Podcast Radio Cerna

Uns 50 colectivos de diversa índole convocan para o Día mundial do Medio Ambiente unha gran manifestación contra o actual modelo eólico que pretende inzar de aeroxeradores todo o territorio galego. A sacudida eólica que está a sufrir o país está espertando un rexeitamento social contra os proxectos eólicos que se leva manifestando nas últimas semanas a través de marchas locais e outros actos reivindicativos, como a andaina polo Suído, o recital nos penedos de Traba e Pasarela ou o roteiro polos montes de Brión. O caso do Eume volve resoar pola multa e indemnización de 2 millóns de euros que a Xunta lle reclama pola grave contaminación sufrida polo río o pasado mes de agosto. Isto e moito máis no programa Cerna de hoxe!

Enerxía eólica, posible neglixencia da Xunta no ámbito forestal, xabaril e lobo... algúns dos temas sobre os que pivotou esta semana a actualidade ecoloxista de Galiza. Animámoste a escoitar a información completa.

Seguimos abordando a actualidade ambiental de Galiza na que ultimamente sobresae a cuestión eólica. Nesta semana, a nova foi a información negativa da Xunta a algúns dos proxectos en tramitación. Se queres máis detalles, escóitanos!

Algunhas das novas que nos deixa a semana: O Senado aproba a lei de cambio climático, o goberno estatal frea o depósito de áridos a carón da illa Sálvora e comezan a agromar as mobilizacións presencias en contra dos macroproxectos eólicos. O activismo ecoloxista rexorde en contra do que xa se denomina o novo "espolio" do territorio galego. Queres coñecer a actualidade ambiental de Galiza? Escoita Radio Cerna!

No día posterior ao Día da Terra repasamos a actualidade ambiental galega, que volve estar protagonizada polos macroproxectos eólicos, os fondos next generation e a moratoria forestal. A sorpresa da semana: Ence valora mudar de emprazamento, pero non agora. Se queres saber máis, escoita!

O impacto dos novos proxectos eólicos na sociedade galega está a facer agromar novas plataformas que reivindican a defensa do rural. Nos últimos días nas comarcas do Deza e Bergantiños. Os sindicatos agrarios alertan das consecuencias para o agro, e, por primeira vez, alcaldes do PP din non ao actual modelo eólico. Tamén se manifestan os órganos xestores de Reservas da Biosfera (Mariñas-Terras do Mandeo), consellos regulares e selos denominación de orixe... Alén da revolución eólica, este espazo tamén se fai eco do informe de Ence sobre a contaminación por mercurio do recinto de Elnosa.

ADEGA intensifica a súa campaña de vixilancia e denuncia de cortas e plantacións ilegais en vista da nova vaga eucaliptizadora que parece percorrer o país. Esta semana, tamén a vaga incendiaria chegou ás montañas orientais galegas; o Congreso aprobou a Lei de Cambio Climático, e a Xunta anunciou recurso no Constitucional. Despunta na actualidade informativa medioambiental a aparición de novas plataformas veciñais en contra dos macroproxectos eólicos. Atoparás máis contido informativo neste espazo de Radio Cerna.

Tras un período de descanso, Radio Cerna regresa co repaso semanal da actualidade ambiental galega. Nesta última semana, a cuestión forestal e enerxética centraron o ecodebate social. Preme e escoita!

Arredor do medio rural galego pivota toda a información ambiental de maior actualidade recollida neste espazo de Radio Cerna: plano forestal, lobo, gandería industrial, eólicos.... O rural galego está mudando a marchas forzadas! Escoita...

Esta semana produciuse un novo fito ecoloxista: o lobo declárase especie protexida tamén ao norte do Douro, onde deixará de ser especie cinexética (tamén en Galiza). E aparece a primeira poboación ivernante de miñato real en territorio galego! Nace a plataforma estatal ALIENTE a prol da biodiversidade e fronte ás renovábeis a grande escala e, por outro lado, continúa a incesante pingueira de novos proxectos eólicos que se queren instalar nas serras galegas... Isto e moito máis no programa de hoxe de Radio Cerna.