O Roma-Butschu jek mulatintschago hi, savo o Burgenlandroma imar sajt buteder sar tranda berscha mulatinen. O tradicijoneli Roma-Butschu, savo adabersch erschtivar ando kulturakero kher Tenu Erba sina, muschika le burgenlanditike flogoskere grupnendar taj i mindenfelitiki Romengeri muschika sikal. Pasche o prindscharde Romengere bandi Romano Rath, Leon Berger taj Post Meridiem, te i nevi banda Romantic Death lakero dschanipe sikatscha.

Vasch o 30 berschengero di le atentatostar Erbatar, but mulatintschage tel likerde ulo. Adaj butvar upri cajt angloda taj upri aguni politischi situacija diklo ulo. Uso Karikano Stolo akan o dikipe upro entviklinipe palo atentato paschlardo te ol.

Lobdakero kherlipe manuschen khetan schaj anel, kekaj saj cipakero feschto, obste murschoro vaj dschuvlori vaj saj socijali terdschojipe len hi. Ada gondolinde pumenge te o phrala Zeljko Vasic taj Slobodan Antonijevic, kada on lejcti bersch o erschti Romengero lobdakero khelipeskero farajn andi Austrija kerde. O reporteri Adi Gussak le terne lobdakere khelaschtschen le SV Gipsy Kingsendar upro FavAC than ando 10to betschitiko gemajndakero becirk, ada lengero khelipeskero than hi, kher rodija.

Ande amari sendungakeri rik „Naschade Romengere sidlungtscha le Burgenlandistar“, akan le gaveha Zahling donde amen bescharas. O gav jek falato la gemajndejatar Eltendorf hi. Agun, adaj 16 Romengere familiji ande jek Romengeri sidlung dschivnahi. Akan o reporteri Adi Gussak khetan la Susanne Horvathaha upro jomakero rodipe pe kerel, te dikel, so andar odola manuscha ulo.

I Roma redakcijona le ORF-istar Burgenland, lejcti bersch i serija „Romengere papruschengere neviptscha andi Austrija“ kesdintscha. Ando sikavipeskero redo, hatek o cile Romengere papruschengere neviptscha, save andi Austrija del, angle terdscharde on. Akan, o reporteri Adi Gussak o tschavengero papruschengero nevipe „Mri nevi MiniMulti“ aun peske dikel.

Vasch o 80to berscheskero di le putripestar le logeristar Buchenwald, andi khangeri Lackenbach jek ratakero molinipe tel likerdo ulo. I Privati Pedagogischi Utschi Ischkola Burgenland taj i khangeri use ada gondolipeskero kirati akarde, kaj o jazziskero muschikaschi Harri Stojka leskere gitarakere hangijenca jek muschikano cajchn beschartscha.

Telal o anav „Romengeri sor – o khelipe le medijendar“ ando kisetinipe le aprilistar ando bundakero kancleriskero birovtschago Betschiste, i 33ti dialogoskeri seletoskeri forma tel likerdi uli. Pasche ekspertkiji taj ekspertscha, i Michaela Brunner taj i Simone Daxecker le nacijonali Romengere-kontaktoskere thanestar, te but kherodaschkiji taj kherodaschtscha schaj akarde.

O „Forum4Burgenland“ jek sikadipeskero forum la Privati Pedagogischi Utschi Ischkolatar Burgenland, la sikadipeskera direkcijonatar le Burgenlandiske taj le burgenlanditike flogoskere grupnengere bajrotschendar hi. O adaberschengero talalinipe telal o anav „Nevo tschibtschakero prikdipe“ tel likerdo ulo.

Ando 8to april o Internacijonali Romengero Di hi. Sajt 1990 pasche ada datum, upro cilo them mulatintschage tel likerde on. Fatreterkiji taj fatretertscha la flogoskera grupnatar le Romendar ada di len, i kultura taj aktujeli tematscha upre te sikal. I Roma VHS Burgenland adabersch use jek talalinipe akartscha, savo pe la situacijaha le Romendar pal 1945 dschi andi adiveseskeri cajt, donde bescharel.

Telal o anav „Maripe andi Austrija. 30 berscha Romengero atentato Erbatar.“, ando parlamento o mulatintschago uso Internacijonali Romengero Di tel likerdo ulo. Ande ada bersch o terdschijiptscha andar 1995 ando dikipe terdschonahi. Afka odole schtar Romenge gondolim ulo, save opfertscha le rechtsekstremi teroristar ule.