Podcast Radio Cerna

O Instituto de Estudos Miñoráns (IEM) dá conta dun descubrimento que muda o paradigma sobre a arte rupestre en Gailza e Norte de Portugal. Os lumes deixaron á vista a Laxe da Coutada, un petróglifo do concello das Neves no que o protagonista indiscutible é o cabalo, no canto do cervo. Este novo achado refrenda a idea de que os equinos son a figura máis gravada nos petróglifos do sur da provincia de Pontevedra e do Norte de Portugal, ademais de dotar a este animal dunha maior relevancia histórica e cultural. O IEM tamén está a estudar, a través do proxecto Equus, a xenética dos garranos para descubrir a súa orixe, xa que hoxendía poderían ser os únicos equinos salvaxes do mundo.

Radio Cerna repasa a actualidade ambiental da última semana. Queres saber cales foron as novas máis sobresaíntes?

O programa de voluntariado en ríos de ADEGA, Proxecto Ríos, vén de publicar os datos das inspección de 158 treitos de río inspeccionados en Galiza durante o ano 2017. O documento conclúe que, en xeral, a calidade dos ríos inspeccionados sufriu unha lixeira baixa con respecto a anos anteriores. Porén, o dato máis relevante é o que retrata o estado do bosque de ribeira, en mal estado na metade dos casos. Coñece outros datos que revela o Informe de Proxecto Ríos 2017 con Radio Cerna!

Queres coñecer as novas máis destacadas da acutalidade ambiental? Escoita o boletín informativo de Radio Cerna!

Ramón Varela Díaz, expresidente de ADEGA e promotor da primeira ILP forestal en Galiza, participou en Lugo na presentación da nova Iniciativa Lexislativa popular na defensa do Bosque galego, promovida por Cousa de Raíces e pola Alianza Rural Galega. Varela fai un repaso ás últimas 3 décadas da política forestal galega, desde que a primeira ILP forestal foi rexeitada polo Parlamento galego (1989). O paradoxo é que 30 anos despois daquela proposta lexislativa, séguese a pedir un cambio de modelo na dirección que tamén marcaba a ILP de finais dos anos 80.

ADEGA vén de entregar os premios Osíxeno e Dioxina de 2017 para destacar as mellores e peores actuacións ambientais do pasado ano. Coñecemos aos colectivos e persoas premiadas nas diferentes categorías destes galardóns. A xestión forestal de Galiza é a temática sobre a que xiran a maior parte dos premios.

Repasa con Radio Cerna a actualidade ambiental de Galiza. Ponte ao día en tan só 10 minutos!

O Movemento Ecoloxista da Limia (MEL) advirte que esta comarca xa non dá soportado máis cantidade de puríns ou xurros procedentes das máis de 350 granxas que a industria de Coren. Alertan da contaminación de acuíferos, fontes e terras de cultivo por nitratos, alén da contaminación por amoníaco que xeran estes residuos. O colectivo esíxelle á Administración e a Coren que dunha vez por todas tomen medidas e poñan solucións que limiten a xeración de xurros e que permitan o seu tratamento antes de ser botado á terra.

ASCEL, ADEGA e GEAS piden á Xunta que sexa máis dura coa caza furtiva de lobo ibérico. Un novo lobo apareceu tiroteado hai poucos días na Serra do Cando, nun espazo natural protexido como Rede Natura. Denuncian os ecoloxistas que non se trata dun caso illado nesta Serra, onde xa houbo anteriores episodios de persecución e ataque aos lobos.

O tren é unha materia pendente na vertebración territorial de Galiza. As vellas liñas desaparecen ou déixanse esmorecer, como no caso da liña de ferrocarril Ferrol-Ribadeo. O traxecto do tren que transcorre pola cornixa cantábrica, no que se acumularon unhas 900 incidencias só no último ano. A plataforma na defensa desta liña Ferrol-Ribadeo leva anos demandando á administración pública e aos responsables da liña e do servizo, Adif e Renfe Operadora, para que doten de infraestrutura, persoal e horarios flexíbeis a este servizo, do que dependen gran parte da poboación das comarcas da Mariña, Ortegal e Ferrolterra.