O Centro de Investigación Forestal de Lourizán e a USC presentan a primeira foto-guía dos combustibles forestais de Galiza. A partir do traballo do investigador Stefano Arellano determínanse 4 grupos de combustibles forestais e defínense as diferentes variables e combinacións de variables que inciden na proliferación e virulencia dos lumes forestais nos montes galegos. Se queres saber como funciona este manual, e que situacións son as máis propensas ao lume, escoita este espazo.

O Centro Ibérico de Restauración Fluvial (CIREF) nace en 2009 para promover unha nova idea de restauración fluial máis achegada á conservación dos recursos naturais fronte criterios economicistas desta práctica. O concepto de "Restauración fluvial" foi ademais deturpado nas últimas dúas décadas coa promoción de obras públicas no seu nome que nada tiñan a ver con tal obxectivo e que, mesmo, degradaron máis as bacías fluviais.

Convidámoste a coñecer a actualidade ambiental de Galiza a través deste espazo de Radio Cerna!

A través do proxecto Hippoparques estanse a estudar as poboacións de cabaliño de mar no parque nacional das Illas Atlánticas. Este proxecto trata de determinar o estado de conservación desta especie nos fondos mariños do espazo protexido e semella que alí atopan un hábitat particularmente propicio. O coordinador do proxecto dá conta dos seus resultados neste espazo e cales son as súas condicións de vida.

Neste espazo falamos coa Directora Xeral de Conservación da Natureza, da Xunta, Ana María Díaz, para coñecer en que consiste esta recente Rede de parques naturais de Galicia e que implicacións terá para a futura xestión destes espazos naturais protexido que hoxe en día son seis.

Reganosa vén de solicitar de novo as autorizacións que o Tribunal Supremo lle anulou por consideralas ilegais. Agora pretende legalizar a planta de gas da ría de Ferrol cunha tramitación urxente e simplificada polo Consello de Ministros do goberno en funcións, que exime á regasificadora de pasar a tramitación ambiental, pese a estar situada nun espazo de Rede Natura 2000. Neste espazo, abordamos a complexa situación xurídica na que se atopa actualmente Reganosa, coa avogada do Comité Cidadán de Emerxencia, Patricia Gabeiras.

Ecoloxistas en Acción publica o Informe 2015 sobre a calidade do aire do Estado español. Nesta publicación analiza a evolución da presenza de contaminantes tóxicos no aire por comunidades e substancias contaminantes. Galiza non se escapa a unha diagnose negativa do último ano no que empeorou a calidade do aire que respiramos.

Se queres saber que deparou esta semana a actualidade ambiental galega, escóitanos!

O programa de Educación Ambiental "Fogares Verdes" cumpre 10 anos en todo o Estado. Por ese motivo, hai pouco tivo lugar no CENEAM (Valsaín, Segovia) un Encontro internacional entre entidades de todo o mundo que desenvolveron iniciativas relacionadas con Fogares Verdes para intercambiar as súas experiencias. Por Galiza foi a organización ecoloxista ADEGA.

Cal foi o rédito do desenvolvemento eólico para o rural galego nos últimos 20 anos? Segudndo unha tese realizada por Damián Copena, membro do grupo de investigación sobre economía ecolóxica da Universidade de Vigo, non foi o agardado. As rendas que percibiron os propietarios/as dos terreos eólicos foron baixas e o rural non acadou un impacto positivo ou cando menos proporcional ao crecemento do sector no país. Ante o horizonte da instalación de 4.300 MW máis nos nosos montes, as conclusións desta investigación parecen pedir un novo marco regulador do sector en Galiza.