PAULINES

Mabuting Balita | Oktubre 30, 2022 –Linggo

Ika – 31 na Linggo sa Karaniwang Panahon

Ebanghelyo: Lucas 19:1-10

Pumasok si Hesus sa Jerico at dumaan sa siyudad. At may isang taong nagngangalang Zakeo. Pinuno siya ng mga kolektor ng buwis at napakayaman. Sinikap niyang makita kung sino si Hesus pero pandak siya at hindi niya magawa dahil sa dami ng mga tao. Kaya patakbo siyang umuna at umakyat sa isang punong-malaigos para makita si Hesus pagdaan doon. Pagdating ni Hesus sa lugar na iyon, tumingala siya at sinabi sa kanya: “Zakeo, bumaba ka agad. Sa bahay mo nga ako dapat tumigil ngayon.” Nagmamadali siyang bumaba at tuwang-tuwang tinanggap si Hesus. Inireklamo naman sa isa’t isa ng lahat ng nakakita rito: “Sa bahay ng isang lalaking makasalanan siya nakituloy.” Ngunit tumayo si Zakeo at sinabi sa Panginoon: “Panginoon, ibibigay ko sa mga dukha ang kalahati ng aking mga ari-arian; at kung may nadaya ako, apat na beses ko siyang babayaran.” At sinasbi sa kanya ni Hesus: “Dumating ngayon ang kaligtasan sa sambahayang ito dahil anak nga ni Abraham ang taong ito. At dumating ang Anak ng Tao para hanapin at iligtas ang nawawala.”

Pagninilay:

“Hindi ako si Darna!” 'Yan ang isang awitin ng OPM Singerna si Janine Desiderio, o kung mas trip n’yo ‘yong musikang banyaga, meron din namang kanta si superman, gawa ng bandang Five for Fighting, kung saan sinabi ng superhero na: “It’s not easy to be me.” Napakahirap talaga maging superhero o magpaka superhero. Pero sa panahon ngayon, na tumataas na bilihin at humihirap na buhay, minsan feelingnatin na wala naman tayong choice, kung hindi ang magpaka supermano darna, makaraos lang sa araw-araw. Kita ito ni Lord. Dama niya ang iyong pinagdaraanan. Kaya ang tugon ng Diyos ay hanapin at tawagin tayo pabalik sa kanya. Dahil bagamat sa mundo, kailangan nating maging palaging matatag at matapang. Sa piling ng Diyos pwedeng-pwede tayong maging tapat sa ating mga kahinaan, problema at buong pagkatao. Dahil kita naman Niya ang lahat sa atin ano man ang pinagdaraanan at kahinaan na mayroon tayo. Ang pagtingin sa atin ng Diyos ay hindi nagmamaliw. Sa ating Ama tayo ay palaging mga minamahal na anak, karapat-dapat hagkan, hanapin at iligtas. Patunay si Zakeo dito. Si Hesus ang humanap sa kanya, tumawag sa kanya, naging mabuti sa kanya. Kaya ugaliin nating mag dasal at doon tagpuin ang Diyos, na sa bawat sandali ng ating buhay ay tumatawag at nagmamahal sa atin. Dahil kung mayroon man tayong isang superpower na kailangan at magagamit sa buhay, ‘yan ay ang panalangin.

- Fr. Albert Garong, SSP | Society of St. Paul

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Mabuting Balita | Oktubre 29, 2022 – Sabado

Ika – 30 na Linggo sa Karaniwang Panahon

Ebanghelyo: Lucas 14:1, 7-11

Isang Araw ng Pahinga, pumasok si Hesus sa bahay ng isang pinuno ng mga Pariseo para kumain, at minanmanan naman nila siya. May talinghaga siyang sinabi nang mapuna niyang pinipili ng mga inimbita ang mga unang puwesto: “Kung anyayahan ka sa isang kasalan, huwag kang lumagay sa unang puwesto. Baka may kinumbidang mas importante kaysa sa iyo, at darating ang kumumbida sa inyong dalawa para sabihing ‘ibigay mo sa kanya ang puwestong ito.’ Kaya mapapahiya ka’t pupunta sa huling puwesto. Sa halip, kung anyayahan ka, sa huling puwesto ka pumunta sapagkat pagdating ng kumumbida sa iyo, sasabihin niya sa iyo: ‘Kaibigan, lumapit ka pa.’ Kaya mapararangalan ka sa harap ng lahat ng inanyayahan. Sapagkat ibababa ang lahat ng nagpapakataas at itataas ang nagpapakababa.” Sinabi ni Hesus sa puno ng mga Pariseo na nag-anyaya sa kanya: “Kung maghahanda ka ng tanghalian o hapunan, huwag mga kaibigan mo o mga kapatid mo o mga kamag-anak mo o mayayamang kapitbahay ang iyong kumbidahin, baka kumbidahin ka rin nila at susuklian ka. Kung maghahanda ka, mga dukha, mga bale-wala, mga pilay at mga bulag ang kumbidahin mo at magiging mapalad ka dahil hindi ka nila masusuklian ngunit sa pagkabuhay ng mga mabuti ka susuklian.

Pagninilay:

Ang talinghaga ay NAGPAPAALALA sa atin na maging humble o mapagpakumbaba sa kabila ng mga tagumpay, pagyaman, pagtanggap ng mga karangalan, posisyon, o papuri.

Ang ebanghelyo mula sa kay San Lucas ay nagtuturo na huwag tayong maging mayabang. Nakakasaksi tayo ng mga tao or grupo o mga bansa na nag aaway away at nagdidigmaan. Napapaalipin sila sa kasakiman at kayabangan. Marami ang mga inosenteng naaapektuhan at nasasaktan o namamatay. Nawawala ang kapayapaan.

Ang social media ay isang magandang daan upang ipakita natin ang mahahalagang values at pagsisikap upang makabigay tayo ng inspirasyon sa kapwa. Pero kung ang dahilan ng pagpapakita nito ay upang sumikat at papurihan, ito ay isang tendency o ugali na salungat sa kababaang loob. Kailangan natin ang tulong ng Diyos upang maging malaya sa ating pangangailangang ipagmalaki ang sarili nating kahalagahan sa harap ng iba.

Natutuwa ang Panginoon sa mga mabababang loob. Isang halimbawa ang ating Mahal na Birhen na tinanggap ang kalooban ng Diyos at nagsabing “Narito ang alipin ng Panginoon, mangyari nawa sa aking ayon sa wika mo.”

Pinatawad niya si Pedro at muling itinaas, matapos na ito ay magsisi sa pagtanggi na kilala niya si Hesus. Tayo ay di karapat dapat sa pagmamahal ng Panginoon, ngunit sa ating kababaang loob, inaaamin natin na kung tayo ay nawalay sa kanya, wala tayong magagawa. Ang pagpapakumbaba ay hindi nagpapababa sa ating sarili, sa halip ito ay tumutulong sa mga tao na magkaisa at magtulungan sa pag-unlad ng buhay ispiritwal o materyal. Sana ay lagi tayong maging mapagpakumbaba dahil itataas ng Diyos ang lahat ng mapagpakumbaba. – Sr. Yolanda Dionisio, fsp | Daughters of St. Paul

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Listen to this week's episode of Word and Song: GO DOWN, MEET JESUS! 

with Sr Amelyne Paglinawan, fsp 

Scriptwriter: Cleric Vinz Aurellano, SSP  

Mabuting Balita | Oktubre 28, 2022 – Biyernes

Ika –30 na Linggo sa Karaniwang Panahon

Ebanghelyo: Lucas 6: 12-16

Umakyat si Hesus sa bundok para manalangin at magpalipas ng magdamag sa pagdarasal sa Diyos. Nang nag umaga na, tinawag n’ya ang kanyang mga alagad at pumili s’ya ng labindalawa sa kanila na tinawag n’yang Apostol: si Simon na pinangalanan n’yang Pedro, si Andres na kapatid nito, si Jaime, si Juan, si Felipe, si Bartolome, si Mateo, si Tomas, si Jaimeng anak ni Alfeo, si Simon na tinaguriang Zelota, si Judas na kamag-anak ni Jaime, at si Judas Iskariote na naging taga-pagkanulo. Pagkababa kasama nila, tumigil si Hesus sa isang patag na lugar. Naroon ang maraming alagad n’ya at napakarami ring tao mula sa buong Judea at Jerusalem, at mula sa baybaying dako ng Tiro at Sidon ang dumating para makinig sa kanya at mapagaling sa kanilang mga karamdaman. Gumaling din ang mga pinahihirapan ng masasamang espiritu, kaya sinikap ng lahat ng tao na mahipo s’ya dahil may kapangyarihang lumalabas sa kanya na nagpapagaling sa lahat.

Pagninilay:

Ang kahit sino sa atin ay maaaring piliin ng Panginoon para sa isang natatanging misyon. Hindi kailangang sikat ka, may posisyon, maraming talent, maabilidad o may mataas na pinag-aralan upang maging instrumento ng kabutihan at ng paglago ng pananampalatayang Kristiyano. Ginugunita natin ngayon ang kapistahan ng dalawa sa mga napiling apostol ni Hesus—sina San Simon at San Judas Tadeo. Sila ay kabilang sa labing dalawa ngunit hindi sila masyadong kilala. Sa Biblia, kaunti lamang ang nasasaad tungkol sa kanila, maliban na lamang sa isang sulat sa Bagong Tipan na iniuugnay kay San Judas Tadeo. Sa Ebanghelyo ayon kay San Mateo at San Marco, kilala si San Simon sa tawag na “Cananaean”. “Simon the Zealot” naman ang bansag sa kanya ni San Lucas. Ito ay mga pangalan na parehong nangangahulugang “zealous” or “ardent”— patunay sa kanyang pagiging masugid na Hudeo na pinahahalagahan ang pagmamahal sa Diyos at sa sarili niyang bayang Israel. Si San Judas naman ay kilala sa tawag na “Tadeo” at “Anak ni Santiago” sa synoptic Gospels. Sa Ebanghelyo ayon kay San Juan, siya ang alagad na nagtanong kay Hesus: “Panginoon, bakit po sa amin lamang kayo magpapakilala nang lubusan at hindi sa sanlibutan?” Nang dahil sa katunungang ito at naipahayag ni Hesus ang hamon na kalakip at bunga ng pagmamahal natin sa kanya: “Kung ang sinoman ay umiibig sa akin, ay kaniyang tutuparin ang aking salita: at siya'y iibigin ng aking Ama, at kami'y pasasa kaniya, at  siya'y gagawin naming aming tahanan.”  Ang pagpili ng Panginoon kina San Simon, San Judas Tadeo at sa iba pang apostol ay di nakasalalay sa sarili nilang kusa, kakayahan at gawa. Bagkus ito ay naaayon sa kalooban ng Diyos na syang sumusuri at nakakakilala sa kanila. Ginamit at pinalago ng Panginoon ang kanilang mga likas na katangian. Ang kanilang sigasig at pagiging bukas na makipaglahok sa gawain ng Panginoon ay naging instrumento ng kabutihan at pagmamahal. Ang bawat isa sa atin ay tinatawag din ng Panginoon para sa natatanging misyon. Inaanyayahan tayong maging bukas sa tawag ng Diyos na magsilbi sa kapwa o maging katuwang Niya sa pagpapalago ng Kanyang Kaharian dito sa mundo. Nawa’y walang pagod din nating isabuhay ang mga halimbawa at turo ni Hesus. Nang sa gayon, tayo din ay maging mga totoong saksi ng Mabuting Balita.

- Sr. Ma. Janice Golez, PDDM | Disciples of the Divine Master

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Mabuting Balita | Oktubre 27, 2022 – Huwebes

Ika – 30 na Linggo sa Karaniwang Panahon

Ebanghelyo: Lucas 13:31-35

Dumating ang ilang Pariseo at binalaan si Hesus: “Umalis ka rito at pumunta sa ibang lugar. Gusto kasing ipapatay ni Herodes.” Sinabi naman ni Hesus: “Puntahan n’yo ang musang na ‘yon at sabihin sa kanya: ‘Ngayon at bukas ay nagpapalayas ako ng mga demonyo at nagpapagaling at nasa ikatlong araw ang katapusan ko. Ngunit dapat akong maglakad ngayon, bukas at sa susunod na araw sapagkat hindi bagay na mamatay sa labas ng Jerusalem ang isang propeta. Jerusalem, Jerusalem! Pinapatay mo ang Mga Propeta at binabato ang mga sinugo sa iyo. Gaano kadalas kong ginustong tipunin ang iyong mga anak gaya ng pagyupyop ng inahin sa kanyang mga sisiw pero tumanggi ka nga. Ngayon, maiiwan sa inyo ang inyong bahay. Sinasabi ko nga sa inyo na hindi n’yo na ako makikita hanggang di sumasapit ang panahon na sabihin n’yong ‘Mapalad ang dumarating sa ngalan ng Panginoon.’”

Pagninilay:

Alam ni Hesus na sa takdang panahon siya ay ipapapatay, ngunit hindi siya natatakot harapin ito. Walang sinuman ang makapipigal sa kanya sa paghahayag ng kaharian ng Diyos; ng pagpapagaling at pagtuturo, kahit si Herodes pa. Ito ang sinabi niya sa mga Pariseo: Sabihin ninyo sa alamid na iyon na nagpapalayas ako ngayon ng mga demonyo at nagpapagaling, bukas ay gayun din; sa ikatlong araw, tatapusin ko ang aking gawain. Natapos nga ang gawain ni Hesus nang sambitin niyang: consumatum est!(natapos na!) habang siya’y nakabayubay sa krus. Sa kabila ng mga pinagdaanan ni Hesus, hirap, pagod, pagtutuligsa, pagtatwa, at pag-iwan, nanatili siyang matatag. Hindi siya pinanghinaan ng loob. Bagkus, patuloy siya sa kanyang misyon – ang iligtas ang sangkatauhan. Tularan natin si Hesus. Huwag tayong umayaw, matakot, panghinaan ng loob sa mga dagok ng buhay. Huwag tayong patatalo sa mga makapangyarihan sa atin. Nakatitiyak tayong ligtas tayo sa mga kamay ng Diyos. Kaya naman, magpatuloy tayo sa ating mga gawain at responsibilidad lalong-lalo na kung ito’y sa tama at mabuti. Huwag nating pansin ang mga pananakot ng ibang tao tulad ni Herodes. Tanging paglingkuran lang natin at sundin ay ang Diyos. Paalala lang sa atin, na maging mapagmatyag at alerto tayo laban sa mga taong tuso, mapaglihim, nagbabalak manira, at walang prinsipyo katulad ni Herodes – naturingang isang alamid. Hindi titigil ang mga ito hanggang hindi tayo sumusuko at napababagsak. Kaya, ang “moog at tanggulan” natin ay ang Diyos. – Fr. Brian Paul Tayag, SSP | Society of St. Paul

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Mabuting Balita | Oktubre 26, 2022 – Miyerkules

Ika – 30 na Linggo sa Karaniwang Panahon

Ebanghelyo: Lucas 13:22-30

Dumaan si Hesus sa mga lunsod at mga nayon na nagangaral habang papunta s’ya sa Jerusalem. May nagtanong sa kanya, “Panginoon, kakaunti nga ba ang maliligtas?” At sinabi ni Hesus sa mga tao, “Magpumilit kayong pumasok sa makipot na pintuan sapagkat sinasabi ko sa inyo marami ang gustong pumasok at di makapapasok. Kapag tumindig na ang may-ari ng bahay at naisara na ang pinto, tatayo kayo sa labas na kumakatok at magsasabing, ‘Panginoon, buksan mo kami.’ Sasagot naman s’ya sa inyo, ‘Hindi ko alam kung taga-saan kayo.’ Kaya sasabihin ninyo, ‘Kami ang kumain at uminom na kasalo mo, at sa aming mga lansangan ka nangaral.’ Ngunit sasagutin n’ya kayo, ‘hindi ko alam kung taga-saan kayo. Lumayo kayo sa akin kayong gumagawa ng masama.’ Naroon ang iyakan at pagngangalit ng mga ngipin pagkakita ninyo kina Abraham, Isaac, Jacob at sa lahat ng Propeta sa kaharian ng Diyos at ipagtatabuyan naman kayo sa labas. At makikisalo naman sa kaharian ng Diyos ang mga darating mula sa silangan, kanluran, timog at hilaga. Oo, may mga huli ngayon na mauuna at may mga una na mahuhuli.

Pagninilay:

Mga kapanalig, sinasabing ang Pilipinas na lamang ang natatanging Kristiyanong bansa sa Asya.  Ayon sa huling talaan ng Philippines Statistics Authority 2022 mahigit sa Siyamnapu’t dalawang porsyento ng ating populasyon ay mga Kristiyano, na karamihan ay mga Katoliko.  Pero ilan ba sa bilang na ito ang aktibong nagsasabuhay ng pananampalataya?  Mas marami pa rin ang kabilang sa mga itinuturing na “nominal Christians,” o yung mga nabinyagan lang sa Kristiyanong pananampalataya, pero hindi naman nagsasabuhay ng pananampalataya.  Marami din sa bilang na ito ang kasapi ng KBL – yung pumapasok sa Simbahan tuwing Kasal, Binyag, Libing. Meron din namang aktibong nagsisimba tuwing Linggo, nakikinig sa Salita ng Diyos, nakikinabang sa Banal na Komunyon, nagkakawanggawa rin – pero namumuhay ng taliwas sa kalooban ng Diyos.  Grabe kung mag tsismis! Maraming Marites sa loob at labas ng simbahan, maging sa komunidad na ating ginagalawan. Nakakabahala din ang kalakaran ng pagpapakalat ng kasinungalingan, at pagbaluktot sa kasaysayan; ang walang humpay na batuhan ng hate messages sa social media, na wala nang paggalang sa kapwa; at tila ba mas iniidolo pa at ginagawang bayani ang mamamatay tao, katulad ng nangyaring patayan sa Ateneo de Manila University kamakailan.  Meron ding pumapabor sa katiwalian at pagkagahaman sa kapangyarihan… at sumusulong na gawing legal ang aborsyon at diborsyo sa ating bansa. Di ba taliwas ang mga gawaing ito sa Sampung Utos ng Diyos?   Mga kapanalig, kung totoong Kristyano tayo na sumusunod kay Kristo, mga katangian ni Kristo ang dapat makita sa ating pagkatao – mapagmahal, mapagpatawad, at tunay na may malasakit sa kapwa.  At magagawa natin ito kung tatahakin natin ang makipot na daan na Kanyang tinahak – ang daan ng Krus.  – Sr. Lines Salazar, fsp | Daughters of St. Paul

Panalangin:

Panginoon, papag-alabin Mo po ang ningas ng apoy ng Espiritu Santo sa aking puso, upang tahakin ko ang makipot na pintuan ng pagpapakatao at pagiging tunay na Kristiyano. Amen.