#hoxeenArousaPontevedraDíaaDía

#de12a1430

Cambados xa é oficialmente o Mellor Municipio Enoturístico de España 2018.

A alcaldesa, Fátima Abal, e o Concelleiro de Enoturismo, José Ramón Abal, recolleron con gran satisfacción esta fin de semana en Madrid o galardón concedido por Acevín.

Un recoñecemento que para o Concelleiro de Enoturismo supón “unha responsabilidade enorme e expectativas moi altas postas en Cambados”.

En todo caso, serán novos retos “para seguir innovando e potenciar e dinamizar as actividades enoturísticas do municipio e da comarca, como a Festa do Albariño de Inverno que se celebrará o 15 de decembro no Salón Peña”.

#hoxeenArousaPontevedraDíaaDía

#de12a1430

“Cambados en negro contra a Violencia de Xénero” será unha das numerosas actividades que o Concello ten organizadas para a conmemoración do 25N.

O programa, que se desenvolverá na maior parte en colaboración co CIM comarcal, inclue tamén actividades formativas nos centros educativos do municipio, con charlas, curtametraxes e monólogos.

Pero ademáis, este ano o goberno municipal quere implicar tamén ao comercio local e aos clubes deportivos da localidade, tal como nos explicaba esta mañá a alcaldesa, Fátima Abal, na presentación dos actos.

#hoxeenArousaPontevedraDíaaDía

#de12a1430

As obras da piscina municipal de Cambados descubren un imprevisto do que se terá que facer cargo a administración municipal e queda fora do convenio coa Deputación.

Concretamente, trátase do mal estado da instalación eléctrica que terá que ser totalmente sustituida cun custe para as arcas municipais duns 100.000 euros.

O Concelleiro de Deportes, Victor Caamaño, foi coñecedor desta mala nova durante a comisión de seguimento das obras, celebrada esta mañá no Pazo Provincial.

Así pois, o custe das obras de reforma integral da piscina municipal de Cambados ascenden xa a 1,6 millóns de euros, tralo engadido dos novos vestiarios.

En todo caso, mantense o prazo de execución e está previsto que as obras rematen antes do 31 de marzo.

#hoxeenArousaPontevedraDíaaDía

#de12a1430

A Mesa Local de Comercio de Cambados acordou esta mañá a apertura da Plaza de Abastos e do mercado ambulante o sábado día 8 de decembro, festivo nacional.

A xuntanza celebrada entre o Concello e os comerciantes concretou tamén a iluminación de Nadal, que se prenderá durante a ponte da Inmaculada, con maior presencia nas rúas e cun orzamento duns 13.000 euros, semellante ao do ano pasado.

Asimesmo, tamén se abordaron as actividades que se celebrarán no Salón Peña, do 22 ao 31 de decembro, tal como nos contaba o Concelleiro de Promoción Económica, Xurxo Charlín.

#hoxeenArousaPontevedraDíaaDía

#de12a1430

A Asociación Zona Centro de Cambados ten xa preparado o seu IV Desfile de Moda, que, en colaboración co Concello, se celebrará o domingo 25 de novembro coa participación de 21 comercios e establecementos asociados.

Modelos semi profesionais e os propios clientes, de todas as edades e tallas, desfilarán pola pasarela do Salón Peña a partir das 18 horas amosando as últimas tendencias en moda muller, home e infantil, deportiva, calzado, peluquería e lencería.

Entre os diferentes pases haberá diferentes actividades infantís coordinadas pola asociación TDAH Salnés.

Ademáis, ao final do desfile haberá un acto relacionado co Día Internacional contra a Violencia de Xénero, que se conmemora esa mesma xornada.

Así o explicaba o Presidente de Zona Centro, Juan Rey, na presentación do desfile, acompañado de representantes do goberno municipal.

#hoxeenArousaPontevedraDíaaDía

#de12a1430

O Salnés mirará ao Cosmos os días 23 e 24 de novembro mediante unhas Xornadas de Astronomía organizadas pola Mancomunidade do Salnés.

Trátase dunha actividade destinada para os nenos que se desenvolverá no multiusos de Vilanova con exposicións, sesións planetarias e cine.

O venres 23 estará adicado aos colexios e o sábado 24 será de acceso libre e gratutito.

Ademáis, os nenos poderán ter contacto directo con alguén que xa estivo no espazo.

O venres ás 19.30 terá lugar unha conferencia do cosmonauta da axencia espacial rusa Mikhail Kornienko, compañeiro no seu día do agora Ministro Pedro Duque.

A presencia do cosmonauta é froito das xestións realizadas pola Mancomunidade do Salnés coa embaixada rusa na súa visita á comarca.

Os detalles explicábaos esta mañá o presidente da Mancomunidade, Gonzalo Durán, na presentación destas Xornadas de Astronomía.

#hoxeenArousaPontevedraDíaaDía

#de12a1430

O Concello de Cambados está acondicionando o entorno do antigo parque infantil de Castrelo, ao carón do campo de futbol de Beiramar, que xa foi utilizado este verán para a celebración da Festa de San Cristobal.

Segundo explicou esta mañá o concelleiro de Obras e Servizos, José Ramón Abal, o espazo, que se encontraba en estado de abandono, será rehabilitado para que se poidan celebrar eventos festivos nas condicións idóneas, a petición da Comisión de Festas.

A actuación supón un investimento duns 6.000 euros e estase a realizar con maquinaria da Mancomunidade do Salnés.

Ademáis, tamén na parroquia de Castrelo, o Concello proxecta a instalación de dous muros de contención de pedra na saída das tuberías do lugar de Sartaxes co fin de para protexer a estrada que, pola forza das mareas sufriu o desprendemento do barranco, e como consecuencia, o estreitamento da vía.

Ademáis, volverase a pavimentar a pista e adecentar a zona.

#hoxeenArousaPontevedraDíaaDía

#de12a1430

O delegado do goberno en Galicia, Javier Losada, visitou hoxe Vilagarcía para coñecer in situ as demandas do goberno local.

Dende o concello trasladouselle a necesidade de maior seguridade e o incremento da plantilla da policía nacional no municipio.

Neste sentido, Losada insistiu en que Vilagarcía é unha cidade tranquila e segura pero recoñeceu a necesidade de máis axentes en toda España.

O goberno de Alberto Varela tamén solicitou a colaboración para conseguir a parada do AVE a Madrid.

Pola súa parte, o delegado en Galicia asegurou que se reunirá mañá en Vigo coa presidenta de ADIF para que teña en conta a Vilagarcía nas paradas do tren de alta velocidade, unha vez que a proposta ten xa o beneplácito do Ministro de Fomento, José Luis Ábalos.

Na reunión de traballo tamén se falou da realización da segunda fase do paseo marítimo, a reforma do cuartel da Garda Civil e a solicitude do terreo anexo aos xulgados para habilitar un aparcamento temporal.

Pola súa parte, o delegado do goberno, Javier Losada, asegurou que leva os deberes para a súa delegación e anunciou que o Ministerio de Fomento sacou xa a licitación a redacción do estudo económico para a creación da Variante Oeste da N-640.

Un novo vial que aliviaría o tráfico pesado polo centro da cidade.

Ademáis, o delegado do goberno tamén mantivo unha xuntanza coa Asociación de Comerciantes Zona Aberta que lle trasladaron as súas reclanacións para que se regularicen a nivel autonómico os períodos de rebaixas.

#hoxeenArousaPontevedraDíaaDía

#de12a1430

O colexio San Roque de Corón, en Vilanova, amplía a súa dotación de xogos.

Trala instalación de columpios para os alumnos de primaria e a mellora do campo de futbol, agora o Concello de Vilanova acaba de colocar unhas casas de xogo para os pequenos de infantil, trala demanda da Anpa e a dirección do centro.

Nolo contan o Tenente de Alcalde, Javier Tourís, e o director do colexio, Manuel Alonso.

#hoxeenArousaPontevedraDíaaDía

#de12a1430

O Concello de Vilanova ordenou a retirada dun peche ilegal con maceteiros no lugar de San Roque do Monte, en San Miguel de Deiro,

Uns 25 veciños acudiron ao Concello para denunciar a situación xa que consideran que as pezas ornamentais ocupan un espazo público.

O alcalde, Gonzalo Durán, anuncia que xa ordenou a retirada do peche e recomenda aos propietarios do mesmo non crispar a convivencia veciñal.