Podcast Radio Cerna

O presidente da Sociedade Galega de Historia Natural (SGHN), Serafín González, repasa con Radio Cerna a historia e fitos deste colectivo galego de defensa ambiental con motivo do seu 45 aniversario. Tamén valora a evolución da conciencia ambiental da sociedade galega.

Nos últimos 5 anos, o río Támega, ao seu paso por Laza, sofre continuos episodios de contaminación procedente das obras do tren de alta velocidade. Malia ás denuncias ecoloxistas e ás sancións xa interpostas contra as empresas que constrúen o AVE nada cambiou. O Támega é ademais un espazo natural protexido como ZEC, LIC e Zona de Rede Natura. Á vista da pasividade das administracións, ADEGA-Monterrei convocou o pasado 9 de agosto unha marcha reivindicativa en Cerdedelo (Laza) co obxectivo de reclamar que dunha vez por todas freen os vertidos e se adopten cautelas medioambientais nas obras do AVE.

Neste ano 2018 entra en vigor a directiva europea que eleva de 200 a 300 bq/m3 o nivel de concentración de gas radon permitido en vivendas. A medida afecta especialmente a Galiza, onde se concentra o 33% das medicións deste tipo de radioactividade. Paralelamente, o laboratorio de radon de Galiza vén de ampliar o mapa galego de gas radon. Sen embargo, malia a albiscarse avances na normativa, os gobernos galego e estatal seguen sen tomarse en serio este problema, que para a nosa saúde representa o segundo factor de risco de cancro de pulmón.

Recollemos a información ambiental que nos deixou esta última semana a nosa terra galega e volcámola neste espazo de radio de 10 minutos. Está á túa disposición. Preme e escoita!

Ao rexeitamento social contra o vertedoiro de Grixoa e da mina de Touro súmase a negativa veciñal á unha nova instalación de residuos na mesma comarca, no lugar de Casalonga, no concello de Teo. Un proxecto que se presenta como planta de reciclaxe de residuos de orixe animal, puríns e lodos e que os veciños temen que mude nun vertedoiro máis na comarca de Compostela. A plataforma Casalonga Limpa de Residuos encabeza esta oposición social á que tamén se suman o concello de Teo e outros concellos limítrofes. O debate actual está en como se pode parar a tramitación do proxecto antes de que acade a avaliación ambiental integrada por parte da Consellaría de Medio Ambiente.

As últimas novidade no ámbito enerxético ou forestal de Galiza aquí en Radio Cerna! Escóitanos!

Elnosa, a fábrica electroquímica de Ence, situada no complexo industrial de Lourizán, dentro da ría de Pontevedra, despídese da ría. A dirección da empresa vén de anunciar esta despedida a causa da falta de resposta da D.X. de Costas do Estado á súa solicitude de prórroga de actividade en Lourizán. APDR acolle a nova con cautela e di que, de confirmarse a saída de Elnosa o vindeiro 29 de xullo, sería o preludio da marcha de Ence da ría de Pontevedra.

Hai 9 anos, o río Barbaña, de San Cibrao das Viñas, sufría a súa peor catástrofe ambiental. Un vertido industrial provocaba a morte duns 17.000 peixes e deixaba o río contaminado con metais pesados durante varios anos. Malia que aínda se descoñece a orixe do vertido, o caso está a ser xulgado nos tribunais do penal de Ourense. A fiscallía de medio ambiente pide varios anos de cárcere para tres responsables da empresa xestora da depuradora de San Cibrao, a cal supostamente non dispoñía dos requirimentos necesarios para afrontar este tipo de vertidos. A plataforma "Ríos Limpos" constituída por colectivos e veciñanza afectada conseguiu finalmente que o caso chegase aos tribunais logo de varios intentos fallidos.

O peche de Elnosa, a comisión de investigación do sinistro do Alvia, ou o pronunciamento da Xunta sobre a mina de Touro-O Pino, serán entre outras as novas de actualidade ambiental de Galiza que atoparás neste espazo promovido pola asociación ecoloxista ADEGA.

O coñecido como "Bosque Paraíso" de Oleiros está en risco. Unha urbanización promovida por coñecidos empresarios da Coruña ameaza con eliminar gran parte deste espazo natural considerado o último reduto de bosque da ría do Burgo. A Asociación de Veciños Colonia O Paraíso de Oleiros reclama a conservación do bosque e da súa biodiversidar por riba dos intereses especulativos do territorio. Falamos coa voceira deste colectivo, Charo López.