Podcast Radio Cerna

A Xunta intenta calmar aos concellos ante a súa preocupación pola vaga eólica, mentres que máis de 170 colectivos sociais anuncian unha mobilización en toda Galiza, o 11 de decembro, Día das montañas, para reclamar unha paralización real e inmediata de todos os proxectos eólicos en tramitación para poder deseñar unha nova planificación máis adaptada á realidade ambiental e social do país con respecto ás enerxías renovábeis. Xunto con isto, damos conta da nova proposta de lei de benestar animal ou o misterio do finamento de centos de estorniños en Ferrol... Preme e escoita!

No boletin informativo de hoxe repasamos a actualidade máis recente relativa ao medio ambiente e ao ecoloxismo galego. Anúncianse novas mobilizacións masivas a prol da paralización de todos os proxectos eólicos en tramitación, da expropiación "encuberta" dos montes veciñais, dunha nova mortaldade de gaivotas por botulismo e da chantaxe que a Xunta lle fai aos concellos do Barbanza para que abandonen o sistema de xestión de residuos de Lousame, entre outras novidades da semana.

Rede Eléctrica Española confirma que Galiza exportou no primeiro semestre de 2021 o 35% da electricidade producida no país, mentres están en tramitación uns 270 parques eólicos máis para o noso territorio. A Xunta, impasible a este dato, si se pronuncia arredor da eólica mariña, cando menos sobre os proxectos de Iberdrola que se están a tramitar no Ministerio. A outra reclama da semana vén da conta da Organización Galega de Montes Veciñais en Man Común fronte o propósito do goberno galego de desposuír ás comuneiras e comuneiros do seu dereito de propiedade sobre os montes.

As novas desta semana poñen en evidencia o conflito entre a necesidade de abordar de forma urxente a emerxencia climática e a necesidade de facelo sen sacrificar deliberadamente a conservación da biodiversidade e actividades compatibles cunha contorna sustentábel. Desde o Cumio de Glasgow ata o rexeitamento social aos macroparques eólicos ou o seu impacto sobre unha especie agora protexida: o lobo. Escóitanos!

Neste informativo semanal sobre o medio ambiente galego abórdanse feitos relacionados co sector forestal, a xestión do lobo e a vaga eólica, que segue provocando o nacemento de plataformas sociais en defensa do territorio. Coñece os detalles en Radio Cerna!

O colectivo ecoloxista ADEGA constata con datos sobre plantacións ilegais o efecto chamada da moratoria do eucalipto, a través da súa campaña de denuncia forestal. Nesta semana a Xunta abandonou o grupo de traballo do Ministerio sobre o lobo para deseñar a súa propia estratexia sobre a xestión desta especie protexida xunto con Castela e León, Cantabria e Asturias. Estas e outras novas sobre o medio ambiente galego contámoschas en Radio Cerna... Escóitanos!

Desta volta a actualidade informativa de Galiza recolle a nova sentenza contra Ence da Audiencia Nacional, a moratoria da Xunta a novas solicitudes de parques eólicos ou a denuncia de ADEGA dunha nova central hidroeléctrica de bombeo no ZEC Macizo Central, espazo protagonista deste informativo.

Hoxe achegamos un espazo de radio exultante de actualidade ambiental. A semana deixounos novas sobre Endesa e a súa intención de volver queimar carbón nas Pontes, o inico da xudicialización eólica por parte de ADEGA, a publicación oficial do novo Plan Forestal ou o novo proxecto da Mina de Touro, entre outras... Escoita!

Plan de Conservación da Fraga de Catasós, vertidos en rías e limpeza simultánea de ríos, entre outros dos acontecementos ambientais da última semana, aquí en Radio Cerna!

Sen dúbida, a nova ambiental da semana protagonizouna o lobo. Pasa a ser especie protexida, aínda que non se prohibe na totalidade a súa caza. Os segundos protagonistas: os encoros. ADEGA presenta denuncia na Fiscalía contra a Xunta e as eléctricas polo suposto baleirado irregular dos encoros en días nos que o prezo da luz acada máximos históricos, e novos aproveitamentos hidroeléctricos asoman nas balsas mineiras de Meirama e As Pontes. Por outra banda, o encoro das Cunchas aspira a ser declarada zona vulnerable por contaminación de nitratos...