Sauts novs da «Oesch’s die Dritten» cun tuns populars e da tutta sorts experiments.

«Oesch’s die Dritten» - Quai è ina dinastia musicala cun gronda tradiziun. Gia lur tat Hans era in musicant da vaglia ed er Hansueli Oesch, il bab, ha sunà en diversas furmaziuns, sco per exempel tar la chapella «Schwyzerörgeliquartett Stockhorn». Uss è lur chapella da famiglia en il center, e quai gia dapi 27 onns. Da la partida èn Hansueli ed Annemarie, lur uffants Kevin, Mike e Melanie, e l’accordeonist Urs Meier. Lur furmaziun è ina da las pli popularas en Svizra ed ha er success en Austria e Germania. Sunà han en divers lieus: Els han fatg var 2000 concerts en 14 pajais ed han ramassà discs d’aur e platin.

«Oesch's die Dritten» era l’emprim ina furmaziun cun ils uffants che faschevan musica e chantavan. Il 2007 han els gì lur emprim grond success cun il disc «Jodelzauber». E cun il «Ku-Ku Jodel» datti in onn pli tard in semperverd ch’ins enconuscha anc adina. La furmaziun da famiglia è lura stada giast en emissiuns da radio e televisiun sco il «Musikantenstadl». Lur popularitad crescha surtut pervi da Melanie Oesch che chanta e jodlescha - il star da la famiglia ch'è vegnida mamma la primavaira passada.

Uss è cumparì lur 17avel disc cun il titel «Händmade» che cuntegna puspè blera musica populara cun orgelet ed er auters stils, cun bler schlantsch, chant e divertiment.