Podcast Radio Cerna

Dous autos do Tribunal Superior de Castela e León fallan a favor do Partido Animalista PACMA e suspenden cautelarmente o regulamento e a orde de caza desta comunidade autónoma por incumprir a lexislación estatal e europea en materia de conservación das especies salvaxes. Por primeira vez unha orde xudicial pon en vilo o futuro da actividade cinexética no territorio español. PACMA valora de xeito moi positivo a disposición da Xustiza e agarda que o Tribunal non ceda ás fortes presións ás que está a ser sometido, segundo nos explicou a voceira da formación, Laura Duarte.

O selo que certifica o interese científico dun destino turístico vén de ser adquirido polas serras de Ancares e Courel. Unha empresa promove este marchamo de calidade para promocionar os espazos naturais protexidos, entre outros, polo se valor ou interese científico. Ademais das serras orientais, tamén dispón deste recoñecemento o Parque Nacional das Illas Atlánticas. Hoxe coñecemos de primeira man esta nova certificación de calidade turística coa súa impulsora, Maite Vence.

Polos portos galegos entra madeira ilegal, segundo Greenpeace. O colectivo insta á Xunta a tomar medidas para evitar a entrada de madeira ilegal ou de sangue, tal e como a obriga a normativa. Greenpeace tamén presentou denuncia ante a Fiscalía de Medio Ambiente para que o ministerio fiscal investigue se as autoridades galegas están a incorrer en delito, ao non establecer as medidas necesarias para eviar o paso deste tipo de madeira por Galiza.

A plataforma Lugo de Cara ao Miño insta ao concello de Lugo a que compita co Club fluvial lucense polo treito do río Miño do que fixo uso privativo a entidade deportiva durante máis de 60 anos. A concesión do Club Fluvial atópase en trámite de renovación de concesión, durante o cal calquera entidade pode competir por ese espazo de dominio público hidráulico. Lugo de Cara ao Miño cre que esta é unha oportunidade de ouro para recuperar a única zona de baño que ten Miño ao seu paso por Lugo para toda a cidadanía, ademais de ser a solución máis barata, ecolóxica e xusta para dotar Lugo dunha praia fluvial.

Como todos os venres, repasamos a actualidade ambiental da semana. Valo perder...?

A uña de gato ou carpobrotus edulis ten practicamente colonizada toda a franxa litoral galega. Esta planta sudafriana invasora exerce unha presión negativa nos solos rochosos dos cantís e nos ecosistemas dunares e non é doada de erradicar. Novas investigacións, como a de Cristina Vieites, recomendan a loita biolóxica para frear a súa expansión.

O vindeiro 10 de abril remata o prazo legal para resolver definitivamente o expediente de declaración da Cova Eirós (Triacastela) como Ben de Interese Cultural. Ante a falta de información e de resposta ás súas consultas, a asociación ecoloxista ADEGA teme que a Xunta deixe vencer o prazo, condenando o xacemento a permanecer polo menos outros dous anos sen a protección como BIC. ADEGA convocou rolda de prensa para manifestar a súa preocupación e anunciar o achado de máis covas dentro do BIC.

As novas ambientais de Galiza máis sobresaíntes da última semana, aquí en Radio Cerna! Preme e escóitanos...

Tras 16 anos da catástrofe, un proxecto trata de recuperar a memoria colectiva cultural e social daquel feito e das posteriores accións de protesta. "Unha gran burla negra. Creatividade popular e memoria do Prestige (2002-2019) acolle exposicións, obradoiros, foros, mesas redondas, palestras e un arquivo vivo en construción do material divulgativo, informativo ou de protesta que xurdiu arredor da gran marea negra. Jorge Linheira, coordinador do proxecto, móstranos esta necesaria iniciativa.

O caos urbanístico de Barreiros non ten un responsable penal. Así o sentenza o fallo do tribunal do penal número 2 de Lugo, que absolve do presunto delito de prevaricación ao alcalde, a arquitecta e ao equipo de goberno municipal de 2006. Tras 12 anos de agarda, a sentenza foi decepcionante para ADEGA, que actuou como acusación particular no procedemento xudicial. O seu secretario, Froilán Pallín, expón neste espazo as razóns polas que ADEGA recorrerá o fallo. Segundo o colectivo, esta sentenza crea un mal precedente para a polícia urbanística municipal.