MABUTING BALITA | DISYEMBRE 1, 2021

Miyerkules sa Unang Linggo ng Adbiyento | San Eligio

EBANGHELYO: Mt 15:29-37

Pumunta si Hesus sa pampang ng lawa ng Galilea, at pagkaakyat sa burol ay naupo. Maraming tao ang lumapit sa kanya, dala-dala ang mga pipi, bulag, pilay, mga may kapansanan, at mga taong may iba’t ibang karamdaman. Inilagay sila ng mga tao sa paanan ni Hesus, at pinagaling niya sila. Kaya namangha ang lahat nang makita nila na nagsasalita ang mga pipi, lumalakad ang mga pilay, gumagaling ang mga may kapansanan, at nakakakita ang mga bulag; kaya pinuri nila ang Diyos ng Israel. Tinawag ni Hesus ang kanyang mga alagad at sinabi sa kanila: “Labis akong naaawa sa mga taong ito, pangatlong araw ko na silang kasama at ayaw kong paalisin silang gutom at baka mahilo sa daan.” Sinabi ng mga alagad sa kanya: “At saan naman tayo hahanap ng sapat na tinapay sa ilang na ito para ipakain sa mga taong iyan?” “Ilan bang tinapay meron kayo?” “Pito at kaunting maliliit na isda.” Pinaupo ni Hesus sa lupa ang mga tao, kinuha niya ang pitong tinapay at ang maliliit na isda, at nagpasalamat sa Diyos. Hinati-hati niya ang mga ito at inibigay sa kayang mga alagad, at ibinigay rin nila sa mga tao. Kumain silang lahat at nabusog at inipon ang mga natirang pira-piraso - pitong punong bayong.

PAGNINILAY:

Mga kapanalig, nagdudulot ng pag-asa sa marami sa atin ang Mabuting Balita ngayon.  Inaaliw tayo nito na meron tayong Diyos na mahabagin na nakababatid ng ating pangangailangan – pisikal man o espiritwal, bago pa natin ito hingin sa Kanya sa panalangin. Kaya sa mga nawalan ng mahal sa buhay at patuloy na nagdadalamhati; sa mga nawalan ng trabaho at nahihirapang maitawid ang pang-araw-araw na pangangailangan ng pamilya; sa mga health workers at iba pang frontliners na patuloy na nagtataya ng buhay upang magbigay buhay; at sa ating lahat na nakararanas ng depresyon, takot, pangamba at kawalan ng pag-asa – humugot tayo ng lakas sa katiyakang meron tayong Diyos na nakakaalam ng ating pinagdadaanan at hinding-hindi Niya tayo pinababayaan.  Ang Panginoong Hesus ang mukha ng habag at awa ng Diyos Ama sa atin. Ang himala ng pagpaparami ng tinapay at isda sa Mabuting Balitang narinig natin ay hindi udyok ng reklamo ng mga tao dahil sa gutom, o ng pamimilit ng mga disipulo na pauwiin sila para makabili ng sariling makakain. Sa halip, bunga ito ng kusang pagtugon ng Panginoong Hesukristo, na nakadarama ng hirap na kanilang pinagdadaanan. Aniya, “nahahabag ako sa mga taong ito, sapagkat tatlong araw na ngayon na kasama ko sila at wala nang makain. Ayaw ko silang paalising gutom; baka mahilo sila sa daan.” Mga kapanalig, ganyan makisangkot sa buhay natin ang Panginoon. Ramdam niya at nakikita ang mga pinagdadaanan nating paghihirap sa ngayon. Hindi siya bulag o natutulog, o nanonood lamang sa ating paghihirap... Siya’y konkretong kumikilos sa pamamagitan ng mga taong may mabubuting kalooban na patuloy na tumutulong, nagmamalasakit, at kumakalinga sa mga taong labis na nahihirapan, sa abot ng kanilang makakaya. Sila ang mga frontliners na patuloy na nagtataya ng buhay upang makapagbigay ng buhay sa iba; sila ang mga OFWs na patuloy na nakikipag-sapalaran sa ibang bansa upang maitaguyod ang pangangailangan ng pamilya. Sila ang mga pari at madre, mga educators, mga pinuno ng bayan na tunay na servant leaders... Sila ay ikaw at ako na araw-araw inaanyayahan ng Panginoong Hesus na maging kanyang kamay at paa, maging kanyang mata at tainga, maging kanyang puso na makadarama ng paghihirap ng ating kapwa. Ngayong panahon ng Adbiyento, handa ka bang tumugon sa paanyaya ng Panginoon na maging daluyan ng kanyang biyaya at pagpapala lalot higit sa mga nangangailangan?

– Sr Lines Salazar, fsp | Daughters of St Paul

MABUTING BALITA | NOBYEMBRE 30, 2021

Martes sa Unang Linggo ng Adbiyento

EBANGHELYO: MATEO 4:18-22

Sa paglalakad ni Hesus sa pampang ng lawa ng Galilia, nakita niya ang magkapatid na Simon na tinawag na Pedro at Andres na naghahagis ng mga lambat dahil mga mangingisda sila. Sinabi niya sa kanila: “Halikayo, sumunod kayo sa akin, at gagawin ko kayong mangingisda ng tao.” Agad nilang iniwan ang kanilang mga lambat at sumunod sa kanya. Nagpatuloy siya ng paglakad at nakita naman niya ang magkapatid na Jaime at Juan na mga anak ni Zebedeo. Nasa bangka sila kasama ng kanilang amang si Zebedeo at nagsusursi ng kanilang lambat. Tinawag sila ni Hesus. Agad nilang iniwan ang bangka nila at ang kanilang ama, at nagsimulang sumunod sa kanya.

PAGNINILAY:

May ugali tayo na kapag may maganda tayong karanasan sa isang tao, gusto rin nating ipakilala siya sa ating pamilya o kaibigan. Yung tipong isasama natin siya sa mga importanteng tao sa buhay natin, sa ating circle of friends. Ganito ang naging kuwento ng pagkakaibigan nina Hesus, Simon at Andres. Si Andres ay dating tagasunod ni Juan Bautista. Ipinakilala siya ni Juan Baustista kay Hesus. Sa kalaunan, naging tagasunod na siya ni Hesus. Magandang bigyang pansin, na ang magkapatid na Simon at Andres ang mga unang apostol na pinili ni Hesus, bago ang magkapatid na Santiago at Juan. Ano kaya ang naging karanasan ni Andres kay Hesus? Siguradong maganda, at una rito ang pagbuo ng ugnayan. Siguro naging mayaman ang karanasan ni Andres sa katapatan, kabutihan at pagpapakumbaba ni Hesus. Kaya’t ito ang dahilan, kung bakit lagi lamang siya sa likod, at handang magbigay ng moral support. Tahimik siya, hindi mayabang kundi patago ang paggawa niya ng kabutihan, at higit sa lahat maalalahanin. Hindi siya naging kasing sikat ng tatlo pang apostol. Marahil kuntento na si Andres na nasa likod lamang, basta’t kaibigan niya si Hesus at natututo siya sa Kanya. Isa sa kanyang magandang karanasan ay ang pagpapakain ni Hesus ng limang libong lalaki. Naging makahulugan ang papel ni Andres, nang sabihin niya kay Hesus na may isang batang lalaki doon na may dalang dalawang pirasong isda at limang tinapay. Siya ang naging daan upang maisagawa ni Hesus ang himala ng pagpapakain at pagbubuo ng mga taong susunod sa Kanya.  Simple, pero mahalaga ang kanyang role. Hindi siya naghahangad ng pagkilala o pagpapahalaga. Basta nandiyan lang siya.

-  Sr. Narci Peñaredonda, SJBP | Sisters of HESUS the Good Shepherd

PANALANGIN: Ama, sa misteryo ng Iyong pagtawag at aming pagtugon, turuan mo kaming maging katulad ni apostol San Andres: tahimik, mapagbigay, tapat at hindi naghahangad ng pagkilala. Pagnilayan nawa namin ang karanasang kapiling ka at maisabuhay namin ang mga turo at aral mo sa Simbahan. Amen.

MABUTING BALITA | NOBYEMBRE 29, 2021

Lunes sa Unang Linggo ng Adbiyento

EBANGHELYO: MATEO 8:5–11

Pagdating ni HESUS sa Capernaum lumapit sa kanya ang isang kapitan at nakiusap sa kanya: “Ginoo, nakahiga sa bahay ang aking katulong. Lumpo siya at sobra na ang paghihirap.” “Paroroon ako at pagagalingin ko siya.” “Panginoon, hindi ako karapat-dapat para tumuloy ka sa bahay ko. Mag-utos ka lang at gagaling na ang aking katulong. Mababa nga lang ang ranggo ko, pero kapag sinabi ko sa isa sa mga kawal na nasa ilalim ko: ‘Pumaroon ka,’ pumaparoon siya. At sinasabi ko naman sa isa pa: ‘Pumarito ka,’ at pumaparito siya; at sa aking katulong: ‘Gawin mo ito,’ at ginagawa niya ito.” Nang marinig ito ni Hesus, humanga siya at sinabi sa mga sumusunod sa kanya: “Sinasabi ko sa inyo, wala pa akong natagpuang ganitong paniniwala sa Israel. Sinasabi ko sa inyo: marami ang darating mula sa silangan at sa kanluran para makisalo kina Abraham, Isaac at Jacob sa kaharian ng Langit.”

PAGNINILAY:

Handa ka bang magpakababang-loob para sa kabutihan ng iba? Hinangaan at pinuri ni Hesus ang opisyal ng hukbong Romano sa ating mabuting Balita. Sumasalamin ang kanyang mga kilos at salita sa likas niyang kabutihan bilang tao. Makikita din natin sa kanya ang malalim na pagkaunawa sa kung ano ang ibig sabihin ng kapangyarihan, at saan ito ginagamit. Nagpakita siya ng isang pambihirang pananalig, na hindi inaasahan sa isang hindi Hudyo. Mataas na opisyal man ng isang hukbo, personal siyang pumunta kay Hesus para hilingin ang paggaling ng kanyang katulong.  Alam niyang siya’y pagano at hindi nararapat na makinabang sa kagandahang loob ni Hesus. Pero dahil sa pagmamahal niya sa kanyang katulong, kinalimutan niya ang mataas niyang katayuan, lumapit at taimtim na humingi ng tulong ni Hesus. Alam niya ang kapangyarihan ng salita.  Nag-uutos sya sa kanyang mga tauhan at nangyayari ito. Dahil dito, buo ang kanyang pananalig sa kapangyarihan ng salita ni Hesus. Sabihin lamang ni Hesus, ito ay magaganap. Ang kanyang malakas na pananampalataya ay nakaugat sa malalim na pagkakaunawa sa kung ano at para saan ang kapangyarihan.  May positibong pagtingin ang opisyal na ito sa kapangyarihan, dahil alam niya itong gamitin para sa kabutihan ng iba.  Hindi lahat ng tao ay nakakaunawa sa kung ano at para saan ang kapangyarihan.  Sa halip na hawakan ito nang may pananagutan, nalilimutan pa nga nila ang pag-aaruga sa kapwa, kababaang loob at pananampalataya sa Diyos.  Ipagdasal natin ang mga taong nasa positions of authority – government leaders, employers, teachers, parents, guardians and heads of communities and institutions. Nawa’y gaya ng opisyal sa ating Mabuting Balita maging huwaran din sila at gamitin ang kapangyarihan bilang instrumento ng pagsisilbi at pagmamahal sa kapwa.

- Sr. Nimfa Ebora, PDDM | Disciples of the Divine Master

MABUTING BALITA  | NOBYEMBRE 28, 2021 

Unang Linggo ng Adbiyento (K)

EBANGHELYO: LUCAS 21:25-28, 34-36

Sinabi ni HESUS sa kanyang mga alagad: “Magkakaroon ng mga tanda sa araw, buwan at mga bituin. Sa lupa’y mangangamba ang mga bansa dahil sa ugong at alon ng dagat, at wala silang magagawa. Hihimatayin ang mga tao dahil sa takot at pagkabahala sa mga sasapitin ng sanlibutan sapagkat mayayanig ang mga puwersa ng sanlibutan. At makikita nila ang Anak ng Tao na dumarating na nasa ulap na may Kapangyarihan at ganap na Luwalhati. Kung magsimula nang maganap ang mga ito, tumindig kayo at tumunghay dahil palapit na ang inyong katubusan. Mag-ingat kayo’t baka bumigat ang inyong mga isip sa mga bisyo, paglalasing at mga intindihin sa buhay. At baka bigla kayong datnan ng araw na iyon. Babagsak itong parang bitag sa lahat ng nasa lupa. Kaya’t lagi kayong magbantay at manalangin para maging marapat na makatakas sa lahat ng mangyayaring ito at makaharap sa Anak ng Tao.”

PAGNINILAY:

Ikaw ba ay laging handa? Mahalaga ang kahandaan sa buhay, lalo na at may mga sitwasyong dumarating nang biglaan o hindi inaasahan. Mas mabuting maghanda nang maaga kaysa magulat at mataranta tayo kapag nasa harap na natin ang isang bagay o pangyayari. Ngayong panahon ng Adbiyento, muli tayong inaanyayahan na pagnilayan ang tema ng pagdating ng Panginoong Hesus. Siya ay dumating na noong siya’y nagkatawang-tao at nakipamuhay sa atin, at tiyak na babalik muli sa ikalawang pagkakataon na Diyos Ama lamang ang nakababatid ng panahon at oras. Para sa ating mga Kristiyano, ang pagdating ng Panginoong Hesus ay inaasam, hinihintay… Pero ito’y may kalakip na paghahanda at pag-asa. Mistulang nakakatakot ang mga palatandaan ng pagbabalik ng Panginoon sa Mabuting Balita sa araw na ito mula kay San Lucas, pero kung ating susuriin at babasahin na may pananalig sa Diyos, mababatid na ito’y nagbibigay pag-asa at kapanatagan sa puso. Ang mga pagbasa tungkol sa pagdating ng Panginoong Hesus ay hindi naghahangad na tayo ay takutin, kundi upang palakasin pa nga ang ating loob. Hinihikayat tayong gugulin ang buhay natin sa lupa nang tama at wasto nang sa gayon ay makatindig tayo ng tuwid at harapin ang Panginoon sa kanyang pagdating. May responsibilidad tayo sa buhay na ipinagkaloob sa atin: Huwag nating sayangin ang hiram na panahon sa daigdig. Bagkus, tulad ng sinabi sa Mabuting Balita: maghanda, manalangin, dahil nalalapit na ang pagtubos sa atin ng Diyos.

- Fr. Khris Emmanuel Llacer, SSP | Society of St. Paul

MABUTING BALITA | NOBYEMBRE 27, 2021

Sabado sa Ika-34 Linggo ng Taon

EBANGHELYO: LUCAS 21:34-36

Sinabi ni Hesus sa kanyang mga alagad: “Mag-ingat kayo’t baka bumigat ang inyong mga isip sa mga bisyo, paglalasing at mga intindihin sa buhay. At baka bigla kayong datnan ng araw na iyon. Babagsak itong parang bitag sa lahat ng nasa lupa. Kaya’t lagi kayong magbantay at manalangin para maging marapat na makatakas sa lahat ng mangyayaring ito at makaharap sa Anak ng Tao.”

PAGNINILAY:

Merong isang musmos na batang babae ang dumalaw sa aming kumbento na nagtanong sa kanyang ina ng ganito; “Mommy, bakit po si auntie at ang mga kasamahan niyang mga madre ay palaging nagdarasal? Sinagot siya ng kanyang ina: “Nagdarasal sila para lalo silang mapalapit sa Diyos, at para lagi silang magkaroon ng lakas, upang patuloy sila sa kanilang mga gawain. At gayundin, ipinagdarasal nila ang kanilang mga mahal sa buhay, at yaong mga nahihirapan dahil sa mga problema, kasama na rin ang mga humihingi sa kanila ng mga panalangin.” Mga kapanalig, narinig nating sinabi ni Hesus sa Mabuting Balita ngayon, “Kaya’t magbantay kayo at manalangin lagi, upang magkaroon ng lakas na makaligtas sa lahat ng mga bagay na ito na mangyayari at makaharap kayo sa Anak ng Tao.” Kaya mahalaga ang mataimtim na panalangin at pagmumuni-muni kung ano ang nararapat nating desisyon, upang maging matatag tayo sa ating pang-araw-araw na pakikibaka sa buhay. At manalig tayo, na gagabayan tayo ng Diyos hanggang sa wakas. Kayo po, ano ba ang nilalaman ng inyong panalangin? Ito ba’y para lang sa pansariling kapakanan? Di po ba totoo, na sa langit lang ang may “forever, at dito sa lupa ay pansamantala lamang ang ating buhay? Kailangan po nating alalahanin na lahat tayong mga nilikha ng Diyos ay may pananagutan sa isa’t-isa, lalo na ngayong panahon ng pandemya. -  Sr. Susan Peñaflor, FSP | Daughters of St. Paul

PANALANGIN:

Panginoong Hesukristo, tulungan Nyo po kami na maging karapat-dapat na tawaging mga anak ng iisang Amang Lumikha. Nawa’y matanto namin ang tunay na dahilan kung bakit hindi kami nabubuhay para sa sarili lamang, kundi para din sa kapakanan ng iba. Amen.

Word and Songs | Maranatha, Come Lord Jesus!

with Sr. Lines Salazar, fsp

MABUTING BALITA | NOBYEMBRE 26, 2021 

Biyernes sa Ika-34 Linggo ng Taon

EBANGHELYO: LUCAS 21:29-33

Sinabi ni Hesus sa kanyang mga alagad ang isang talinhaga: “Tingnan ninyo ang punong-igos at ang ibang mga puno. Pagkakita ninyong nagdadahon na ang mga ito, alam ninyong malapit na ang tag-init. Gayundin naman, pag napasin ninyo ang mga ito, alamin ninyong malapit na ang paghahari ng Diyos. Talagang sinasabi ko sa inyo na hindi lilipas ang salinlahing ito at mangyayari ang lahat ng ito. Lilipas ang langit at lupa ngunit hindi lilipas ang aking salita.”

PAGNINILAY:

Ang Mabuting Balita na pinanghahawakan nating mga Kristiyano ay ang pagbabalik ng Anak ng Tao upang maganap nang lubos ang Kaharian ng Diyos tulad ng Kanyang ipinangako sa Kanyang mga Apostoles. Hindi tulad nang una niyang pagdating kung saan siya’y tinanggihan, ipinako at namatay sa Krus, hindi na Siya tatanggihan sa Kanyang kamangha-mangha at makapangyarihang muling pagbabalik. Ayon sa Banal na Kasulatan bago mangyari ang lahat ng ito, maraming pagsubok ang ating dapat pagdaanan – tulad ng digmaan, malalakas na lindol, bagyo, baha, taggutom, paglitaw ng mga kakaibang bagay at kababalaghan mula sa langit, at pag-uusig at pagpatay sa mga Kristiyano at marami pang iba.  Saksi na tayo sa mga ibang pangyayaring mga ito. Sa talinghaga ni Hesus tungkol sa puno ng igos itinuturo Niya sa atin na kapag nakikita na natin ang mga pangyayaring ito sa panahon natin, alam nating nalalapit na ang Kaharian ng Diyos.  Pero kahit lumipas ang langit at lupa, nangako si Hesus na hindi lilipas ang mga salita Niya kailanman. Kaya sa halip na matakot, gamitin nating pagkakataon ang mga ito upang makapagpatotoo tungkol kay Hesus. Dahil tanging Diyos lamang naman talaga ang nakakaalam ng araw at oras, huwag nawa tayong mapuspos ng sobrang pag-iisip at pag-aalala kung kailan ito mangyayari. Sa halip gamitin ang oras at talentong ipinagkaloob sa atin ng Diyos upang mas kilalanin pa ang ating Tagapagligtas. Bawa’t araw mamuhay tayo sa paraang makikita ng iba si Hesus sa ating pagkatao – sa ating mga salita, isip at gawa.

Sa ganitong mga paraan, sasalubungin natin ang pagbabalik ni Hesus nang walang takot, handa at puno ng kagalakan.

- Ms. Nerisse Reyes, APC | Association of Pauline Cooperators, SSP-Makati

MABUTING BALITA | NOBYEMBRE 25, 2021

Huwebes sa Ika - 34 Linggo ng Taon

EBANGHELYO: LUCAS 21:20-28

Sinabi ni Hesus sa kanyang mga alagad: “Kung makita ninyong nakubkob na ng mga hukbo ang Jerusalem, alamin ninyong sumapit na ang kanyang pagkawasak. Kaya tumakas pa-bundok ang mga nasa Judea, umalis ang mga nasa lunsod, at huwag nang bumalik doon ang mga nasa bukid. Sapagkat ito ang mga araw ng pahihiganti sa kanya para matupad ang lahat ng nasa Kasulatan. Sawimpalad ang mga nagdadalantao o mga inang nagpapasuso sa mga araw na iyon. Sapagkat matindi ang sasapit na kapahamakan sa lupain at ang galit sa bayang ito. Mamamatay sila sa tabak, dadalhing bihag sa lahat ng bansa, at yuyurakan ng mga bansang pagano ang Jerusalem hanggang mabuo ang panahon ng mga bansa. Magkakaroon ng mga tanda sa araw, buwan at mga bituin. Sa lupa’y mangangamba ang mga bansa dahil sa ugong at alon ng dagat, at wala silang magagawa. Hihimatayin ang mga tao dahil sa takot at pagkabahala sa mga sasapitin ng sanlibutan sapagkat mayayanig ang puwersa ng sanlibutan. At makikita nila ang Anak ng Tao na dumarating na nasa ulap na may Kapangyarihan at ganap na Luwalhati. Kung magsimula nang maganap ang mga ito, tumindig kayo at tumunghay dahil palapit na ang inyong katubusan.”

PAGNINILAY:

Kapanalig, nalulungkot ka ba, at nababahala sa “end times” o sa katapusan ng mundo?  Ito ang sinasabi sa narinig nating Mabuting Balitang mula kay San Lukas. Ang pinagdadaanan nating pandemya, ang malalakas na bagyo, pagsabog ng bulkan, pagyanig ng lupa o lindol, patayan at ang hindi pagkakaintindihan ng mga tao ay maaari nating maihalintulad sa mga tanda ng katapusan ng mundo.  Pero sa gitna ng mga malagim na pangyayaring ito, pinapaalalahanan tayo ng Panginoon na huwag matakot. Sa halip, tumindig at tumunghay, dahil malapit na ang ating katubusan. Tatagan pa natin ang pananalig sa Diyos ng pag- ibig, Diyos na gumagabay sa ating buhay araw araw, at Diyos na handang magpatawad sa ating mga kakulangan at kasalanan.  Mga kapanalig, kung napupuspos tayo ng takot at pangamba sa ngayon, dahil sa mga nangyayari sa ating kapaligiran, lalo pa tayong magdasal at magtiwala sa Diyos, upang ang ating takot ay mapalitan ng pag-asa, at matatag na paniniwala sa walang hanggang pagmamahal ng Diyos.

- Ms. Amie Batoctoy, IHF | Institute of the Holy Family

PANALANGIN:

O Diyos naming Mapagmahal, mahabag po kayo sa amin. Pawiin nyo po ang takot at pangamba sa aming puso, at dagdagan ang aming pananampalataya, na kasa-kasama ka namin sa pagharap ng mga pagsubok araw-araw. Maging handa nawa kami lagi sa’Yong pagdating, anumang oras ito dumating sa aming buhay, Amen.

MABUTING BALITA | NOBYEMBRE 24, 2021

Miyerkules sa Ika-34 Linggo ng Taon

EBANGHELYO: LUCAS 21:12-19

Sinabi naman ni Hesus: “Bago sumapit ang lahat ng ito, dadakipin kayo at uusigin; ibibigay kayo sa mga sinagoga at dadalhin sa mga kulungan at ihaharap sa mga hari at mga gobernador dahil sa aking pangalan. Sasapit ito sa inyo para makapagpatotoo kayo sa akin. Isaisip n’yo na huwag ikabalisa ang pagtatanggol sa inyong sarili dahil ako mismo ang magbibigay sa inyo ng mga salita at karununganng hindi matatagalan o masasagot ng lahat ng inyong kaaway. Ipagkakanulo kayo ng inyong mga magulang, mga kapatid, mga kamag-anak at mga kaibigan, at papatayin nila ang ilan sa inyo. At kamumuhian kayo ng lahat dahil sa aking pangalan. Ngunit hindi maaano isa mang buhok sa inyong ulo. Sa inyong pagpapakatatag, ang mga sarili ninyo mismo ang inyong makakamit.”

PAGNINILAY:

Humigit kumulang tatlumpung taon ang lumipas nang matupad ang propesiya ni Hesus tungkol sa pag-uusig na sasapitin ng kanyang mga alagad. Sumiklab ang malawakang pang-aabuso, paniniil at pagpapahirap sa mga Kristiyano. Nang isulat ni San Lucas ang Mabuting Balita, pinili niyang balikan ang babala ni Hesus tungkol sa pag-uusig sa mga mananampalataya. Ito'y isang pag-uusig na kasasangkutan at magwawatak-watak sa mga malalapit na mga kamag-anak. Magugunita na ipinasunog ni emperador Nero ang Roma at pinagbintangan niya ang mga Kristiyano sa krimen na siya ang gumawa. Ang Coloseo sa Roma ay isang malagim na alaala, ng pagmamalupit sa mga Kristiyano na ipinalapa sa mga gutom na hayop. Isa rin itong bantayog sa katapangan ng mga Kristiyano at sa kanilang katapatan sa pananampalataya sa Diyos. Ilan kaya sa mga naging saksi sa pagiging martir ng mga unang Kristiyano ang naantig ang kalooban dahil sa kanilang matibay at matatag na pananampalataya? Mga kapanalig, sa panahon ng mga unang Kristiyano, pinag-uusig ang mga naging tapat kay Hesukristo. Sa isang pamilya, mayroong mananampalataya sa Diyos at mayroon din namang sumasamba sa emperador. Ang pagiging isang Kristiyano ay itinuring na labag sa batas, at ang mga Kristiyano ay inakusahan na mga nanggugulo sa lipunan. Kaya’t mismong kamag-anak ang nagsusuplong sa mga otoridad sa kamag-anak nilang Kristiyano. Dahil dito, madali silang natukoy at nadakip. Ipinaalala ni Lucas sa mga Kristiyano na nakita na ni Hesus ang lahat ng sasapitin ng mga unang Kristiyano, pero hindi sa kamatayan o pagkabigo magwawakas ang lahat. Tiniyak ni Hesus na ipapadala sa mga Kristiyano ang Espiritu Santo para makayanan nilang harapin ang lahat ng pagsubok. Gagabayan sila ng Espiritu ng Panginoon at sa huli'y magtatagumpay, at makakamit ang buhay na walang hanggan. - Fr. Paul Marquez, SSP | Society of St. Paul

MABUTING BALITA | NOBYEMBRE 23, 2021 

Martes sa Ika-34 Linggo ng Taon

EBANGHELYO: LUCAS 21:5-11

May ilang nag-uusap tungkol sa Templo, at sinasabi nila na may magagandang bato ito at mamahaling palamuti. Sinabi naman ni HESUS: “Darating ang mga araw na walang matitirang magkapatong na bato sa lahat ng inyong nakikita; iguguho ang lahat.” Nagtanong sila sa kanya: “Guro, kailan ito mangyayari at ano ang tanda na sumapit na ito?” Sumagot si HESUS: “Mag-ingat kayo at baka kayo madaya. Maraming aangkin sa aking pangalan na magsasabing ‘Ako ang Mesiyas; ako siya,’ at ‘Palapit na ang panahon.’ Huwag kayong sumunod sa kanila. Sa pagkabalita n’yo sa digmaan at mga kaguluhan, huwag kayong maligalig; mangyayari muna ito pero hindi pa ito ang wakas.” At sinabi niya sa kanila: “Magdidigmaan ang mga bayan at naglalaban-laban ang mga kaharian. Magkakaroon din ng malalakas na lindol sa maraming lugar, magkakaroon ng taggutom, magkakaroon ng mga kakila-kilabot na bagay at ng malalaki ring kababalaghan sa Langit.”

PAGNINILAY:

Marahil marami sa atin ang nakakaalam sa mga sinasabi sa online at telebisyon ukol sa tumataas na kaso ng COVID sa mundo, at ang mga kaguluhan sa mga bansang Afghanistan at Myanmar kamakailan. May mga nagsasabing, senyales na raw ang mga ito na matatapos na ang mundo. May mga iilan din sa atin ang nakararamdam ng takot, hindi lamang para sa ating mga sarili, kundi para sa ating mga mahal sa buhay. Mga kapanalig, ang mensahe sa atin ng  Mabuting Balita ngayong araw, ay nagpapaalala, na ang mga pagsubok na dumarating sa ating buhay ay maaaring maging instrumento, upang mapatatag ang ating pananampalataya, pag-asa at pag-Ibig. Hindi pinangako ni Hesus ang maginhawang buhay, kundi ang kanyang mapagmahal na presensya upang masamahan tayo sa ating paglalakbay. Marami pa tayong mga pagsubok na kahaharapin sa ating buhay. Pero kung kasama natin ang Panginoong Hesus sa pagharap ng mga ito, ang mabigat na pasanin ay madadala natin nang buong sigla at lakas.  Kaya’t halina, tumindig tayo at tignan ng buong pagmamahal si Hesus, ang bukal ng ating pag-asa at nagpapalakas sa ating mga kahinaan.  Amen.

- Mr. Alvin Keith De Perio, ISGA | Institute of St. Gabriel the Archangel