‘Epea’ eta ‘Epea II’ diskoak atera berri ditu Iruñeko talde honek. Rockaren bueltan dabilen proiektua, baina punk ukitua duena, nahiz eta zaku horretan ez genukeen sartu nahi. Markel Flores, Josu Arizaleta eta Julen Izkue dira taldea osatzen dutenak eta MusikHaria saioan izan dira.

Tarte berezia izan da azaroko lehendabizikoa Izkander Fernandezena, 100. aldiz etorri delako MusikHaria saiora. Kasualitate baten ondorioz hasitako elkarlanak, dagoeneko 100.a bete du. Denbora honetan ekarri dituen erreferentzien errepasoa egin dugu lau abestitan.

Pilak kargatuta itzuli zen Huelva aldetik Izkander Fernandez. «Eguraldi ona, hondartzak hutsik… une egokia bertara joateko», esan digu lemoaztarrak. Bertan oraindik ere uda sasoiko diskoak entzuten ibili da eta uzta hartatik jasotakoa ekarri digu gurera.

Zarata Mondo Sonoro aldizkaria, Basques On Desks aldizkaria, alabaren urtebetetzea… dena pilatu zitzaion Iker Bárbarari urria bukatzerako. Hala ere ez zuen hutsik egin MusikHaria saioko bere tartera.

Leire Zabala, Maria del Amor, Lauri de la Torre eta Oihana Herrera dira Melenas taldea osatzen dutenak. Urte batzuk badaramatzate dagoeneko elkarrekin Iruñeko lau emakume hauek bai lokalean eta baita oholtzan ere, baina orain da beren momentua. Hori iradokitzen digu diskoaren izenburuak, ‘Ahora’.

Lekuz kanpo harrapatu gintuen ‘Caravan’ edota ‘Maitia’ singleekin Sara Zozayak (Donostia, 1995) ‘Nara’ diskoa kaleratu behar zuela iragarri zigunean. Pop ohikoagora bideratutako kantuak eskaini zituen orduan, baina diskoak mami asko du.