Það er 28.desember í dag og það er afmælisdagur Ellyjar Vilhjálms. Hún hefði orðið 85 ára í dag hefði hún lifað og við fengum í tilefni af því að heyra brot úr þætti Margrétar Blöndal, Stefnumót, sem var á dagskrá Rásar 1 árið 2017. Þar ræddi Margrét við Ragnar Bjarnason um Ellyju og gömlu hljómsveitarárin með KK.

Það eru áramót framundan og þá hafa margir gæludýraeigendur áhyggjur af dýrunum sínum, enda geta flugeldar og hávaðinn sem þeim fylgir kallað fram talsverða hræðslu og streitu hjá gæludýrum. Undanfarið hafa verið fréttir af því að hundaeign hefur aukist mikið í faraldrinum, jafnvel svo mikið að það er meiri eftirspurn en framboð á ýmsum hundategundum. Því rifjuðum við upp viðtal við Hönnu Arnórsdóttur dýralækni hjá dýraspítalanum í Garðabæ. Hanna fræddi okkur um streitu vegna til dæmis aðskilnaðarkvíða gæludýra, hvað sé ráðlagt að gera við honum, sem getur verið mismunandi eftir því hvaða dýr eða tegund um ræðir.

UMSJÓN GUNNAR HANSSON OG GUÐRÚN GUNNARSDÓTTIR