Savevas Vus gia, che la Svizra avess bunamain gì in'atgna bumba atomara? Suenter la segunda guerra mundiala, l'onn 1946, ha la Confederaziun instradà in program dad armas atomaras, tgamunà dal renumà fisicher Paul Scherrer. E betg be il scientist per construir la bumba era pront, er il material principal aveva la Confederaziun gia organisà: 10 tonnas uran, magasinà en bunkers a Wimmis en il chantun Berna. Dentant: La fin finala è la bumba atomara da la Svizra restada be ina bumba sin il palpiri. E tge tenuta ha la Svizra oz pertutgant bumbas atomaras? Oz, cur che Donald Trump, il president dals Stadis Unids da l'America, e Kim Jong Un, il dictatur da la Corea dal nord smanatschan dad avair il maun gia dasper il buttun?