MABUTING BALITA | DISYEMBRE 9, 2021

Huwebes sa Ikalawang Linggo ng Adbiyento

EBANGHELYO: Mt 11:11-15

Sinabi ni Hesus sa mga tao: “Talagang sinasabi ko sa inyo, walang sinuman sa mga kilalang tao ngayon ang mas dakila pa kay Juang tagapagbinyag, pero mas dakila sa kanya ang pinakamaliit sa Kaharian ng Langit. Mula sa panahon ni Juan Bautista hanggang ngayon, ang Kaharian ng Langit ay marahas na sumusulong at mga maylakas ang silang umaagaw nito. “Pagpopropesiya nga lamang ang panahon ng Mga Propeta at ng Batas hanggang kay Juan. At kung gusto ninyo itong tanggapin, si Juan ang Elias na darating. Makinig ang may tainga.”

PAGNINILAY:

Maingay ang ating kapaligiran, marami ang ating naririnig sa social media, sa mga taong nakapaligid sa atin at mismong sa ating sarili, lalong lalo na ngayong nalalapit na ang kapaskuhan at eleksyon. Ano nga ba ang dapat pakingggan, paniwalaan at higit sa lahat panghandaan natin, sa kapanahunan ng Adbiyento? Sa Mabuting Balita ngayon, sinabi ni Hesus, na si Juan Bautista ang pinakadakila sa mga propeta, pero ang pinaka maliit sa langit ay mas higit na dakila pa sa kanya. Ipinakikilala na ni Hesus, na Siya na nga ang hinihintay na Mesiyas na ipinangaral ni Juan Bautista at mga propeta. Sa pakikinig, mahalaga na bukas ang tainga, at higit sa lahat bukas din ang tainga ng ating mga puso. Ipinangaral ni Juan Bautista at ni Hesus ang pagsisisi at pag-babalik loob sa Diyos, pero hindi ito pinakinggan ng mga tao, at hindi rin tayo naiiba sa kanila. Kung narinig at naunawaan natin ang mensahe dapat may kasabay na aksiyon ng pagbabago ng sarili. Ang tahasang desisyon na baguhin ang sarili patungo sa kabanalan para mapabilang sa kaharian ng Diyos. May mga taong ipinapadala ang Diyos para magbigay mensahe at mag-akay sa atin patungo sa Kanya. Mga taong ating nakakasalamuha sa ating araw-araw na pamumuhay. Minsan ang mensahe ay galing sa isang batang musmos, na kadalasan hindi natin nabibigyang pansin. Tungkulin din natin na mag-akay ng iba patungo sa Diyos. Mga kapanalig, tunay na magka-kaugnay ang ating buhay bilang Kristiyano. Bukas ba ang tainga ng iyong puso sa ipinahayag si Hesus? Nalalapit na ang kapaskuhan, ano sa palagay mo ang gusto ng Panginoon na paghandaan mo at magandang regalong maiaalay mo kay Hesus?  - Siony Japzon Ramos, IHF | Institute of the Holy Family

PANALANGIN: Panginoon bigyan Mo po ako ng tainga na marunong makinig, sumunod, at higit sa lahat isang pusong bukas ang tainga ng pang-unawa upang tumugon. Amen.

MABUTING BALITA | DISYEMBRE 8, 2021

Miyerkules sa Ikalawang Linggo ng Adbiyento

EBANGHELYO: Lc 1:26-38

Ng ikaanim na buwan, ang Angel na si Gabriel ay inutusan ng Diyos sa isang lungsod ng Galilea na tinatawag na Nazaret. Sa isang Birhen naidulog na sa isang lalaki sa lahi ni David na ang pangalan ay Jose, at ang pangalan ng Birhen ay Maria. Pagpasok niya sa kinaroronan ng babae ay sinabi niya! “Abba puspos ka ng biyaya ang Panginoon ay sumasayo.” Sa mga pangungusap na ito, si Maria ay nabigla at pinagdilidili ang kahulugan ng gayong bati. Datapwat sinabi sa kanya ng Angel: “Huwag kang matakot, Maria, sapagkat nagging kalugodlugod ka sa mata ng Diyos. Tingni maglilihi ka at manganganak ng isang lalaki na tatawagin mong Hesus. Siya ay magiging dakila at tatawagin Anak ng Kataas-taasan. Ibibigay sa kanya ng Panginoong Diyos ang luklukan ni David ng kanyang ama. At maghahari siya sa sambahayan ni Jacob magpakailaman; at walang katapusan ang kanyang kaharian.” Winika ni Maria sa Angel “Paanong mangyayari ito gayong wala akong nakilalang lalaki?” “Bababa sa iyo ang Espiritu Santo at lililiman ka ng kapangyarihan ng Kataas-taasan kaya ang ipanganak ay magiging banal at tatawaging Anak ng Diyos. At tandaan mo ang kamag-anak mong si Esabel ay naglilihi ng isang lalaki sa kanyang katandaan, at yaong tinatawag na baog ay nasa ikaanim na buwan na, sapagkat sa Diyos ay walang bagay na di mangyayari.” “Narito ang lingkod ng Panginoon, maganap nawa sa akin ang iyong sinabi.” At nilisan siya ng Anghel

PAGNINILAY:

Ang Dakilang Kapistahan ng Kalinis-linisang ng Paglilihi ng Mahal na Ina ay isang pagpupugay sa kabutihan ng Diyos para sa ating lahat. Ang pagpili Niya sa Mahal na Ina bilang “bagong Eba” na siyang magiging instrumento ng kaligtasan. Binago ni Maria ang mga naging unang reaksyon ni Eba sa hardin ng paraiso. Ito ang maging mapagpakumbaba. Ang mahal na ina ay simbolo ng tapat na pakikinig. Kaya siya ay napupuno ng grasya. Ang mapagpakumbabang-tapat na pakikinig ni Maria sa mensahe ng anghel ay nagdala sa atin ng bagong pag-asa at bagong mukha ng kaligtasan – si Hesus.  Sa mga dakilang halimbawa na ipinakita ng Mahal na Inang Maria, inaanyayahan niya tayo na lisanin ang bagay na pumupuno sa ating puso. Iwaksi ang mga kagustuhang nakakabulag upang makita at madama natin ang imbitasyong akapin din at papasukin sa ating mga puso si Hesus na ating Tagapagligtas.  Ngayong panahon ng Adbiyento, kung saan hinihintay natin ang pagsilang ng sanggol, bigyan nawa natin ng halaga ang mga aral ng dakilang kapistahang ipinagdiriwang natin ngayon, ang paanyaya ng Mahal na Ina huwag magbingi-bingihan sa Mabuting Balita. Tayo nawa ay maging isang nagagalak na tagapakinig, nang sa gayon, ang nais ng Diyos ang masunod at maghari sa ating mga buhay araw-araw. Amen.

Br. Samy Torrefranca, SSP | Society of St. Paul

MABUTING BALITA | DISYEMBRE 7, 2021

Martes sa Ikalawang Linggo ng Adbiyento

EBANGHELYO: Mt. 18: 12-14

Sinabi ni Hesus sa kanyang mga alagad: “Ano sa palagay ninyo? Kung may sandaang tupa ang isang tao at naligaw ang isa sa mga ito, hindi ba niya iiwan sa kaburulan ang siyamnapu’t siyam para hanapin ang naliligaw? At sinasabi ko sa inyo: Kapag nakita niya ito, mas matutuwa pa siya rito kaysa siyamnapu’t siyam na hindi naligaw. Gayundin naman, ayaw ng inyong Amang nasa Langit ang mawala ang isa man sa maliliit na ito.”

PAGNINILAY:

Narinig natin sa Mabuting Balita ang talinghaga ng paghahanap sa isang nawawala at pag-iwan sa siyamnapu’t siyam para hanapin ang isang nawawala. Parang mahirap isipin bakit iiwan ang ninety nine (99) para sa isa? Kung sa negosyo pa, madaling iwan ang isa kasi mas malaki ang kita sa ninety nine (99). Parang hindi logical, parang hindi tama. Marahil sa ating isip, sayang naman ang siyamnapu’t siyam kung dahil lamang sa isa ay iiwan natin. Pero sa puso ng Diyos ang isa ay napakahalaga. Dahil ang isa na tinutukoy sa Mabuting Balita ay ang bawat isa sa atin. Ang bawat isa sa atin na patuloy na nawawala sa landas ng buhay dahil sa ating takot, galit, mga alalahanin at marami pang iba. Madalas tayo ay nawawala sa piling ng Diyos dahil sa ating katigasan ng ulo, ang pagpupumilit na maging independent sa Panginoon. Peropatuloy nya tayong hinahanap at inaanyayahang bumalik sa kanya. Ang pagmamahal ng Diyos ay naayon sa pangangailangan ng bawat isa sa atin. Naalala ko ang aking Inang noong nabubuhay pa sya. Tinatanong ko sya bakit parang paborito nya ang isa kong kuya. Pag nanghingi sa kanya ay lagi nya itong binibigyan. Ang sagot nya sa akin, “ang pagmamahal ng ina ay naayon sa pangangailangan ng minamahal.” Tunay nga naman na bibigyan nya ang kuya ko na iyon kasi mas higit itong nangangailangan.  Hindi dahil hindi mahalaga ang siyamnapu’t siyam na hindi nawawala kundi dahil ayaw ng Diyos na may mapawalay sa kanya. Ayaw ng Diyos na mapalayo tayo sa kanya. Mga kapanalig, sa ating pang araw-araw na buhay, paano natin pinahahalagahan ang mga taong nakikita nating nawawala o nagwawala? Marahil ngayong panahon ng pandemic, marami ang nawawalan ng pag-asa dahil sa kawalan ng trabaho, at patuloy na hirap sa buhay, nawa kagaya ng pagpapahalaga sa atin ng Panginoon, ganun din natin pahalagahan ang isa’t isa, higit sa lahat ang mga taong malalapit sa atin, ang ating pamilya, mga kaibigan, ka trabaho at ang mga taong alam nating higit na nangangailangan.

- Ms. Daisy Santos, IOLA | Institute of our Lady of Annunciation

MABUTING BALITA | DISYEMBRE 6, 2021

Lunes sa Ikalawang Linggo ng Adbiyento

EBANGHELYO: Lc 5:17-26

Isang araw, nagtuturo si Hesus at nakaupo naman ang mga Pariseo at mga guro ng Batas na galing sa iba’t ibang bayan ng Galilea at Judea at mula sa Jerusalem. Gumagawa ang kapangyarihan ng Panginoon sa kanya na magpagaling. May mga lalaking dumating na dala sa isang papag ang isang lalaking paralitiko. Sinikap nilang dalhin siya at ilagay sa harapan ni Hesus. Nang hindi nila makita kung paano nila madadala ang paralitiko dahil sa dami ng tao, umakyat sila sa bubungan at sa bubong nila idinaan siya pababa na nasa kanyang papag hanggang sa gitna sa harap ni Hesus. Nang makita niya ang kanilang pananalig, sinabi niya: “Kaibigan, pinatatawad ka sa iyong mga kasalanan.” Nagsimula noong mag-isip-isip ang mga guro ng Batas at mga Pariseo: “Talagang iniinsulto ng taong ito ang Diyos. Sino ba ang may kapangyarihang magpatawad ng mga kasalanan? Hindi ba’t ang Diyos lamang?” Ngunit alam ni Hesus ang kanilang mga pag-iisip kaya sinabi niya sa kanila: “Ano ang mga kaisipan ninyong ito? Ano ba ang mas madaling sabihin: ‘Pinatatawad ka sa iyong mga kasalanan’ o ‘Tumayo ka’t lumakad.’? Dapat ninyong malaman na may kapangyarihan sa lupa ang Anak ng Tao na magpatawad ng mga kasalanan.” At sinabi niya sa paralitiko: “Sinasabi ko sa iyo: bumangon ka, dalhin ang iyong higaan at umuwi.” Kapagdaka’y tumayo siya sa harap nila, kinuha ang kanyang higaan at umuwing nagpupuri sa Diyos. Namangha ang lahat at nagpuri sa Diyos. Nasindak nga sila at sinabi: “Nakakita tayo ng mga kagila-gilalas na bagay sa araw na ito!”

PAGNINILAY:

Tunay na makabago na ang ating panahon, mayroon ng work from home, online classes, online shopping dahil sa pandemya at makabagong paraan ng komunikasyon. Sa gitna ng mga makabagong bagay na ito kaya pa ba nating mamangha o ipahayag ang ating awe at wonder sa mga nangyayari sa ating paligid? Ang pagkamangha sa mga nakikita at nararanasan natin ay isang paraan ng pagkilala sa kadakilaan ng Diyos na may gawa ng lahat. Sa Mabuting Balita ngayon namangha ako at humanga sa malasakit ng mga lalaking nagdala sa isang paralitiko kay Hesus. Ang kanilang pagmamalasakit ay may kasamang gawa. Marami kasi sa atin, nagsasabing nagmamalasakit sa kapwa pero kulang sa gawa.  Humanga ako nang idaan ng mga lalaki sa bubong ng bahay ang paralitiko at sa mismong harapan ni Hesus siya ibinaba upang makita siya at mapagaling ni Hesus. Sabihin nating sure move ang kanilang ginawa. Nakakamangha ang ipinadamang habag at awa ni Hesus sa paralitiko, ang pagpapatawad niya sa kasalanan nito, pagpapalakad sa kanya at pagbibigay niya sa paralitiko ng bagong pag-asa sa buhay.  Mga kapanalig, ipinapaalala sa atin ng Mabuting Balita na ang paghanga at pagkamangha ay nagpapalalim ng ating pagtitiwala at paniniwala kay Hesus. Ang tunay na pagkamangha ay ipinagkakaloob sa atin ng Espiritu Santo at ang Espiritu ring ito ang pumapatnubay sa atin upang magkaroon tayo ng pagkakataong makagawa tayo ng kabutihan.

-  Sr. Narci Peñaredonda, SJBP | Sisters of Jesus Good Shepherd/Pastorelle

PANALANGIN: Ama naming Makapangyarihan, buksan Mo ang aming mga mata, puso at isip upang kami ay mamangha sa kagandahan ng bawat araw na Iyong ibinibigay. Ipadala Mo ang Banal na Espiritu sa mga taong naapektuhan ng pandemyang Covid-19 at lahat ng frontliners na tumutulong sa kanila.  Pagkalooban mo po sila ng kagalingan, ginhawa at lakas ng kalooban. Amen.

MABUTING BALITA | DISYEMBRE 5, 2021 

Ikalawang Linggo ng Adbiyento

EBANGHELYO: Lc 3:1-6

Ito ang nangyari sa ikalabinlimang taon ng paghahari ni Emperador Tiberio. Gobernador noon ng Judea si Poncio Pilato at mga tetrarka si Herodes sa Galilea, si Felipe na kapatid nito sa Iturea at Traconitide, at si Lisanias sa Abilene; sina Anas at Caifas naman ang mga Punong-pari nang panahong iyon. At noon dumating kay Juan na anak ni Zacarias ang salita ng Diyos sa disyerto. Ipinahayag ni Juan ang binyag na may pagbabalik-loob sa kapatawaran ng mga kasalanan, at nilibot niya ang buong rehiyon sa tabi ng Jordan. Nasusulat nga sa aklat ng pahayag ni Propeta Isaias: “Naririnig ang sigaw sa disyerto: Ihanda ang daan para sa Panginoon, ituwid ang kanyang landas. Patataasin ang bawat lambak at pabababain ang bawat bundok at burol. Papatagin ang mga batong kinatitisuran at papantayin ang lupang lubak-lubak. At makikita ng lahat ng tao ang pagliligtas ng Diyos.”

Pagninilay:

Papalapit na ang Pasko, kaya naman nagsimula ng maghanda ang mga tao para sa pinakamasayang pagdiriwang ng taon. Hindi mapipigilan ang galak, ang excitement ng mga tao na maski hindi naging matiwasay ang taon dahil sa patuloy na banta ng COVID-19 Pandemic, maghahanda pa rin ng mga dekorasyon sa bahay, mga regalong pamasko, mga pang-Noche Buena at Media Noche, mga plano para sa company year-end thanksgiving – mapavirtual man o face to face celebration. Mga kapanalig, kumusta naman kaya ang ating espirituwal o pangkaloobang paghahanda? Sa ating Mabuting Balita matutunghayan ang mga kaganapan sa unang Adbiyento. Sino nga ba ang huwaran ng ating paghahanda sa pagsilang ng Mesiyas? Walang iba kundi si Juan Bautista, ang pinsan ng ating Panginoong Hesus, na nangaral ng pagpapatawad at pagliligtas ng Diyos na makakamit kung magkakaroon ng radikal na pagbabagong-loob. Nasaan si Juan Bautista? Sa disyerto, o sa ilang niya nahanap ang Diyos! Hindi maranasan ni Juan sa mga lider noon ang paghahari at presensya ng Diyos kaya pumunta siya sa disyerto. Dahil sa karaniwang tigang at tuyo na klima o madalang na pag-ulan, mabuhangin, at mabato, halos walang nakatira sa disyerto; bagamat mayroon ring malamig na disyerto na natatakpan ng niyebe. Sa Bibliya, ang disyerto ay maaaring kumatawan sa lugar kung saan nagpapakilala ang Diyos, katulad ng kanyang paghahayag sa kasaysayan ng Israel. Sa unang banda, sa disyerto, maaaring mas makilala ang Diyos at ang sarili; si Hesus ay tinukso ng diyablo sa disyerto, pagkatapos ng kanyang pag-aayuno ng apatnapung araw at apatnapung gabi. Sa kabilang banda, kinakatawan din ng disyerto, ang pagkatuyo, ang pagsubok na espirituwal at kahirapan. Mga kapanalig, maaaring itong COVID-19 Pandemic ay isang “desert experience” para sa atin, upang mas makilala natin ang Diyos at ang sarili at kung ano nga ba ang mga tunay at higit na mahalaga sa buhay. Ito ang tunay na paghahanda: pasukin ang disyerto ng ating puso o kalooban, patirin ang uhaw at gutom, sa pamamagitan ng pagyakap natin sa kaligtasan.

- Fr. Paolo Asprer, SSP | Society of St Paul

Word and Songs | A Joyful Journey Through Christmas

with Sr Rosangela Ronda, fsp

Listen to: 

Word and Songs | A Journey of Faith

with Sr. Rosangela Ronda, fsp

MABUTING BALITA | DISYEMBRE 4, 2021

Sabado sa Unang Linggo ng Adbiyento

EBANGHELYO: MATEO 9:35-10:1, 5a, 6-8

Nilibot ni Hesus ang mga bayan at mga nayon; nagtuturo siya sa kanilang mga sinanoga, nagpapahayag ng Mabuting Balita ng Kaharian at nagpapagaling ng lahat ng sakit at karamdaman. Nang makita niya ang makapal na tao, naawa siya sa kanila sapagkat hirap sila at lupaypay na parang mga tupang walang pastol. At sinabi niya sa kanyang mga alagad: “Marami nga ang aanihin at kakaunti naman ang mga manggagawa. Idalangin ninyo sa Panginoon ng ani na magpadala siya ng mga manggagawa sa kanyang ani.” Tinawag ni Hesus ang labindalawa niyang alagad at binigyan sila ng kapangyarihan sa maruruming espiritu para palayasin ang mga ito at pagalingin ang lahat ng sakit at karamdaman. Sinabi ni Hesus sa kanila: “Hanapin ninyo ang nawawalang tupa ng sambayanan ng Israel. Ipahayag ang mensaheng ito sa inyong paglalakbay: ‘Palapit na ang kaharian ng Langit.’ Pagalingin ang maysakit, buhayin ang patay, linisin ang mga mayketong at palayasin ang mga demonyo. Ibigay ninyo nang walang bayad ang tinanggap ninyo nang walang bayad.”

PAGNINILAY:

Sa gitna ng pandaigdigang krisis pangkalusugan na patuloy nating kinakaharap,marahil marami sa atin ang nagtatanong: Nasaan na ba ang awa ng Diyos? Bakit hanggang ngayon, hindi pa rin tayo nakakaahon? May katapusan pa ba ang lahat ng ito? May mga nagnilay at nagsabi: “hindi na tayo kagaya ng dati matapos man ang pandemyang ito.”  Actually,sang-ayon ako sa kanila. Hindi na nga tayo magiging katulad ng dati kasi may magbabago sa atin. At sa tingin ko, ito’y isang magandang pagbabago. Sa Mabuting Balitang narinig natin, nahabag si Hesus sa maraming tao na nangangailangan ng kaginhawaan at kaligtasan mula sa anumang uri ng sakit at hapis, pisikal man o espiritwal. Dahil sa laking awa Niya, tumawag si Hesus ng mga alagad upang maging kaagapay Niya sa pagpapalaganap ng Kaharian ng Diyos. Mga kapanalig, totoo na may awa ang Diyos at naririto Sya nananahan sa atin. Ikaw at ako ay tinatawag Niyang maging manggagawa sa Kanyang anihan. Ang bawat isa sa atin ay nakatanggap din ng biyaya upang isabuhay ang misyon ng Panginoon sa gitna ng krisis na ating pinagdadaanan. Kapag niyakap natin ang misyong ito, hindi na nga tayo magiging katulad ng dati.

- Sr. Ma. Janice Golez, PDDM | Pious Disciples of the Divine Master

MABUTING BALITA | DISYEMBRE 3, 2021

Biyernes sa Unang Linggo ng Adbiyento  | San Francisco Javier, pari

EBANGHELYO: Mt 9:27-31

Sumunod kay Hesus ang dalawang bulag na lalaki na sumisigaw: “Anak ni David, tulungan mo kami!” Pagdating niya sa bahay, inabutan siya ng mga bulag at sinabi ni Hesus sa kanila: “Naniniwala ba kayo na may kapangyarihan ako para gawin ang gusto ninyong mangyari?” Opo “Oo, Ginoo!” Hinipo ni Hesus ang kanilang mga mata at sinabi: “Mangyari sa inyo ang inyong paniniwala.” At nabuksan ang kanilang mga mata. Mahigpit naman silang tinagubilinan ni Hesus: “Mag-ingat kayo at huwag sabihin ito kanino man.” Ngunit pagkaalis nila, ipinahayag nila siya sa buong bayan.

PAGNINILAY:

Narinig natin sa Mabuting Balita ngayon ang tagpo ng pagpapagaling ni Hesus sa dalawang bulag na sumisigaw ng “Anak ni David, mahabag po kayo sa amin.” Sa mga katagang ito, mayroon nang pananalig ang dalawang bulag sa kapangyarihan ni Hesus bilang anak ni David; at pananalig na si Hesus ay nakakapagpagaling. Ang sagot naman sa kanila ni Hesus ay patanong, “Naniniwala ba kayo na mapapagaling ko kayo?” Mahalaga kay Hesus ang pananalig sa kanya ng taong humihingi ng tulong. Kung wala namang pananampalataya ang isang tao sa kanya, wala siyang magagawa para sa taong ito. At dahil naniniwala sa kanya ang dalawang bulag, tinamo nila ang kagalingan.  “Mangyari ang ayon sa inyong pananampalataya.”  Anong kagalingan ang hinihingi mo sa Panginoon? Tumatawag ka ba sa kanya? Sumusunod ka ba sa kanya katulad ng dalawang bulag na nagtiyaga na sundan si Hesus? At naniniwala ka ba na nais ni Hesus na pagalingin ka?  Sinubukan mo na bang lumapit kay Hesus pero parang hindi ka niya naririnig? Kung ganito ang nangyayari, tatalikuran mo na ba ang Panginoon, o patuloy kang magtitiwala at susundan siya, katulad ng walang pagod na pagsunod sa kanya ng dalawang bulag? Mga kapanalig, tandaan natin na lagi tayong naririnig ni Hesus at sinasagot niya tayo. Pero hindi laging sa paraan na gusto natin. Sa halip binibigyan niya tayo ng lakas upang makaya natin ang mga pinagdaraanan sa buhay na ito. Sa spiritual healing naman na ipinagkakaloob sa atin ni Hesus, nabubuksan ang ating mga mata at nakikita natin ang mas malalim pang kahulugan ng mga pagsubok at paghihirap. Nakikita natin ang mahalagang plano ng Diyos sa atin. Amen. - Sr. Yolanda Dionisio, FSP | Daughters of St. Paul

MABUTING BALITA | DISYEMBRE 2, 2021

Huwebes sa Unang Linggo ng Adbiyento | Santa Bibiana

EBANGHELYO:  Mt. 7:21, 24-27

Sinabi ni Hesus sa mga alagad: “Hindi lahat ng nagsasabi sa akin ng ‘Panginoon! Panginoon!’ ay papasok sa Kaharian ng Langit kundi ang nagsasagawa sa kalooban ng Diyos ang siyang papasok sa Kaharian ng Langit. Kaya kung may nakikinig sa mga salita ko at sumusunod dito, matutulad siya sa isang matalinong nagtayo ng bahay sa batuhan. Bumagyo at bumaha ang ilog at humangin nang malakas, ngunit hindi nagiba ang bahay sapagkat itinayo ito sa batuhan. At ang sinumang nakaririnig sa aking mga salita at hindi nagsasagawa nito, matutulad siya sa isang hangal na nagtayo ng bahay sa buhanginan. Bumagyo at bumaha ang ilog at humangin nang malakas, at bumagsak ang bahay at kay laking kapahamakan!”

PAGNINILAY:

Mga kapanalig, sa mga bagyo at hirap ng buhay, patuloy ba nating pinipili ang maging andan at kumapit lalo sa Diyos? Base sa aking karanasan, sadyang napakahirap ang maghintay, ang magtiis, at ang masaktan. Nakakapagod at nakagagalit! Pero ang hatid pala ng mga pagsubok na iyon sa akin, ay turuan akong maging mapagpakumbaba at palalimin pa lalo ang pundasyon ko sa Diyos. At sa pagkapit ko sa kabutihang loob ng Diyos, at sa kanyang awa, pinipili kong maging biyaya sa kung saan man ako ipunla at sa kung saan man ako mapunta.  Ang Mabuting Balita sa araw na ito ay nagpapahiwatig din, na ang pagiging banal at ang kaligtasan ay hindi mabilisang proceso o madaling i-prepare katulad ng instant coffee or noodles. Isa itong paglalakbay, na mahaba at masukal, kung saan marami tayong aral na matututunan at dapat andan. Marami tayong sariling gusto na dapat bitawan at pakawalan. Dahil ang buhay ng pagpapakabanal ay hindi lang umiikot sa salita, at sa pagtawag, tulad ng nabanggit sa Mabuting Balita. Ang pakikinig at pagsasagawa ng mga bilin at kautusan ng Diyos ay nangangailangan ng matibay na pundasyon.  Tulad ng mga atleta, kailangan nang constant practice araw-araw ang paggawa ng kabutihan, nang sa gayon magkaroon tayo ng mas malakas na pangangatawan, resistance at endurance laban sa mga bagyo ng buhay at hindi tayo matutumba. Mahalaga din ang tinatawag na muscle memory – ito yung alam natin kung ano ang dapat gawin at mabuting response sa buhay – ang piliin kung ano ang kalooban ng Diyos.

- Br. Samy Torrefranca, SSP | Society of St. Paul