MABUTING BALITA | OKTUBRE 29, 2021

Biyernes sa Ika–30 na Linggo sa Karaniwang Panahon

EBANGHELYO: LUCAS 14:1 -6

Isang Araw ng Pahinga, pumasok si Jesus sa bahay ng isang pinuno ng mga Pariseo para kumain, at minanmanan naman nila siya. Nasa harap niya roon ang isang taong minamanas kaya nagtanong si Hesus sa mga guro ng batas at mga Pariseo. “Pwedi bang magpagaling sa araw ng pahinga o hindi? Hindi sila umimik kaya hinawakan ni Hesus ang maysakit, pinagaling ito at saka pinauwi. Pagkatapos ay sinabi niya sa kanila, kung mahulog sa balon ang anak o ang baka ni isa sa inyo di bat agad nyo iniaahon kahit na araw ng pahinga? At hindi niya siya nasagot.

PAGNINILAY:

Napakahirap magkasakit! Hindi biro ang mayroon kang iniindang kirot o sakit sa katawan kahit pa maliit lamang iyan. Nakaaantig ng puso ang kalagayan ng daan-daang taong nasa labas ng ospital at naghihintay na mabigyan ng silid upang sila’y mabigyan ng sapat na medical interventions, at magamot sa kanilang karamdaman, lalo na kung COVID-19. Madudurog ang puso nang kahit na sinong makakikita sa mga pasyenteng nakalatag ang karton sa pasilyo ng ospital, dahil kulang ang mga pasilidad o kaya’y higit na sa kapasidad ng ospital, dahil sa labis-labis na ang dami ng nagkakasakit. Iisa ang nais ng lahat ng may karamdaman, pati ng kanilang mga kaanak, ang gumaling sa lalong madaling panahon. Marahil ganito ang nasa puso ng taong may sakit na lumapit kay Hesus sa gitna ng isang handaan. Habang kumakain ang lahat, lumapit siya upang siya’y mapagaling. Hindi siya binigo ni Hesus at tuluyang pinagaling. Sabbath ang araw na iyon, alam nating ipinagbabawal ng batas ng mga Judio ang mga gawain sa araw ng Sabbath, kahit pa nga ang magpagaling ng may sakit. Pero malinaw ang mensahe at kilos ni Hesus, mas mahalaga ang buhay ng tao, ang tao mismo kaysa sa batas ng Sabbath. Itinutuwid ni Hesus ang ating pananaw at pagpapahalaga. Kung mahuhulog nga naman ang iyong anak o alagang hayop sa isang balon, kahit na anong oras o araw man ito, hindi ba at sasagipin natin ito? Dito walang naitugon ang mga Pariseo at mga dalubhasa ng kanilang mga batas. Madalas din nating kinahaharap ang ganitong pagkalito. Sa ating kagustuhang sundin ang mga ipinag-uutos ng batas, nalilimutan natin na ang mga panuntunan ay nilikha para sa ikabubuti ng tao. Nalilimutan natin, na ang dapat na nasa puso at isip ng bawat batas na nililikha, ay para at dahil sa kapakanan ng tao, lalo na sa kanilang mahihina, mahihirap, may karamdaman o kapansanan, para sa kanilang mga walang tinig sa lipunan. Lumapit tayo sa Diyos, diringgin Niya tayo, walang kalituhan sa puso at isip Niya. Pagmamahal at pagpapahalaga sa bawat isa sa atin ang kanyang susundin. Ito ang Batas ng Pag-ibig ng Diyos.

– Cl. Buen Andrew Cruz, SSP | Society of St Paul

-

MABUTING BALITA | OKTUBRE 28, 2021

Huwebes sa Ika–30 na Linggo sa Karaniwang Panahon

EBANGHELYO: LUCAS 6: 12-16

Umakyat si Jesus sa bundok upang manalangin at magpalipas ng magdamag sa pagdarasal sa Diyos. Nang mag-uumaga na, tinawag n’ya ang mga alagad at pumili s’ya ng labindalawa sa kanila na tinawag n’yang apostol: Si Simon na pinangalanan n’yang Pedro, si Andres na kapatid nito: si Jaime, si Juan, si Felipe, si Bartolome, si Mateo, si Tomas, si Jaimeng anak ni Alfeo, si Simon na tinataguriang Zelota, si Judas na kamag-anak ni Jaime, at si Judas Iskariote na naging tagapagkanulo.

PAGNINILAY:

Isa sa maraming beses nating ginagawa ay ang pagpili at pagkilatis. Ipinakita sa atin ni Hesus na ang pinaka epektibong paraan ng pagpili at pagkilatis ay sa pamamagitan ng pananalangin.  Ito ang kanyang ginawa nang piliin at kilatisin niya ang kanyang magiging mga apostol. At ang mga napili niya, qualified ba? Hindi! Ang pinili Niya ay mga ordinaryong tao at makasalanan pa ang iba. Pero ginawa Niya silang extra-ordinaryong tao sa pamamagitan ng kanyang pagpili at pagtawag, pagtitiwala, pagbuo ng malalim na ugnayan, pagtuturo at pagpapahayo upang ipangaral ang mga natutunan nila mula sa Kanya. Hindi sila nagtrabaho agad. Sinimulan ni Hesus ang pagkilala at pagbuo ng malalim na ugnayan sa kanila. Ang lahat ng mula sa Ama ay inihayag niya sa kanila. Isinama at ipinakita Niya sa kanila, kung ano ang Kanyang ginagawa at itinuturo sa mga tao – ang tungkol sa paghahari ng Diyos;  at pagkatapos, pinahayo sila upang mangaral ng kanilang mga natutunan mula kay Kristo – ang Mabuting Balita.  Ayon sa ating Santo Papa, ang pinakasentrong gawain ng Simbahan ay ebanghelisasyon. Ito ay pagbabahagi kung paano natin naranasan si Hesus sa ating buhay at paanong ang karanasang ito ay nagdala sa atin sa buhay ng pagbabago. Mga kapanalig, ilagay natin ang ating mga sarili na isa sa mga apostol na tinawag ni Hesus. Tingnan natin ang ating mga sarili na isang kaibigan ni Hesus na inihahayo sa ating pamilya, sambayanan at trabaho upang ibahagi sa kanila ang karanasan natin sa Panginoon.

- Sr. Narci Peñaredonda, SJBP | Sisters of Jesus Good Shepherd/Pastorelle

- Sr. Sheila Estremos ng Sisters

MABUTING BALITA | OKTUBRE 27, 2021

Miyerkules sa Ika–30 Linggo sa Karaniwang Panahon

EBANGHELYO: LUCAS 13:22-30

Dumaan si Jesus sa mga lunsod at mga nayon na nagangaral habang papunta s’ya sa Jerusalem. May nagtanong sa kanya, “Panginoon, kakaunti nga ba ang maliligtas?” At sinabi ni Jesus sa mga tao, “Magpumilit kayong pumasok sa makipot na pintuan sapagkat sinasabi ko sa inyo marami ang gustong pumasok at di makapapasok. Kapag tumindig na ang may-ari ng bahay at naisara na ang pinto, tatayo kayo sa labas na kumakatok at magsasabing, ‘Panginoon, buksan mo kami.’ Sasagot naman s’ya sa inyo, ‘Hindi ko alam kung taga-saan kayo.’ Kaya sasabihin ninyo, ‘Kami ang kumain at uminom na kasalo mo, at sa aming mga lansangan ka nangaral.’ Ngunit sasagutin n’ya kayo, ‘hindi ko alam kung taga-saan kayo. Lumayo kayo sa akin kayong gumagawa ng masama.’ Naroon ang iyakan at pagngangalit ng mga ngipin pagkakita ninyo kina Abraham, Isaac, Jacob at sa lahat ng Profeta sa kaharian ng Diyos at ipagtatabuyan naman kayo sa labas. At makikisalo naman sa kaharian ng Diyos ang mga darating mula sa silangan, kanluran, timog at hilaga. Oo, may mga huli ngayon na mauuna at may mga una na mahuhuli.

PAGNINILAY:

Minsan ginagamit natin ang ating koneksyon para sa ating pansariling interes o kung ano ang ating makukuha o pakikinabangan.  Gumagamit tayo ng pangalan ng ating kakilala na may mataas na katungkulan upang maabot ang ating ambisyon o makarating ng mabilis sa taas ng tagumpay.  Ang ganitong pakikipag-ugnayan ay hindi tunay at may personal na motibo.  Kaya nga noong tinanong si Hesus kung kaunti lamang ang maliligtas, ang kanyang sagot ay isang paanyaya na dumaan sa isang masikip na pintuan.  Ang malalim na relasyon sa Diyos ay may kasamang pagsunod sa kanyang pinagdaanang hirap patungong kalbaryo.  Ang tunay at malalim na pagkakaibigan ay isang pangako na hindi bibitaw sa hirap at ginhawa.  Ang ating kaligtasan ay pinaghirapan ng Panginoon upang ito ay makamtan para sa atin.  Pero may responsibilidad rin tayo na gawin ang nararapat para sa ating sariling kaligtasan.  Hindi sapat na kakilala natin si Hesus at alam ang kanyang ginagawa.  Nararapat din nating gawin ang kanyang halimbawa at tuparin ang kanyang mga habilin.  Ikaw kapanalig, sapat ba ang iyong lakas na tahakin ang daan ng krus ni Hesus?

- Sr. Mary Anthony Basa, PDDM | Disciples of the Divine Master

MABUTING BALITA | OKTUBRE 26, 2021

Martes sa Ika–30 Linggo sa Karaniwang Panahon

EBANGHELYO: LUCAS 13:18-21

Sinabi ni Jesus: “Ano ang katulad ng Kaharian ng Diyos? Sa ano ito maikukumpara? Tulad ito sa buto ng mustasa na kinuha ng isang tao at itinanim sa kanyang hardin: lumaki, naging parang puno at sumisilong sa kanyang mga sanga ang mga ibon ng Langit.” At sinabi niya uli: “Sa ano ko ikukumpara ang Kaharian ng Diyos? Katulad ito ng lebadura na kinuha ng isang babae at ibinaon sa tatlong takal ng harina hanggang umalsa ang buong masa.”

PAGNINILAY:

Ang Diyos ay patuloy na kumikilos at gumagawa ng kababalaghan sa mga tao o mga bagay na di kapansin-pansin. Halos di natin namamalayan ang Kanyang pagdating, ang Kanyang pagpapahayag…Tulad ng nabanggit sa dalawang talinhaga sa Mabuting Balita: una, ang butil ng mustasa, ito’y isang napakaliit na buto na halos walang halaga. Pero, para sa Diyos ang buto ng mustasa, ay maaring maging isang malaking puno na dadapuan ng mga ibon at magiging silungan ng mga ito. At ikalawa, ang lebadura naman na parang walang saysay, pero ito ang nagpapa-alsa sa masa na nagiging tinapay at nagsisilbing pagkain ng mga nagugutom. Tulad ng buto ng mustasa at ng lebadura, ang isang tao ay maaaring simple at ordinaryo lamang, sa kanyang mga salita at gawa. Pero sa mata ng Diyos siya’y espesyal, dahil bahagi siya ng Kanyang kaharian.  Ganyan ang kaharian ng Diyos, kung saan Siya ang pinagmumulan at Siya rin ang hangganan. Kahit gaano man tayo kaliit at ka-ordinaryo bilang tao, tayong lahat ay may potensyal, na maging bahagi ng kaharian ng Diyos, kung tayo’y mananatili sa Kanyang paggabay at sa Kanyang pagpapatubo sa atin. Tulad ng maliit na buto ng mustasa at tulad ng lebadura na wari ba’y walang halaga, maari tayong gamitin ng Diyos upang maipahayag ang Kanyang kaharian. Magaganap ito, kung tayo’y mananatiling mapagpakumbaba, kung hahayaan natin ang Diyos na mangalaga sa atin, sa Kanyang paghahangad na gawin tayong mga instrumento ng Kanyang pagmamahal, kapayaaaan at kaligahayang dulot ng Kanyang kaharian. Ang katuparan ng kaharian ng Diyos ay makakamtan natin sa kabilang buhay, kung tayo’y namumuhay ayon sa Kanyang kalooban, at ito ay ipinadarama Niya, sa atin ngayon. Kaya hilingin natin sa Diyos na masumpungan natin ang Kanyang kaharian ngayon at magpakailanman.

– Sr. Divinia de Claro, FSP | Daughters of St. Paul

PANALANGIN:

“Ama namin, mapasaamin nawa ang kaharian Mo, sundin ang loob Mo dito sa lupa, para nang sa langit. Amen.”

MABUTING BALITA | OKTUBRE 25, 2021

Lunes sa Ika–30 Linggo sa Karaniwang Panahon

EBANGHELYO: LUCAS 13: 10-17

Nagtuturo si Jesus sa isang sinagoga sa Araw ng Pahinga, at may isang babae roon. Labingwalong taon na s’yang may espiritung nagbibigay-sakit; nagkakandakuba na s’ya at di makatingala. Pagkakita sa kanya ni Jesus, tinawag s’ya nito at sinabi: “Babae, lumaya ka sa iyong sakit”. Ipinatong nito sa kanya ang mga kamay at agad na nakatayo nang matuwid ang babae at nagpuri sa Diyos. Nagalit ang pinuno ng sinagoga dahil nagpagaling si Jesus sa Araw ng Pahinga kaya sinabi n’ya sa mga tao: “May anim na araw para magtrabaho kaya sa mga araw na iyon kayo pumarito para mapagaling, hindi sa Araw ng Pahinga!” “Mga mapagkunwari, hindi ba’t kinakalagan ng bawat isa sa inyo ang kanyang baka o asno mula sa sabsaban nito sa Araw ng Pahinga at inilalabas para painumin? At isang babae naman ang narito na Anak ni Abraham na labinwalong taon nang iginapos ni Satanas. Di ba siya dapat kalagan sa Araw ng Pahinga?” Napahiya ang lahat niyang kalaban pagkarinig sa kanya pero nagalak naman ang mga tao sa lahat ng kahanga-hangang ginagawa ni Jesus.

PAGNINILAY:

Walang pinipiling araw ang paggawa ng mabuti! Nang makita ni Hesus ang babaeng may karamdaman, nadama ni Hesus na gusto nitong gumaling at makalaya.  Kaya naman siya’y pinagaling! Noong siya’y pinagaling, araw iyon ng pamamahinga. Kaya hindi natuwa ang mga namumuno sa Sinagoga at agad binatikos si Hesus. Mga kapanalig, isa lamang ang nais ituro sa atin ng ating Panginoon, na ang kabutihan at awa ng Diyos ay walang pinipiling araw, oras o panahon. Tulad ni Hesus, dapat tayong maging sensitibo sa mga pangangailangan ng ating kapwa. Buksan nawa natin lagi ang ating mata at puso upang makita ito. Sa gitna ng pandemyang ating pinagdadaanan, marami sa ating mga kapatid ang nangangailangan, hindi lamang ng materyal na bagay kundi ng pagmamahal, pang-unawa, pagkalinga  at pag-asa.  Lagi nating isipin na ang pagtulong sa kapwa ay walang limitasyon, dahil ang paggawa ng mabuti ay tugon natin sa dakilang pag-ibig ng Panginoon. Amen.

- Ms. Nancy Reyes, APC | SSP-Makati (Association of Pauline Cooperators)

MABUTING BALITA | OKTUBRE 24, 2021

Ika–30 Linggo sa Karaniwang Panahon | Linggo ng Pandaigdigang Misyon

EBANGHELYO: MARCOS 10:46-52

Dumating si Jesus sa Jerico, at pag-alis n’ya roon kasama ng kanyang mga alagad at ng marami pang tao, may isang bulag na pulubi na nakaupo sa tabing-daan-- si Bartimeo, na anak ni Timeo. Nang marinig niya na si Jesus na taga-Nazaret ang dumaraan, nagsimula siyang sumigaw: “Kaawaan mo ako, Jesus, anak ni David.” Pinagsabihan siyang tumahimik ng mga tao pero lalo lamang niyang nilakasan ang kanyang sigaw: “Panginoon, anak ni David, maawa ka sa akin!” Huminto naman si Jesus at sinabi: “Tawagin n'yo siya.” “Lakasan mo ang iyong loob at tumindig ka. Tinatawag ka nga niya.” Inihagis nito ang kanyang balabal at paluksong lumapit kay Jesus. Kinausap ito ni Jesus at sinabi: “Ano ang gusto mong gawin ko?” “Ginoo, makakita sana ako.” “Sige, ang iyong pananalig ang nagligtas sa iyo.” Agad s’yang nakakita at sumunod s’ya kay Jesus sa daan.

PAGNINILAY:

Ang Mabuting Balita ngayon ay tungkol kay Bartimeo, isang bulag na pulubi, na muling tinanggap ang biyayang makakita sa pamamagitan ng kanyang pananalig at pagtitiwala kay Hesus at sa kapangyarihang mula sa Diyos na sa kanya’y makapagliligtas. Marami sa atin ngayon ang tulad ni Bartimeo na mayroong mga kahinaan o karamdaman. Sa lahat ng ito, kailangan natin ang paghihilom mula kay Kristo. Inaasam natin ang isang pag-asa na higit sa ‘ting inaakala, isang pag-asa ng paghihilom, isang pag-asa ng luwalhati, na higit pa sa panandaliang kalusugan at tagumpay na mayroon ang daigdig na ito. Mga kapanalig, hindi tayo dapat mawalan ng pag-asa – kahit pa sa ating mga kahinaan at kakulangan o karamdaman, maging sa ating espiritwal na pagkabulag. Hindi hadlang ang mga pisikal na kahinaan upang makamtan ang espiritwal na pagkamulat. Tulad ng paghilom ni Hesus sa mga mata ng mga bulag, hinihilom tayo ni Hesus kung saan tayo nasasaktan. Nais ni Hesus na maging bahagi tayo ng Paghahari ng Diyos, kahit pa kailangan niya tayong pagalingin sa ating karamdaman at kahinaan upang makarating dito. Iniaalay niya ang kanyang sarili sa Ama para sa ikapagpapatawad ng ating mga kasalanan, para sa ating kagalingan. Sa ngayon, maaaring bulag tayo at lampa, pero nakikibahagi tayo sa pag-asa at panalangin ng lalaking bulag: “Anak ni David, maawa ka sa akin!” “Hindi ako karapat-dapat magpatuloy sa iyo, ngunit sa isang salita mo lamang ay gagaling na ako.”

- Fr. Cris Robert Cellan, SSP | Society of St Paul

MABUTING BALITA | OKTUBRE 23, 2021

Sabado sa Ika–29 na Linggo sa Karaniwang Panahon

EBANGHELYO: LUCAS 13:1-9

Dumating ang ilang tao na nagbalita kay Jesus ng nangyari sa Templo. Ipinapatay nga ni Pilato ang mga taga-Galilea at nahalo ang kanilang dugo sa mga handog nila. Sinabi ni Jesus sa kanila: “Sa akala ba ninyo’y mas makasalanan ang mga taga-Galileang iyan kaysa lahat ng mga taga-Galilea dahil sila ang nagdusa? Hindi. At sinasabi ko sa inyo: kung hindi kayo magbabago, mapapahamak din kayong lahat. Gayon din naman sa namatay na labingwalong taong nabagsakan ng tore sa Siloe, sa akala ba ninyo’y mas may utang sila sa Diyos kaysa lahat ng naninirahan sa Jerusalem? Sinasabi ko: hindi, ngunit kung hindi kayo magbabago, mapapahamak din kayong lahat.” At sinabi ni Jesus ang talinhagang ito: “May taong may isang puno ng igos sa kanyang ubasan. At pumunta s’ya upang maghanap ng mga bunga subalit wala s’yang nakita. Kaya sinabi n’ya sa nag-aalaga ng ubasan: ‘Tatlong taon na akong pumaparito sa paghahanap ng mga bunga sa punong-igos na iyan at wala akong nakita. Putulin mo ‘yan at pampasikip lamang sa lupa.’ Ngunit sumagot sa kanya ang tauhan: ‘Ginoo, pabayaan mo na s’ya ngayong taon. Maghuhukay ako sa paligid nito at lalagyan ng pataba. Baka sakaling mamunga s’ya, ngunit kung hindi’y saka mo s’ya putulin.’”

PAGNINILAY:

Ipinahayag ni Hesus sa ating Mabuting Balita ang kahalagahan ng pagsisisi at pagtalikod sa kasalanan upang makaiwas sa kapahamakan. Sinabi niya ito hindi upang manakot, kundi bigyang-diin ang kahalagahan ng pagbabalik loob. Ipinakita rin kung gaano katiyaga at mapagpasensiya ang Diyos na bigyan tayo ng pagkakataon upang mamunga tulad ng puno ng igos. Mga kapanalig, bawat isa sa atin ay may regalo o talentong tinanggap mula sa Diyos, na kailangan nating gamitin at palaguin upang tayo ay maging regalo rin sa iba. Kaya lang, madalas na hindi natin napapalago ang mga regalong ito, marahil dahil na rin sa naging kontento na tayo sa anumang maliit nating nagagawa. Dapat po nating alalahanin na ang kasalanan ay hindi lamang tungkol sa paggawa ng mali, kundi nakaugnay din ito sa hindi paggawa ng mabuti o ang tinatawag na ‘sin of omission. Binigyan tayo lahat ng Diyos ng kakayahan upang isakatuparan ang ating misyon, gamit ang mga talentong bigay sa atin. Dati rin po akong nagkaroon ng mababang pagtingin sa sarili, dahil madalas kong ikumpara ang sarili ko sa iba, kaya hindi ko na sinubukang alamin kung ano ang kaya ko pang gawin. Pero, sa kabutihan ng Diyos ay nagpadala Siya ng taong naniwala sa aking kakayahan, at binigyan ako ng pagkakataon upang higit kong makilala ang aking sarili. Manalangin tayo na mapalago pa natin ang mga talentong bigay sa atin at patuloy na magbalik-loob sa Diyos. Amen.

– Ms. Edna Cadsawan, IHF | Institute of the Holy Family

ST. JOHN OF CAPISTRANO  |  PATRON OF THE SOLDIERS

Feast Day: OCTOBER  23

Our inspiration today was popularly known as the "Soldier Saint." He lives the virtues of honesty, integrity, obedience and self-denial.

Maybe, we will not be able to guess immediately why he was given that name because he was a successful lawyer and is now the patron saint of jurists and legal experts.

He is none other than St. John of Capistrano. Capistrano is a small town in Abruzzo, in the kingdom of Naples. Italy, during that time was divided into small kingdoms, so it was under a king who had a great influence in the life of our saint.

St. John was born on June 24, 1386 in Capistrano, son of an influential German Knight. He studied law and being a good lawyer, the king of Naples appointed him governor of Perugia. He married a wealthy lady, but their marriage was never consummated. When war broke out between Perugia and Malatesta, a neighboring kingdom, John was betrayed and was imprisoned. While in prison, he dreamed that St. Francis of Assisi was inviting him to become a Franciscan. Upon his release from prison, he obtained dispensation from his marriage and was admitted to study for the priesthood. Coincidentally, his professor in theology was the future St. Bernardine of Siena.

After his Ordination, St. John travelled throughout Italy, Austria, Hungary, Poland, Russia and Bohemia to preach and to help St. Bernardine to reform the Franciscan Order for a more rigorous and strict discipline.

They also propagated the devotion to the Holy Names of Jesus and Mary for which they were accused of heresy. But they were soon acquitted by a commission of Cardinals who approved the devotion.

St. John was chosen by God to deliver Europe from the Ottoman Empire or the Islam. When the Turks came to invade Rome and Vienna, Pope Callistus III commissioned St. John to lead a Crusade to fight them. He gathered 70,000 Christians and marched ahead of them for the encounter. Through their valor and with the help of God they won, and 120,000 Turks were defeated that day. Many were killed and the others fled. Mohammed who was wounded, gave up his plan to conquer the Christians. From this battle, St. John got the name "Soldier Saint.” He died on October 23, 1456 and was canonized in 1690.

Lord, we pray that through the intercession of St. John of Capistrano, jurists and lawyers may follow his examples of honesty and integrity in giving impartial judgement.

How honest am I in my relationships, actions, words and thoughts?

JOSEPH, A CREATIVELY COURAGEOUS FATHER  | WORD AND SONGS

“The Gospel does not tell us how long Mary, Joseph and the child remained in Egypt. Yet they certainly needed to eat, to find a home and employment. It does not take much imagination to fill in those details. The Holy Family had to face concrete problems like every other family, like so many [of our families] right now. […] God trusted Joseph, as did Mary, who found in him someone who would not only save her life, but would always provide for her and her child. What are our inner dispositions in the face of problems? Pope Francis writes that “in the face of difficulty, we have two basic options: we can either give up and walk away, or somehow engage with it.” In a time and place when the world walks away, we are all called to engage—to be true to our engagements. We are challenged to keep the faith, believing that God has a way of transforming our difficulties into graces for ourselves and for others. Joseph is set as an example before us of a person who courageously and willingly move out of himself, giving up his own will for God’s, and   lovingly and creatively providing for his wife Mary and his son Jesus. This is the same invitation given to all of us.

Scriptwriter: Sr. Melba Grace Lobaton, fsp

MABUTING BALITA | OKTUBRE 22, 2021

Biyernes sa Ika–29 na Linggo sa Karaniwang Panahon

EBANGHELYO: LUCAS 12:54-59

Sinabi ni Jesus sa mga tao: “Kapag nakita ninyong tumataas ang ulap sa kanluran, kaagad ninyong sinasabi, ‘Uulan,’ at ganoon nga ang nangyayari. At kung umiihip naman ang hangin galing timog, sinasabi ninyong ‘Magiging napakainit,’ at nangyayari nga ito. Mga mapagkunwari! Nabibigyan ninyo ng kahulugan ang anyo ng lupa at Langit ngunit bakit hindi ninyo sinusuri kung ano ang panahong ito? At bakit hindi kayo mismo ang makapagpasya kung ano ang tama? Sa pagpunta mo sa maykapangyarihan kasama ng kalaban mo, sikapin mong makipag-areglo sa kanya sa daan; baka iharap ka sa hukom at ibigay ka naman ng hukom sa pulis para ipakulong sa bilangguan. Sinasabi ko sa iyo: hindi ka makalalabas doon hanggang hindi mo nababayaran ang kahuli-hulihang sentimo.”

PAGNINILAY:

Ano ang iyong mararamdaman kung masabihan kang mapagpaimbabaw, nagmamarunong, mandaraya o fake?  Marahil magagalit ka, aatras sa kausap o magsusuri ng sarili. Sa Mabuting Balita ngayon sinabi ng Panginoon sa mga tao, mga mapagpaimbabaw! Marunong kayong bumasa ng palatandaan sa lupa’t sa langit, bakit hindi ninyo mabasa ang mga tanda ng kasalukuyang panahon? Mga kapanalig, ang Panginoong Hesus ang buhay na tanda ng kasalukuyang panahon. Minsan sinabi ng aking kaibigan, araw-araw siyang nagbabasa ng bibliya kahit hindi masyadong maintindihan. Pero, pagkatapos nyang magbasa, mapayapa ang kanyang kalooban. Totoong ang bibliya ay Salita ng Diyos, palatandaan ng pagmamahal, tinig ng isang pastol. Makakatagpo rin natin ang Diyos sa mga mabubuting gawa ng mga tao, sa ating mga tradisyon at mga sakramento na Kanyang itinatag upang tumibay tayo sa ating pananampalataya. Ask ni God ang taos puso nating paglapit sa Kanya, tagos sa puso na pagnanais na itama ang mga nakasanayang mga maling gawain at makasunod sa Kanyang mga utos.  Nawa lagi nating tandaan: si Hesus ang daan, katotohanan at buhay. Hayaan nyong tapusin ko ang aking pagninilay sa bahaging ito ng Salmo 118: “Kay buti mo Panginoon! Kay ganda ng iyong loob, sa akin ay ituro mo ang bigay mong mga utos. Aliwin mo sana ako niyang pag-ibig mong lubos katulad ng binitiwang pangako sa iyong lingkod.” Amen. Ms. Emy Tuazon, IOLA | Institute of Our Lady of Annunciation