O concello de O Grove solicitará a declaración de Ben de Interés Cultural para o xacemento arqueolóxico de Adro Vello co fin de conseguir unha maior protección para a zona.

O presidente da Deputación, Rafael Louzán, e o alcalde de O Grove, Miguel Angel Pérez, comprobaron esta mañá os traballos de limpeza e recuperación do xacemento que está a desenvolver a Deputación de Pontevedra.

O xacemento arqueolóxico de Adro Vello, ubicado en San Vicente, encóntrase dentro da ruta dos castros e xacementos promovida este ano pola institución provincial como reclamo turístico cultural.

Os traballos de limpeza puideron comezar despois de que se confirmara que o terreo onde se asenta o conxunto arqueolóxico pertence ó dominio marítimo-terrestre de Costas do Estado.

As actuacións foron supervisadas esta mañá polo Presidente da Deputación Provincial, Rafael Louzán, acompañado do alcalde de O Grove, Miguel Pérez e o arqueólogo da Deputación, Rafael Rodríguez.

E alí estivo a nosa compañeira Alba Piñeiro para recoller as declaracións da visita, en medio da chuvia e o forte vento que tamén se colou a través do micrófono.

Dentro da oferta de turismo cultural de Turismo Rías Baixas, está tamén a proposta de Vilagarcía. O concello cre que pode sacar rendemento turístico dos seus castros e pazos grazas ás edificacións existentes en Sobrán, Vista Alegre ou Rubiáns, sen esquecer o Castro Alobre nin os petroglifos de Bamio, a ruta das camelias, e as visitas a Cortegada.

Nolo decía en AROUSA PONTEVEDRA DIA A DIA dende FITUR ou alcalde Tomás Fole.

Turismo Rias Baixas vende este ano cara ó exterior un turismo cultural centrado na Ruta dos Castelos e na Ruta dos Xacementos baixo o título “Rías Baixas nos albores da historia”. Neste proxecto común están representados os diferentes municipios das nosas comarcas.

A primeira das rutas fai un percorrido por 16 castros da provincia, entre eles Castro Alobre, mentres que a Ruta dos Castelos inclúe a reconstrución da fortaleza de Monte Lobeira.

Paralelamente, o ente provincial presenta na feira madrileña o proxecto "Smart Destinos Intelixentes", co que se quere situar á provincia "á vangarda dos destinos intelixentes de España mediante unha plataforma na que participan os establecementos hostaleiros que ofrece información en tempo real.

Así mesmo, a Deputación aproveita a súa presenza en Fitur para preparar xa o evento Madrid Fusión, a celebrar entre os días 27 e 29 deste mes coa gastronomía como protagonista.

Todo elo nolo contaba en directo en AROUSA PONTEVEDRA DIA A DIA o presidente da Deputación de Pontevedra, Rafael Louzán nesta conversa con Alba Piñeiro.

O Presidente da Mancomunidade do Salnés, Gonzalo Durán, anima ós empresarios do Salnés a aproveitar sen demora os bos resultados da súa viaxe de 6 días á cidade mexicana de Aguascalientes.

I e que a delegación do Salnés regresou con moi boa impresión respecto das posibilidades de negocio que ofrece o país azteco. E froito delo, a mancomunidade trae asinado un acordo de colaboración no que a entidade supramunicipal será a plataforma de xestión para os empresarios que queiran vender os seus productos en México.

Ademáis, tamén se prevé a organización de sendas expedicións empresariais en dobre dirección.

A primeira será en abril, data na que Aguascalientes celebra unha gran feira agropecuaria , á que a Mancomunidade quere levar un mínimo de trinta empresarios da comarca dispostos a abrir novos mercados.

E posteriormente, no verán está previsto que unha delegación empresarial de Aguascalientes visite a comarca do Salnés para, á súa vez, establecer relacións comerciais con Galicia, co fin de que utilizar este territorio como porta de entrada para os seus produtos en Europa.

Así nolo contaba en AROUSA PONTEVEDRA DIA A DIA o presidente da Mancomunidade do Salnés, Gonzalo Durán, que esta mañá facía un balance moi positivo da súa viaxe.

Os emigrantes retornados do Ulla Umia continuan na sua loita para que o Estado anule as sancións impostas ós pensionistas no extranxeiro por non declarar as súas retribucións.

O Auditorio Municipal de Caldas acolleu esta semana unha nova asemblea da Asociación de Emigrantes Retornados de Ulla e Umia para informar aos socios das actividades realizadas ata a data e das que se pretenden acometer.

Entre as próximas iniciativas, os emigrantes retornados do Ulla Umia pretenden facerse notar na Feira do Cocido de Lalín, nas celebracións do entroido e tamén diante das delegacións da Axencia Tributaria.

Nolo contaba en AROUSA PONTEVEDRA DIA A DIA, Celso Domínguez, portavoz da Asociación de Emigrantes Retornados do Ulla Umia...

O alcalde de Cambados, Luis Aragunde, anunciou na feira Fitur de Madrid que o Festival "Música con Denominación de Orígen", financiado polo Ministerio de Cultura, se estreará nos meses de xullo e agosto. Trátase dun programa musical itinerante que vincula a dous concellos significativos entre as denominacións vinícolas españolas: Cambados e Peñafiel.

Contra o que adoita ser habitual, Luis Aragunde adiantou en varios meses algúns dos concertos que, grazas ao singular proxecto musical, nutrirán o programa de eventos na 62 edición da Festa do Albariño. O andaluz Kiko Veneno, xunto cos grupos pops Delafé y las Flores Azuis e Zahara, poñerán a súa potente proposta musica dentro da Festa do Albariño.

A polifacética artista Christina Rosenvinge dedicará os seus Contos Enchufados aos máis pequenos da festa cambadesa. Aínda quedan por desvelar varios concertos do panorama musical español para completar o calendario da semana grande albariñense.

No ciclo de cine Vinéfilos, que se celebrará en agosto, exhibiranse producións nacionais que combinan cine, gastronomía e enoloxía. Cambados e Peñafiel poderán proxectar e gozar da longametraxe "18 Comidas" do galego Jorge Coira, así como dos documentais "Dieta Mediterránea" da catalá Carmen Ruscalleda, e "Mugaritz BSO" dos vascos Andoni Aduriz, Juantxo Sardón e Felipe Ugarte.

Música clásica, jazz e bandas

Música con Denominación de Orígen tamén inclúe unha sesión clásica co compositor e pianista navarro Joaquín Taboada, que actuará no patio de Armas de Fefiñáns; un concerto de jazz a cargo de Paco Charlín Trio, ademais de senllas sesións vermú amenizadas polas bandas de música de Castrelo e Peñafiel.

O promotor desta iniciativa musical é Cambados, capital do Albariño, apostando por un programa diverso, variado e integrador, para todos os públicos. Nesta primeira edición súmase o concello de Peñafiel (Valladolid), capital da D.O. Ribeira do Douro, reforzando un vínculo entre as comunidades de Galicia e Castela León.

En AROUSA PONTEVEDRA DIA A DIA entrevistamos en directo ó alcalde Luis Aragunde, despois da súa presentación en FITUR.

A Plataforma SOS PANADEIRA non mantén xa demasiadas esperanzas en que se poidan paralizar as obras dos novos pantaláns reanudadas polo Club Náutico de Sanxenxo.

Integrantes do colectivo veciñal volveron esta mañá a pe de praia para obstaculizar na medida do posible as actuacións dos operarios do Club Náutico, pero sen poder evitar que se realizasen algúns traballos.

I e que, segundo nos decía en AROUSA PONTEVEDRA DIA A DIA o portavoz da Plataforma, Carlos Quintía, síntense sós ante un proxecto que consideran ilegal.

En todo caso, continuarán mantendo as concentracións diarias na praia da Panadeira e celebrarán unha manifestación esta fin de semana.

Pola súa banda, o Concello anunciou que «actuará contra a continuación das obras dos pantaláns». A alcaldesa Catalina González, está a espera de recibir a resposta de Portos de Galicia sobre se o ente público concedeu ó Náutico unha prórroga para executar as obras.

Segundo o Concello, o último permiso que lle consta finalizou o 31 de decembro.

Ademais, o Concello sinalou que existe unha demanda no Xulgado do Contencioso en Santiago interposta contra esta obra e que «confiamos en que o xuíz sentencie a favor do interese municipal». O Concello oponse aos pantaláns por «a presión paisaxística» que xerarán sobre a costa e por contravenir o plan de usos do porto e o POL.

En canto melloren as condicións meteorolóxicas comezarán os traballos de ampliación do camiño interior da Avenida da Pastora como vial alternativo para ós vehículos agrícolas que quedaron sen acceso a consecuencia da dirección única imposta na avenida da Pastora o pasado decembro.

O goberno local adopta esta medidas por mor das queixas dos residentes que recolleron sinaturas en protesta polas molestias que lles está ocasionando a nova ordenación viaria.

A ampliación do camiño farase en colaboración coa Deputación de Pontevedra e segundo o alcalde Luis Aragunde, os terreos necesarios xa foron cedidos ó concello polos seus propietarios, que, ademáis, segundo o rexedor, están contentos coa alternativa proposta.

A nova Estación Depuradora de Augas Residuais de O Grove estará lista para entrar en funcionamento este verán.

E a previsión do Conselleiro de Infraestructuras e Medio Ambiente, Agustín Hernandez, que esta mañá estivo no municipio meco supervisando as obras que está a executar o seu departamento cun investimento de máis de 8 millóns de euros.

Con esta nova depuradora, O Grove deixará de depender dunha planta de pre-tratamento para dispoñer dunha planta con capacidade para a xestión de residuos dunha poboación de 40.000 habitantes.

As obras están nestes momentos no 70% da súa execución e incluen a construcción dunha nova estación e pozo de bombeo.

Os traballos foron supervisados esta mañá polo Conselleiro Agustín Hernandez, acompañado polo alcalde de O Grove, Miguel Angel Pérez, que se amosaba satisfeito coa creación desta infraestructura.

A alcaldesa de Sanxenxo , Catalina González, reiterou esta mañá ante o pleno extraordinario da corporación municipal, a súa inocencia na trama de irregulariedades urbanísticas que investiga o xulgado de Cambados.

Na sesión extraordinaria convocada a petición dos grupos da oposición, Catalina González calificou como «denuncia falsa» a demanda por parte de particulares que provocou a apertura da investigación xudicial sobre o urbanismo de Sanxenxo. Negou que ela teña sido responsable nin de prevaricación, nin de suborno nin de tráfico de influencias.

Ante as duras críticas da oposicion pedindo o seu cese, Catalina González sostivo que non beneficiou a ninguén e ninguén lle deu nada.

Así mesmo tamén anunciou que os técnicos municipais imputados non serán apartados das súas funcións porque considera que a investigación está en fase de dilixencias previas e non hai razóns legais para atender a petición da oposición desde o punto de vista do goberno.

Tralo remate do pleno, a alcadesa de Sanxenxo volvía a reiterar a súa inocencia ante os medios de comunicación.

A imaxe do urbanismo de Sanxenxo está en cuestión dende principios de século.

E dende a oposición, o portavoz de SAL aseguraba que saía da sesión plenaria decepcionado pero non sorprendido.