Rúnar Ómarsson hefur unnið að hugmynd að íslensku nasli úr íslensku hráefni, sem innblásið er af hinum breska þjóðarrétti „fish and chips“. Íslenska útgáfan er hins vegar ekki djúpsteiktur fiskur og franskar kartöflur eins og í Bretlandi, heldur frostþurrkaður harðfiskur og kartöfluflögur. Fish & Chips er nú komið í verslanir og stefnan er að setja naslið á markað erlendis á næstunni. Rúnar var hjá okkur í dag og sagði frá því hvernig væri að koma af stað svona nýsköpunarverkefni.

Við slógum á þráðinn til Brussel, þar hefur Eiður Arnarsson bassaleikari og formaður félags hljómplötuútgefenda verið með annan fótinn í heilt ár og við fengum hann til að segja okkur hvernig ástandið er í borginni á kórrónuveirutímum og ýmislegt fleira.

Nú eru farfuglarnir flognir í burtu af Ströndum eins og annars staðar af landinu. Hrafninn er einn þeirra fugla sem ekki yfirgefur okkur og af honum eru ýmsar sögur og hjátrú. Kristín okkar Einarsdóttir velti fyrir sér hegðun og mikilvægi þessa merkilega fugls í sögum og sögnum.

UMSJÓN GUNNAR HANSSON OG GUÐRÚN GUNNARSDÓTTIR