MABUTING BALITA | NOBYEMBRE 6, 2021 

Sabado sa Ika-31 Linggo ng Taon

EBANGHELYO: LUCAS 16:9-15

Sinabi ni Hesus sa kanyang mga alagad: “Sinasabi ko sa inyo: gamitin n’yo ang di matuwid na Perang-diyos para magkaroon ng mga kaibigan para sa pagkaubos nito’y tanggapin naman nila kayo sa walang hanggang mga tahanan. Ang mapagkakatiwalaan sa maliliit na bagay ay mapagkakatiwalaan din sa malalaki, at ang di mapagkakatiwalaan sa maliliit ay hindi rin mapagkakatiwalaan sa malalaki. Kung hindi kayo mapagkatiwalaan sa di matuwid na pera, sino ang magtitiwala sa inyo ng tunay na kayamanan? Kung hindi kayo mapagkakatiwalaan sa mga bagay na labas sa inyo, sino pa kaya ang magbibigay sa inyo ng atin na mismo? Walang katulong na makapagsisilbi sa dalawang amo; siguradong kamumuhian niya ang isa at mamahalin naman ang isa pa o magiging matapat sa isa at mapapabayaan ang ikalawa. Hindi kayo makapaglilingkod sa Diyos at sa pera.” Narinig ng mga Pariseo ang lahat ng ito. Sakim sila kaya pinagtatawanan nila siya. At sinabi ni Hesus sa kanila: “Ginagawa n’yo ang lahat para magmukhang mabuti sa paningin ng mga tao pero alam ng Diyos ang inyong mga puso. At kasuklam-suklam sa paningin ng Diyos ang mataas sa mga tao.”

PAGNINILAY:

Marami sa atin ang may mga ipon sa bangko, may sariling bahay at mga lupain, insurance, investments at kahit memorial plans na nakahanda upang tayo'y magkaroon ng kaginhawahan, pati na ang ating mga mahal sa buhay. Ito ay nagpapakita ng bunga ng ating araw-araw na pagsisikap sa trabaho. Mga kapanalig, ang mensahe ng ating pagbasa ngayong araw, ay nag-aanyaya sa atin na maging masinop sa mga bagay ng mundong ito. Pinapaalala din ni Hesus na tayo’y pawang mga katiwala lamang ng kanyang mga biyaya.  Kaya nararapat lamang na ibahagi natin ito sa iba, lalo na sa mga nasa laylayan ng ating lipunan. Tinatawagan tayong maging daluyan ng Kanyang mga biyaya sa mga nangangailangan nating mga kapatid, lalo na sa panahong ito ng pandemya. Mahirap itong sitwasyong ating kinahaharap, kung kaya tinatawagan tayo upang tumindig at maging biyaya sa iba. Kapanalig, nakagawa ka ba ng kabutihan sa iyong kapwa ngayong araw? Kung hindi pa, ito ang tamang panahon upang isagawa ito, Amen.

- Mr. Alex Pura, ISGA | Institute of St. Gabriel the Archangel

Praying for the Faithful Departed for the Month of November | Word and Songs

with Sr Lines Salazar, fsp

MABUTING BALITA | NOBYEMBRE 5, 2021

Biyernes sa Ika-31 Linggo ng Taon

EBANGHELYO: LUCAS 16:1-8

Sinasabi ni Hesus sa kanyang mga alagad: “May katiwala ang isang mayaman, at isinumbong sa kanya na nilulustay ng katiwala ang kanyang kayamanan. Ipinatawag niya ito at sinabi sa kanya: ‘Ano itong naririnig ko tungkol sa iyo? Magsulit ka sa akin ng iyong pangangasiwa dahil hindi ka na makapangangasiwa.’ At inisip ng katiwala: ‘Tatanggalin ako ngayon sa pangangasiwa ng aking panginoon. Ano ang gagawain ko? Kulang ako ng lakas para magbungkal ng lupa, nahihiya naman akong magpalimos. Ah, alam ko na ang gagawin ko. At pagkatanggal sa akin sa pangangasiwa, may mga magpapatuloy sa akin sa kanilang mga bahay.’ Kaya tinawag niyang isa-isa ang mga may –utang sa kanyang panginoon. Tinanong niya ang una: ‘Magkano ang utang mo sa aking panginoon?’ Sumagot ito: ‘Sandaang galon ng langis.’ Sinabi ng katiwala: ‘Narito ang resibo mo, maupo ka agad at isulat mo: Limampu.’ Tinanong naman niya ang ikalawa: ‘At ikaw, magkano ang utang mo?’ Sumagot siya: ‘Sanlibong takal ng trigo.’ Sinabi ng katiwala: ‘Narito ang iyong resibo at isulat mo: ‘Walundaan.’ Hinangaan ng panginoon ang matalinong paggawa ng di matuwid na katiwala. Mas matalino nga ang mga taong makamundo sa pakikitungo sa mga gaya nila kaysa mga tao ng liwanag.”

PAGNINILAY:

Karaniwang ang isang taong may malaking negosyo ay kumukuha ng katiwala. Karaniwan ding ang isang katiwala ay yumayaman. Bakit? Naglalagay siya ng malaking patubo sa mga pautang ng kanyang amo pero ang tubo ay ibinubulsa niya. Malimit hindi ito alam ng kanyang amo. Ganito ang ginagawa ng katiwala sa ating Mabuting Balita ngayon. Pinapatubuan niya ng malaki ang mga utang sa kanyang amo at ang tubo ay napupunta sa kanya.  Natunugan ito ng kanyang amo na sa tingin ko ay maka-Diyos, maka-tao at gusto ng makatarungang pakikipagkalakalan. Sinabi niya sa kanyang katiwala na kailangan niyang magsulit ng kanyang pamamahala. Kaya lihim na kinausap ng katiwala ang mga may utang sa kanyang amo at ipinabago ang presyong nakasulat sa kanilang mga listahan para lumabas na wala siyang ganansiyang nakukuha mula sa mga utang na ito. Sa wakas, pinuri ng amo ang kanyang katiwala dahil hindi niya pinatubuan ang utang ng mga tao. Kumukuha lamang siya ng sapat na bayad. Ang ginawa niyang ito ay isang mabuting pagpapasya o prudence. Mga kapanalig, hindi tayo tinuturuan ng pagbasang ito na mandaya. Hindi kailanman maituturing na tama ang pandaraya.  Pinuri ng kanyang amo ang katiwala dahil sa katalinuhan niyang gumawa ng paraan sa oras ng kagipitan.  Paanyaya ito sa atin na gamitin ang ating talino sa paggawa ng kabutihan upang matamo natin ang buhay na walang hanggan.

- Sr. Narci Peñaredonda, SJBP | Sisters of Jesus the Good Shepherd / Pastorelle

MABUTING BALITA | NOBYEMBRE 4, 2021 

Huwebes sa Ika-31 Linggo ng Taon | San Carlos Borromeo, obispo

EBANGHELYO: LUCAS 15:1-10

Lumapit kay Hesus ang lahat ng kolektor ng buwis at mga makasalanan para makinig. Kaya nagbulung-bulungan ang mga Pariseo at mga guro ng Batas: “Tinatanggap niya ang mga makasalanan at nakikisalo sa kanila.” Kaya sinabi ni Hesus ang talinhagang ito sa kanila: “Kung may sandaang tupa ang isa sa inyo at mawala ang isa sa mga ito, hindi baga niya iiwan ang siyamnapu’t siyam sa ilang para hanapin ang nawawala hanggang matagpuan niya ito? At pag natagpuan ito’y masaya niya itong pinapasan sa balikat, at pagdating sa bahay ay tatawagin niya ang mga kaibigan at mga kapitbahay at sasabihin sa kanila: ‘Matuwa kayong kasama ko sapagkat natagpuan ko na ang nawawala kong tupa.’ Sinasabi ko sa inyo: magkakaroon din ng higit na kagalakan sa Langit para sa isang makasalanang nagsisisi kaysa siyamnapu’t siyam na matuwid na di nangangailangan ng pagsisisi. Kung may sampung baryang pilak ang isang babae at nawala ang isa sa mga ito, hindi ba siya magsisindi ng ilaw, magwawalis sa bahay at hahanaping mabuti hanggang matagpuan ito? At pagkakita rito’y tatawagin ang mga kaibigang babae at mga kapitbahay: ‘Matuwa kayong kasama ko sapagkat natagpuan ko ang nawawala kong baryang pilak.’ Sinasabi ko sa inyo na ganito rin sa mga anghel ng Diyos, magkakaroon ng kagalakan para sa isang makasalanang nagsisisi.”

PAGNINILAY:

Ang parable of the lost sheep and the lost coin ay isa sa mga paborito nating kwento na galing sa Mabuting Balita ni San Lukas. Nakaka-relate kasi tayo dito dahil sa maraming pagkakataon sa ating buhay na para din tayong nawawala o kaya nama’y wala tayong halaga sa ibang tao. Kung nasa ganito kang karanasan ngayon kapanalig, para sa iyo ang Mabuting balitang ito.  Ipinapakita ng Mabuting Balita na lahat tayo’y mahalaga sa Diyos. Kung ang feeling mo ay nawawala ka, o nag-iisa ka o kaya’y binabalewala ka ng iba, merong Diyos na concerned sayo at naghahanap sayo. Kaya nga kahit ang kanyang nag-iisang anak ay ibinigay niya upang ang tao ay hindi mapahamak, kundi magkaroon ng buhay kasama niya.  Sabi nga ni San Pablo: walang anuman ang makapaghihiwalay sa atin sa kalinga at pag-ibig ng Diyos. Ayaw ng Diyos na mawala ang kahit isa sa atin. Sa katunayan, sobrang saya ng Diyos at ng kalangitan kung may isang nawawala at ito’y natagpuan. Sinasabi ni Hesus na ang Diyos ay Diyos ng awa at handang magpatawad sa mga bumabalik sa kanya. Mas niloloob ng Diyos na bumalik sa kanya ang mga nawawala o mga makasalanan kaysa ang mga ito ay tuluyan nang malayo at mapahamak. Nasasalamin sa reaksyon ng mga pariseo at mga eskriba ang madalas na saloobin ng tao sa mga taong “nawawala.” Di tulad ng Diyos na nagbubukas ng pinto ng pagkalinga at pagpapatawad, ang tao ay marahas sa paghuhusga at sarado sa pang-unawa. Kaya nga ang mensahe ng mabuting balita ay para sa lahat: Maging mga tunay na anak nawa tayo ng Diyos, nagpapatawad at kumakalinga lalung-lalo na sa mga nawawala at walang halaga sa mata ng lipunan. Sr. Nimfa Ebora, PDDM | Disciples of the Divine Master

MABUTING BALITA  | NOBYEMBRE 3, 2021 

Miyerkules sa Ika-31 Linggo ng Taon

EBANGHELYO: LUCAS 14:25-33

Habang naglalakad ang napakaraming tao na kasama ni Hesus, humarap siya sa kanila at sinabi: “Kung may dumating sa akin na di nagtatakwil sa pag-ibig sa kanyang ama at ina, at asawa at mga anak, at mga kapatid na lalaki at babae, at maging sa kanyang sarili, hindi siya puwedeng maging alagad ko. At hindi puwedeng maging alagad ko ang di nagpapasan ng kanyang krus sa pagsunod sa akin. “At paano kung may magbalak magtayo ng silungan ng bantay sa bukid? Hindi ba’t uupo muna siya at tatantyahin ang gastos para malaman kung may sapat siya para maipatapos iyon? Sapagkat kung mailagay niya ang pundasyon at hindi naman niya iyon maipatapos, pagtatawanan lamang siya ng lahat: ‘Hayan ang nagsimulang magtayo at hindi na maipatapos.’ At paano kung may haring nakikipagharap sa ibang hari? Hindi ba’t uupo muna siya para mag-isip kung kaya niya at ng sampung libong kasama niya na harapin ang dumarating na may dalawampung libo? At kung hindi naman, malayo pa ang isa ay magpapadala na siya ng mga sugo para makipag-areglo. Gayon din sa inyo. Hindi puwedeng maging alagad ko ang di tumatalikod sa lahat sa kanya.”

PAGNINILAY:

Narinig natin sa Mabuting Balita kung paano si Hesus maglakbay. Maraming nais na sumama sa Kanya. Marahil dahil alam nila na si Hesus ang tanging makatutugon sa halos lahat nilang pangangailangan sa araw-araw na pamumuhay. May isang mag-anak na binubuo ng lima katao, at nakatira sila dito sa ating bansa. Noong 2018, nag “cross-country tour o Big Drive” sila sa United States of America, ng isang buwan bilang “holiday treat” sa kanilang tatlong anak. Bago nila simulan ang kanilang “cross-country tour,” inuuna muna nilang puntahan ang simbahan para manalangin. Sa bawa’t State na kanilang narating, binigyang-halaga nila ang “historical background ng mga landmarks,” upang maipamahagi nila sa social media ang kaalaman na kanilang mga natutunan. Mga kapanalig, ang pagsunod po kay Hesus ay nangangailangan ng ibayong sakrispisyo, pagtalikod sa anumang sagabal, at lubusang pag-unawa sa ating desisyon, kasama ang taimtim na panalangin at lubos na pagtitiwala sa ating Diyos. Sa ating paglalakbay, ano ba ang mahalaga na makapagbibigay luwalhati sa Panginoon at makakatulong sa ating kapwa? Sr. Susan Peñaflor, FSP | Daughters of St. Paul

PANALANGIN:

O Hesus, tulungan nyo po kami na kumalinga sa aming kapwa, lalo na ngayong panahon ng pandemya. San Martin de Porres, ipanalangin mo kami. Amen.

MABUTING BALITA | NOBYEMBRE 2, 2021

Paggunita ng Lahat ng Pumanaw ng Kristiyano

EBANGHELYO: MATEO 25:31-46

Sinabi ni Hesus sa kanyang mga alagad: “Pagdating ng Anak ng Tao sa kanyang Kaluwalhatian kasama ang lahat niyang mga anghel, uupo siya sa maluwalhati niyang trono. Dadalhin sa harap niya ang lahat ng bansa at parang isang pastol na inihihiwalay niya ang mga tupa sa mga kambing, gayundin niya paghihiwalayin ang mga tao. Ilalagay niya ang mga tupa sa kanan niya at ang mga kambing sa kaliwa. Sasabihin ng Hari sa mga nasa kanan niya: 'Halikayo, pinagpala ng aking Ama! Manahin ninyo ang kahariang inihanda para sa inyo mula pa sa simula ng daigdig. Sapagkat nagugutom ako at inyong pinakain, nauhaw ako at inyong pinainom. Naging dayuhan ako at pinatuloy ninyo ako. Nang ako’y hubad, dinamitan ninyo ako. Nang may sakit ako, binisita ninyo ako. Nang ako'y nasa bilangguan, dinalaw ninyo ako.' At itatanong sa kanya ng mabubuti; 'Panginoon, kailan ka namin nakitang nagugutom at pinakain, nauuhaw at pinainom, isang dayuhan at pinatuloy, at walang suot at dinamitan? Kailan ka namin nakitang maysakit o nasa bilangguan at nilapitan?’ Sasagutin sila ng Hari: ‘Talagang sinasabi ko sa inyo: anuman ang gawin ninyo sa isa sa maliliit na ito na mga kapatid ko, sa akin ninyo ginawa.' Pagkatapos ay sasabihin naman niya sa mga nasa kaliwa niya: 'Mga isinumpa, lumayas kayo sa harap ko papunta sa apoy na walang katapusan na inihanda para sa diyablo at sa mga anghel nito. Sapagkat nagutom ako at di ninyo ako binigyan ng makakain, nauhaw at di ninyo ako pinainom, naging dayuhan ako at di ninyo pinatuloy, maysakit at nasa bilangguan at di ninyo binisita.' Kaya itatanong din nila: 'Panginoon, kailan ka namin nakitang nagugutom, nauuhaw, dayuhan, hubad, may sakit o nakabilanggo at di namin pinaglingkuran?’ Sasagutin sila ng Hari: 'Talagang sinasabi ko sa inyo, anuman ang di ninyo ginawa sa isa sa maliliit na ito, hindi ninyo ginawa sa akin.' At pupunta ang mga ito sa walang hanggang parusa, ngunit sa walang hanggang buhay naman ang mga makatarungan.”

PAGNINILAY:

Ginugunita natin ngayon ang Araw ng mga Kaluluwa. Bagamat kaugnay nito ang pagdiriwang ng Undas o Araw ng Lahat ng mga Santo (Todos los Santos), madalas mayroon tayong pagkalito hinggil sa dalawang araw na ito, kung kaya’t mas dumadalaw tayo sa sementeryo sa unang araw ng Nobyembre kaysa sa ikalawang araw. Ano ang kanilang pagkakatulad? Ano ang kanilang pagkakaiba? Magkatulad sila dahil pareho nilang ginugunita ang mga taong pumanaw na, mga taong yumao na. Magkaiba naman sila dahil inaalala natin sa Undas ‘yung mga taong pumanaw na nasa langit na, silang mga namamayapa na sa piling ng Diyos sa langit—tinatawag natin silang mga Santo o Banal; sa kabilang banda, inaalala natin sa Araw ng mga Kaluluwa ‘yung mga taong pumanaw na nasa Purgatoryo pa—sila ang mga taong sumakabilang-buhay sa grasya ng Diyos pero nangangailangan pa ng ibayong pagpapadalisay o paglilinis upang sa wakas ay makapasok rin sa tahanan ng Ama. Matutulungan natin sila sa pamamagitan ng ating mga panalangin at pag-alala, sa pag-asang balang araw ay magkakasama-sama tayong lahat sa langit kapiling ng Diyos. Doon ay wala nang pagdurusa at kamatayan. Hindi na tayo mawawalay kailanman sa isa’t isa kundi magiging isang malaking pamilya, isang komunidad nang walang hanggang pag-ibig. Doon tayo lahat hahantong, kung dito pa lamang sa lupa ay mamahalin na natin ang bawat isa. Tulad nga ng sinabi sa Mabuting Balita natin sa araw na ito mula kay San Mateo: Anuman ang gawin natin sa ating kapwa dito sa daigdig, lalo na sa mga aba, ay siyang ginawa na rin natin sa Diyos, at ito’y bubukal hanggang sa buhay na walang hanggan. - Fr. Khris Emmanuel Llacer, SSP | Society of St. Paul

MABUTING BALITA | NOBYEMBRE 1, 2021 

 Dakilang Kapistahan ng Lahat ng mga Banal

Nang makita ni Jesus ang makapal na tao, umahon siya sa bundok. Naupo siya roon at lumapit sa kanya ang mga alagad. At nagsimula siyang magturo sa kanila: “Mapapalad ang may mga diwa ng dukha sapagkat sa kanila ang Kaharian ng Langit. Mapapalad ang mga di marahas sapagkat mapapasakanila ang lupain. Mapapalad ang mga nagugutom at nauuhaw sa katarungan sapagkat bubusugin sila. Mapapalad ang mga maawain sapagkat kaaawan sila. Mapapalad ang may busilak na puso sapagkat makikita nila ang Diyos. Mapapalad ang mga nagpupunyagi para sa kapayapaan sapagkat tatawagin silang mga anak ng Diyos. Mapapalad ang mga pinag-uusig dahil sa katarungan sapagkat kanila ang kaharian ng langit. Mapapalad kayo kung iniinsulto kayo at pinag-uusig at sinisiraang-puri dahil sa akin. Magsaya kayo at magalak sapagkat malaki ang gantimpalang nasa Diyos para sa inyo.

PAGNINILAY:

Ang Mabuting Balitang narinig natin ay nagpapahayag ng mga kabalintunaan ng buhay na mauunawaan lamang natin sa mata ng pananampalataya. Sinasalamin nito ang nangyari sa Panginoong Hesus na dumanas ng katakot-takot na paghihirap at pagpapakasakit, at sa huli’y humantong pa sa kanyang kamatayan, pero nabuhay na mag-uli, umakyat sa langit at ngayo’y kapiling na ng Diyos Ama sa buhay na walang hanggan. Ito din ang naging karanasan ng kalipunan ng mga banal – ng mga santo at santa, na pinararangalan natin ngayon. Marami sa kanila ay nagbuwis ng buhay alang-alang sa matatag nilang paninindigan sa pananampalataya; marami sa kanila ay matapat na namuhay sa diwa ng kabalintunaang pinapahayag ng Mapapalad sa Mabuting Balita; marami sa kanila ay kakilala natin – ang ating mga lolo at lola, mga magulang, kapatid at kamag-anak na hindi man deneklarang santo o santa, pero namuhay nang matuwid, nagmahal sa Diyos at sa kapwa sa abot ng kanilang makakaya at naging buhay na saksi ng paghahari ng Diyos sa kasalukuyang mundo. Kaya ngayo’y tinatamasa na nila ang buhay na walang hanggan kasama ng Diyos at mga anghel sa langit. Mga kapanalig, nilikha tayo ng Diyos na likas na mabuti. Nilikha tayo ng Diyos na Kanyang kawangis. Kaya may misyon tayong magpakabuti at mamuhay sa kabanalan habang tayo’y nabubuhay. Kaya sa gitna ng mga kasamaang nangyayari sa ating paligid, sa gitna ng pag-aaway-away, pagpapalitan ng mga hate messages sa social media na may kinalaman sa nalalapit na eleksyon; inaanyayahan tayong papanaigin ang likas na kabutihang nakatanim sa ating puso. Napakaikli ng buhay para mamuhay tayo sa galit at pakikipag-away dahil lamang magka-kontra partido tayo. It’s not even worth it, na masira ang pagkakaibigan at samahan sa pamilya dahil hindi kayo magkakulay ng partidong sinusuportahan. Ang isipin natin sa panahong ito ng sobrang paghihirap dulot ng pandemya, ay ang sama-sama nating pagbangon sa kadilimang ating kinasadlakan.... isipin natin ang susunod na henerasyon, na siyang labis na maaapektuhan ng mga maling desisyong ginagawa natin ngayon. Mamamatay tayong lahat at lilipas sa mundong ito sa panahong itinakda ng Diyos... pero ano bang klaseng bansa ang iiwanan natin sa susunod na salinlahi? Maipagmamalaki kaya nila tayo dahil pinanindigan natin kung ano ang tama, mabuti at kalugod-lugod sa Diyos, at ipinaglaban natin ang kanilang kinabukasan hanggang sa huling sandali ng ating buhay? O sisisihin nila tayo dahil sa mga problemang ipapamana natin sa kanila kapag tayo’y pumanaw na sa mundong ito? Pag-isipan natin ito mga kapanalig…

-  Sr. Lines Salazar, fsp | Daughters of St. Paul

MABUTING BALITA | OKTUBRE 31, 2021

Ika–31 Linggo sa Karaniwang Panahon

EBANGHELYO: MARCOS 12:28-34

May isang guro ng Batas na nakarinig sa pagtatalo ni Jesus at ng mga Sadduseo. Nang mapansin niyang tama ang sagot ni Jesus sa mga Sadduseo, lumapit siya at nagtanong kay Jesus: “Ano ang una sa lahat ng utos?” Sumagot si Jesus: “Ito ang una: ‘Makinig nawa, O Israel! Iisa lang ang Panginoong nating Diyos. At mamahalin mo ang Panginoon mong Diyos nang buo mong puso, nang buo mong kaluluwa, nang buo mong pag-iisip at nang buo mong lakas.’ At pangalawa naman ito: Mamahalin mo ang iyong kapwa gaya ng iyong sarili. Wala nang utos na mas mahalaga pa sa mga ito.” Kaya sinabi ng guro ng batas: “Mabuti, Guro, totoo ang sinabi mong isa Siya at wala na maliban sa Kanya. At nang mahalin Siya ng buong puso, nang buong kaluluwa at nang buong lakas, at mahalin din ang kapwa gaya ng sarili ay mas mahalaga kaysa mga sinunog na handog at mga alay.” Nakita ni Jesus na tama ang sinabi nito kaya sinabi niya: “Hindi ka malayo sa Kaharian ng Diyos.” At wala nang nangahas na magtanong sa kanya.

PAGNINILAY:

Love in action!  Pag-ibig na kumikilos! Ito ang mensaheng nais ituro ni Hesus sa atin sa Mabuting Balita ngayon: “Mahalin mo ang iyong Panginoon at Diyos ng buo mong puso, ng buong kaluluwa, at ng buong lakas, at ng buo mong isip” (Mk 12:30) “At ang iyong kapwa” (Mk 12: 28-34). Ang pag-ibig na iminumungkahi ni Kristo dito ay isang mas tuwirang pagkilos ng kalooban na handang isuko ang pansariling iteres para sa pangangailangan at kapakanan ng iba. Ito ang klase ng pag-ibig na malaya sa pagtatantiya ng anumang kalalabasang resulta o benepisyong pansarili. Hindi ito naghihintay ng kapalit. Si Kristo mismo ang nagpakita ng ganitong anyo ng pag-ibig sa kanyang mga ginawa. Lalo’t higit noong siya’y nakapako sa Krus at nasa bingit ng kamatayan, nagawa pa niyang ipagdasal ang mga taong nagpapatay sa kanya. Mga kapanalig, napaka-mahal at mahirap ang hinihingi sa atin ng Kristiyanong pag-ibig. Sadyang mahirap unahin ang iba higit sa iyong sarili. Pero, binibigyan tayo ng pagkakataong tumugon sa panawagan ito araw-araw. Lahat tayo ay makahahanap ng dahilan kung bakit may mga taong hindi kaarapat-dapat sa ating pagmamahal. Sa ganitong pagkakataon, dapat nating alalahanin na tayo din ay hindi karapat-dapat sa pag-ibig ng Diyos, pero minahal pa rin niya tayo. Tulungan nawa tayo ng Diyos na laging piliing mahalin Siya at ganap na paglingkuran ang ating kapwa kahit ano pa ang halaga nito.

- Fr. Cris Robert Cellan, SSP | Society of St Paul

MABUTING BALITA | OKTUBRE 30, 2021

Sabado sa Ika–30 na Linggo sa Karaniwang Panahon

EBANGHELYO: LUCAS 14:1, 7-11

Isang Araw ng Pahinga, pumasok si Jesus sa bahay ng isang pinuno ng mga Pariseo para kumain, at minanmanan naman nila siya. May talinghaga siyang sinabi nang mapuna niyang pinipili ng mga inimbita ang mga unang puwesto: “Kung anyayahan ka sa isang kasalan, huwag kang lumagay sa unang puwesto. Baka may kinumbidang mas importante kaysa sa iyo, at darating ang kumumbida sa inyong dalawa para sabihing ‘ibigay mo sa kanya ang puwestong ito.’ Kaya mapapahiya ka’t pupunta sa huling puwesto. Sa halip, kung anyayahan ka, sa huling puwesto ka pumunta sapagkat pagdating ng kumumbida sa iyo, sasabihin niya sa iyo: ‘Kaibigan, lumapit ka pa.’ Kaya mapararangalan ka sa harap ng lahat ng inanyayahan. Sapagkat ibababa ang lahat ng nagpapakataas at itataas ang nagpapakababa.” Sinabi ni Jesus sa puno ng mga Pariseo na nag-anyaya sa kanya: “Kung maghahanda ka ng tanghalian o hapunan, huwag mga kaibigan mo o mga kapatid mo o mga kamag-anak mo o mayayamang kapitbahay ang iyong kumbidahin, baka kumbidahin ka rin nila at susuklian ka. Kung maghahanda ka, mga dukha, mga bale-wala, mga pilay at mga bulag ang kumbidahin mo at magiging mapalad ka dahil hindi ka nila masusuklian ngunit sa pagkabuhay ng mga mabuti ka susuklian.

PAGNINILAY:

Sa ibabang linya ng imbitasyon nakasulat RSVP - Please Respond or reply for confirmation to an invitation. Naisip mo ba kung saan ang iyong upuan sa pagtitipon na iyon? Paano nga ba tayo dadalo sa piging ng Panginoon?  Sa Mabuting Balita ngayon ipinaalala ng Panginoong Hesus, na kapag inanyayahan ka, doon ka maupo sa pinaka-abang upuan, dahil paglapit ng nag-anyaya sa iyo ay kanyang sasabihin, kaibigan dini ka sa kabisera. Sabi pa ni Mother Teresa ng Calcuta, Humility is the mother of all virtues; purity, charity and obedience. It is in being humble that our love becomes real, devoted and ardent.  BEC Coordinator ako noon sa aming Parokya, at marami akong natutunan sa mga aral ng buhay mula sa grupo. Naranasan ko rin harapin ang mga challenges ng pagiging servant leader.  Hindi madali, pero nais kong makilala ang Panginoon at sundin ang mga tungkuling ibinigay Nya sa akin. Sa paglipas ng mga panahon, ako ngayon ay Professed Member ng IOLA, patuloy na dumudulog sa piging ng Panginoon. Nawa sa tulong panalangin ng Mahal na Birheng Maria, maisabuhay ko ang kanyang mga halimbawa. Amen. Ms. Emy Tuazon, IOLA | Institute of Our Lady of Annunciation

JOSEPH, A FATHER IN THE SHADOWS | WORD AND SONGS