoa da, baina Lapurdin dute elkargunea. Kurioso bezain interesgarria, ‘Odolean dena’ debuteko diskoa bezalaxe.

Dena segundu erdi batez geratzeko eskatzen du kanturik berriena hasi orduko Bulego taldeak. Tomas Lizarazu taldeko abeslariarekin izan gara hizketan eta abenduaren 4rako disko berria ekarriko dutela aurreratu digu musikari azkoitiarrak. 

Derry Girls telesaileko musika ekarri digu aste honetan Izkander Fernandezek, udan Irlandara egin duen bidaia medio. «Barre asko egingo duzuen telesaila da, komedia oso ona da eta ulertzeko ez da oso zaila. Kutsu politikoa du, Ipar Irlandako gatazkan kokatzen delako guztia», aipatu du Fernandezek.

Aurreko ostiralean diskoak pilatuta zituela harrapatu zuen MusikHariako deiak Izkander Fernandez. Asteburuan hamar disko entzun zituen, nahiz eta aste honetan ekarri diguna, udako uztakoa den: «Errepidean entzun duguna, bidaiatzen izan garen denboran kotxean entzundako diskoak ekarri dut gaurkoan».

Giro mistiko samarra sortzen du Kattalin eta Nenufarrak taldearen izenak. Batetik, nenufarrak oso landare bereziak direlako, baina baita taldean Kattalinik ez dagoelako ere. Jon, Iñaki eta Sara dira taldekideak, eta azken hau, Sara Iriarte berastegiarra izan da MusikHaria saioan diskoa aurkezten.

2020an agertu zen eszenera Bulego talde azkoitiarra. Pop komertziala egiten dutela diote eta horren inguruko estetika eta produktuak sortzen dabiltza etenik gabe. Argi ikusi dugu ‘Gure bizitzako lehen bira’ disko-liburuan eta dokumentalean, eta hala kontatu digu Tomas Lizarazuk ere.