Radio Occitania

La gaujosa banda de ska-punk-trad de la garriga besierenca es de retorn ! Après « Luna Roja » editat en 2021, èra temps per Goulamas’K de sortir un album nòu de tant mai que festejan lors 25 ans ! La galeta novèla se ditz « Sempre aquí » e una virada se dessenha amb una primièra data prevista pel 30 de mars. Avèm agut mai de detalhs amb lo Fred Cot, cantaire, líder e sòci fondator de la chorma.

Soutenez-nous sur Patreon et HelloAsso !

Los aviam crosats al cors d’una acampada a Rodés al mes de novembre de 2023. Ara ont n’es l’associacion « La Gardarem » qu’a per mira de reviscolar l’Estivada ? Pel moment, las interrogacions son nombrosas per çò qu’es d’una novèla edicion d’un festenal interregional de la cultura occitana dins la prefectura roergata… N’avèm parlat amb lo Primaèl, sòci de « La Gardarem » e nos sèm interrogats amb el sus l’actitud dels Conselhs regional e departamental quand al sosten de portar a aquela iniciativa.

Soutenez-nous sur Patreon et HelloAsso !

Avèm crosat lor rota del costat d’Aude. Primaèl e Paulina Kamakine, plan coneguts dels nòstres auditors sortissián de quatre jorns de trabalh seriós e acarnassit. La mira : produire un album de poësia cantada sus un aire de fado doç, melancolic e tanben gaujós. N’avèm volgut saber mai sus aquel rencontre que nos volguèron plan acordar un moment entre doas repeticions.

Soutenez-nous sur Patreon et HelloAsso !

Sa votz vos menarà al cap del monde… atal vos podèm presentar la cantaira Heeka (fòto Christel Rodriguez) quand se mòstra soleta amb sas guitarras secas, fòlc, saturadas o alara en full band. Pòt èsser doça, enrabiada, gaujosa, desperada… aquò rai, aquela circassiana de formacion vos sap embarcar e sètz pas segur d’aver enveja de dintrar al pòrt. Acaba de sortir un album titolat « The haunted lemon » e avèm profitat de son passatge al Metronum de Tolosa lo 18 de genièr per ne saber mai sus sa caminada.

Soutenez-nous sur Patreon et HelloAsso !

Lo malhum dels centres de formacion professionala occitan s’es espandit dempuèi Besièrs duscas a Pau per tornar montar duscas a Orlhac. Après aver debutat per de simples talhièrs de conversacion, lo CFPO Montanhòl prepausa d'ara enlà tot un fais d'activitats dont d’estagis immersius en lenga occitana… Lo que ven se debanarà lo 24 de genièr a l’Ostal del Telh d’Orlhac. Estève Rogièr, en carga d’aquela jornada de formacion ne nos a detalhat lo programa.

Soutenez-nous sur Patreon et HelloAsso !

L’autonomia, un modèl de governança plan espandit per Euròpa, levat dins de païses coma lo nòstre. Es d’aquel concèpte que debatràn lo monde al Palais del Trabalh de Narbona a l’iniciativa del movement regionalista País Nòstre, lo 27 de genièr. A la clau, de conferéncias, de debats e de concèrts virant a l’entorn de çò que se poiriá far se las regions dispausavan d’un mai grand poder normatiu que non pas l’ora d’ara. Joan-Pèire Laval, sòci actiu del movement, nos donèt lo programa d’aquela jornada de reflexion.

Soutenez-nous sur Patreon et HelloAsso !

En 2021, al cap d’un long trabalh d’apròcha e d’acròcha… d’entrepresas de Gasconha s’amassèron dins l’associacion « Cercle Gascon de Negòcis » per trabalhar amassa sus un objectiu comun : la creacion d’un labèl « Produit en Gasconha ». Demest las entrepresas-sòcias d’aquela entitat : la societat Adishatz, plan coneguda dels nòstres auditors. Son PDG Joan-Luc Lagrava que n’es a l’iniciativa ne nos a descrit los contorns e la filosofia que la mena.

Soutenez-nous sur Patreon et HelloAsso !

Un grop tolosan que partís a la conquèsta d’America latina… Es l’aventura extraordinària que s’aprèsta per la chorma de FÜLÜ. Lo grop d’Electrobrass (mesclant jazz, musicas del monde e musicas electronic) publica lèu-lèu son primièr album après aver escumat molon d’emponts. Se n’anaràn en virada al Brasil d’ont venguèt l’inspiracion pel biais dels mentòrs del grop brasilièr Techno Brass.

Soutenez-nous sur Patreon et HelloAsso !

Una de las reflexions-clau de la lei recenta sus l’immigracion se portèt sus la question economica amb l’etèrna question de la concurréncia faita per la man d’òbra estrangièra sul nòstre sòl. De qu’es l’impacte vertadièr de l’immigracion sul nòstre PIB e sus l’emplec ? N’avèm devisat amb lo nòstre economista maison, Domenge Salgon.

Soutenez-nous sur Patreon et HelloAsso !

Seriá estat estranh per un establiment dont lo punt d’entrada es l’anciana gara de Sabras, per Landas, de non pas far omenatge a l’enfant del país… Bernat Manciet nasquèt en 1923 a Sabras. Demorèt pas aluenhat de son país que pendent sa carrièra diplomatica quand passèt per Brasil e Alemanha occupada, entre 1945 e 1955. L’ecomusèu de Marquesa s’emplegarà doncas a rapelar son sovenir als seus visitaires pel biais d’una mòstra, de conferéncias, de representacions teatralas o encara de concèrts. Dàvid Escarpit, salariat de l’Ecomusèu nos presenta aquela vertadièra sason consacrada a l’autor de « L’entèrrament a Sabras » del 11 d’abril al 20 de junh.

Soutenez-nous sur Patreon et HelloAsso !