Podcast Radio Cerna

Facemos o último repaso semanal da actualidade ambiental deste ano 2018, aquí en Radio Cerna. Coñece como despide o ano o medio ambiente galego.

O cambio climático xa está a afectar ás nosas árbores. Estudos da USC están a valorar cales poden ser os seus efectos sobre o carballo común galego e o rebolo ou cerquiño, máis propio da provincia de Ourense e do Baixo Miño, a través da dendrocronoloxía. O profesor de botánica e experto na evolución das especies forestais ante os cambios do clima, Ignacio García, diranos se o carballo galego resistirá o reto.

Este espazo ofréceche a información ambiental galega máis actual. Vala perder? Preme e escoita....

ADEGA realizou, co apoio da Fundación Biodiversidade, máis de 15 actividades de custodia do Sobreiral do Arnego durante 2018, que se dividiron en actividades de divulgación e de intervención: bioblitz de flora e fauna, construción de refuxios, plantación de sobreiras, eliminación de especies exóticas invasoras, etc. O Sobreiral do Arnego é un espazo de Rede Natura conformado por parcelas de particulares, algúns dos cales teñen asinado proxecto de custodia con ADEGA.

Cada vez máis especies exóticas invasoras aparecen nos nosos ríos prexudicando a biodiversidade propia e creando, mesmo, problemas de saúde pública. O proxecto europeo Life-Invasaqua promovido por entidades, colectivos, institucións e centros de investigación de toda a Península, elaborará un plan contra as especies exóticas de augas continentais. A Estación de Hidrobioloxía do Encoro do Con da Universidade de Santiago de Compostela participa neste proxecto europeo con finalidades concretas, que coñeceremos co seu director Fernando Cobo.

O Grupo de Estudo dos Animais Salvaxes xurdía hai 15 anos en Santiago de Compostela para estudar, divulgar e concienciar sobre a fauna salvaxe. A piques de rematar este ano 2018, facemos un repaso á súa traxectoria co seu presidente, o biólogo e especialista en fauna salvaxe, Xosé Pardavila. GEAS está especializado no seguimento de mamíferos carnívoros e tamén realiza un inventario de animais mortos por atropelo na Península Ibérica.

Un novo estudo elaborado por profesores da USC e de ensino secundario vén a confirmar a idea de que existe máis diversidade de plantas e animais nos bosques caducifolios que nas plantacións de eucalipto. A recente investigación comparou a diversidade e abundancia de especies en catro plantacións de eucalipto fronte a catro carballeiras da provincia de Pontevedra. Os resultados conclúen que existe unha diferenza significativa.

O concello de Mos pretende expropiar parte de dous montes veciñais en ma común para construír enriba de solo rústico de protección forestal a futura Cidade Deportiva do Celta de Vigo e un centro comercial. ADEGA-Vigo e as comunidades de montes afectadas opóñense ao proxecto por consideralo un novo "pelotazo" urbanístico, ademais dos seus potenciais impactos sobre o abastecemento de auga da veciñanza e sobre as formacións de bosque.

Varias entidades ecoloxistas galegas xúntanse no movemento "Galiza, por un futuro sen carbón" para demandar que se comece a planificar o peche das centrais térmicas emprazadas en Galiza, de Meirama e As Pontes. Este movemento social insta ás adminsitracións galega e estatal a deseñar canto antes unha folla de ruta cara a descarbonización, ineludible e imprescindible, do país ante o reto do cambio climático.

O futuro enerxético do país centrou a actualidade ambiental galega desta semana. Queres coñecela? Preme e escoita!