Podcast Radio Cerna

Neste espazo de radio atoparás un repaso das novas ambientais de Galiza máis destacadas nesta semana.

Este domingo, 2 de outubro, centos de voluntarios e voluntarias acudirán aos ríos galegos para limpalos de residuos. A actividade "Móllate polos ríos" do proxecto de voluntariado ambiental Proxecto Ríos convoca a toda a cidadanía galega a retirar de forma simultánea o lixo das marxes e cursos fluviais. Nesta edición da limpeza simultánea de Proxecto Ríos participarán 42 concellos e 54 entidades de toda Galiza.

Nace na Coruña o primeiro clube de lectura ecoloxista de Galiza. Incorpórase na Rede ibérica de clubes de lectura ecoloxista Terra Livre e comezará a súa andaina no mes de outubro. Fomentará a reflexión e o coñecemento sobre o ecoloxismo como disciplina e como filosofía de vida.

Repasa con nós a actualidade ambiental galega, de norte a sur e de leste a oeste!

Galiza era unha cita pendente da Sociedade Española de Agricultura Ecolóxica (SEAE). Desde hoxe ata o venres a SEAE celebra o seu XII Congreso no Pazo de Feiras de Lugo. Máis de 130 comunicacións e ducias de mesas de discusión conformarán este foro integral sobre agroecoloxía, alén de ir acompañado da I Feira agroecolóxica de Lugo "NaturaLugo". Coñecemos os contidos deste encontro do Director da SEAE, Víctor Gonzálvez.

ADEGA revela documentos da consultoría de Sogama nos que se constatan que a empresa de residuos leva cando menos cinco anos incumprindo os límites legais de contaminantes dos refugallos que verte en Areosa e noutros vertedoiros do país. O colectivo ecoloxista asegura que esta suposta fraude está relacionada coa proxección de novas instalacións de vertedoiros en Galiza, como a de Trazo ou a de Ordes, onde existe unha gran oposición veciñal contra estes proxectos.

Repasa con nós as novas ambientais máis destacadas da semana en Galiza. Só en 10 minutos!

No verán son motivo de queixa dos bañistas e de usuarios de praias. Moitas administracións locais consideránas un estorbo para o turismo e, mesmo, as tratan como residuos. Pero as algas que varan na liña de costa cumpren unha función fundamental na biodiversidade e conservación do noso litoral. Un estudo da Universidade de Vigo pon en valor as funcións das macoalgas que chegan ás praias estuáricas, ou de rías. A investigadora que realizou este estudo cóntanos cales foron os resultados.

Preme e escoita este espazo para coñecer as novas ambientais máis destacadas da semana no teu país!

Este sábado é o vixésimo aniversario dunha das catástrofes ambientais máis relevantes de Galiza: a avalancha do vertedoiro de Bens (A Coruña). Daquela catástrofe, na que ademais morreu unha persoa, xordeu o Plan de Residuos de Nostián que aínda está vixente hoxe en día. Pese a estar baseado na reciclaxe e na compostaxe e estar afastado da incineración, segue a ser un modelo con resultados pobres e moitas deficiencias. O daquela coordenador da Plataforma pola Reciclaxe da Coruña, catedrático de Enxeñería Química e membro do colectivo ecoloxista ADEGA, Manolo Soto Castiñeiras, descríbenos cales son esas deficiencias que aínda se poden superar para acadar cotas de reciclaxe moi superiores no concello e bisbarra da Coruña.