'n Luisteraar deel haar elektrisiteitsbesparingswenke. 'n Skuldkenner verduidelik wat verbruikers moet weet voordat hulle om krediet aansoek doen. En in die laaste van 'n reeks gesprekke oor versekering, praat 'n makelaar oor amptenare- en direkteureversekering, iets wat jou raak indien jy 'n lid van 'n skoolbeheerliggaam is of die van 'n woonstelkompleks.

Mediesefondspremies is van jou grootste maandelikse uitgawes. Jy moet egter mooi dink voordat jy sommer net alle mediese dekking staak in 'n poging om te bespaar. 'n Kenner gee 'n lys van mediese produkte wat jy nog kan kanselleer, en dit wat jy tot elke prys moet behou. In 'n reeks praatjies oor versekering, praat 'n makelaar oor produkversekering en wie dit almal behoort te hê, en 'n belastingkenner verduidelik hoe belastingwetgewing oor trusts verlede jaar verander het.

'n Luisteraar deel haar ervaring met spaar met 'n stokvel. 'n Kenner kyk na risikoversekering, ook bekend as ongeskiktheidsdekking. En jy kan weer luister na 'n gesprek oor die voor- en nadele van die skep van 'n trust.

Deesdae hoor 'n mens van al hoe meer mense wat stokvelle gebruik om te spaar, selfs jong kinders. 'n Kenner verduidelik hoe om een te stig en te bestuur, en hoe jy dit ten beste kan benut. 'n Luisteraar deel haar ervaring met die eis van werkloosheidsversekering ná haar man se dood, en 'n versekeringsmakelaar gee agtergrond oor marine- en vragversekering en hoe selfs die kleinste eenmansake-onderneming daarby kan baat.

'n Belastingkundige beantwoord 'n luisteraarsvraag oor die skielike verhoging in belasting op sy maandelikse inkomste. 'n Versekeringsmakelaar praat oor kuberversekering en hoe dit Jan Alleman raak. En wat is die regte manier om jou geldsake binne 'n vaste verhouding of huwelik te bestuur?

'n Kenner bespreek die noodsaaklikheid van versekering wanneer jy jou eiendom of 'n deel daarvan op AIRBNB uitverhuur. 'n Skuldberader verduidelik wat die regte maniere is om te spaar, en 'n belastingkenner lwerp lig op die probleme wat huiskopers ondervind nadat die nuwe BTW-koers van 15% op 1 April in werking getree het.

Skuld in verhoudings: Hoe herken jy dit, voorkom jy dit, en hanteer jy dit indien jou maat in die skuld is? Werknemers se finansiële welstand het 'n groot invloed op 'n onderneming. 'n Kenner van aandeelbeleggings verduidelik weer na aanleiding van 'n luisteraarsvraag wat aktiewe en passiewe beleggings behels.

'n Kundige in finansiële bestuur verduidelik hoe jy etlike miljoene rande kan spaar op motoruitgawes. 'n Versekeraar praat oor die krisis wat die droogte ook vir privaat individue se versekering veroorsaak. En dis die vierde en laaste gesprek in die kort reeks met wenke om entrepreneurs te help met voorbereiding voordat hulle 'n onderneming begin.

Bitcoin-koors het die wêreld behoorlik beet. 'n Kenner reageer op 'n luisteraar se navraag oor die en ander kripto-geldeenhede. Daar is raad om jou kinders die waarde van geld en spaar te leer, en die derde praatjie in 'n kort reeks om entrepeneurs te help met die regte voorbereiding voordat hulle 'n eie onderneming begin.

Finansiële geletterheid was vanjaar hoog op die agenda by die Wêreld Ekonomieseforum se beraad in Switserland. Dit, sáám met kritiese denke en emosionele veerkragtigheid, word deesdae beskou as een van die belangrikste eienskappe waaroor jy moet beskik om in die toekoms werk te kry. 'n Kundige verduidelik wat dit behels en hoe jy jou kinders finansiëel slimmer kan maak.