Koos Malgas (1937-2001) was een van Mies Helen Maartens (1897-1976) se beeldhouers by die Uilhuis op Nieu-Bethesda in die Groot Karoo. Johan Rademan het hierdie bydrae saamgestel uit die SAUK-klankargief.

Johan Rademan gesels met die befaamde liedjieboer, Anton Goosen. Sy musiek is soos kiekies en vang tyd, dae en dinge in sy musikale lens vas. Een van sy gunsteling bestemmings is Nieu-Bethesda in die Groot Karoo. Daar vind hy sielsgeluk en vrede, en ‘n besoek aan die bekende Uilhuis is nooit uitgesluit of vanselfsprekend nie. Trouens, Helen Martins se Uilhuis met beeldhouer Koos Malgas, het hom onlangs laat besluit om ‘n tuisvideo van sy Padkos-album van 2017 te maak. Hy vertel sy storie van die Uilvrou van Nieu-Bethesda, en wie en waar die musikante wat saamspeel, was en is.

Die Wellington Wine Walk is ‘n interresante manier om Wellington se besienswaardighede, wynplase en gastehuise met kort stappie te geniet. Jy slaap in gastehuise wat heerlike maaltye berei, en loop dan met gidse wat jou begelei deur die geskiedenis van Wellington, tot die nageslag van Piet Retief op sy destydse familieplaas voordat hy uit die Kaapkolonie vertrek het. Johan Rademan het met Elaine Wegeling van Wellington Wine Walk gesels.

Johan Rademan het onlangs ‘n voorskou ervaar van Brett Bailey se Constellations by die Spier-landgoed buite Stellenbosch langs die Eersterivier, waar hy vir Wessel Pretorius, dramaturg en akteur, gepols het oor die konsep.

Johan Rademan gooi ‘n draai by Chereen Notnagel om meer uit te vind van die Emporiumversnit-geleenthede vir toeriste op Riebeekkasteel. Sy vertel van die kuns van kultivarversnydings, en met watter skaars kultivars sy al te doen gehad het. Besoekers kan hulle eie versnit maak en huis toe neem. Dis ‘n heerlike uitstappie ongeveer ‘n uur se reis van Kaapstad af.

Mark Graham Wilson en Donker Jonker vertel met groot entoesiasme hoe ‘n amfiteater besoekers en toeriste na die Riebeekvallei lok, maar ook hoe die gemeenskap dan betrek word en die omliggende gebied op ‘n teatrale manier voorgestel word aan binnelandse en buitelandse toeriste.

Ann Heyns het haar onlangs in die Riebeekvallei gevestig. Sy het lank oorsee gebly, en het ná haar terugkeer ondermeer die Stellenbosch360- en Ghoemaroetes help beplan en ontwerp. Sy kon eenvoudig nie stilsit nie, en het by die toerismekantoor in Riebeek betrokke geraak en die fyn lyn tussen die toerisme, kuns en kultuur in Art Town Riebeekvallei met ander belanghebbendes geskep. Johan Rademan het gaan uitvind.

Marchelle van Zyl bedryf verskeie inisiatiewe in die Montague-omgewing - staproetes, fietsroetes en spookroetes. Johan Rademan het gaan spoke.

Elsa Dickson het ‘n dubbeldoorpaspoort – een van Suid-Afrika en een van die VSA. Sy reis dikwels met Amerikaners na Suid-Afrika, en hulle is verras oor wat die land bied. Sy put ook uit die Amerikaanse-omgewing waar sy as musiekonderwyseres klas gegee het vir afstammelinge van die Afro-Amerikaners. Die spirituals is vir haar veral inspirerend. Haar nooiensvan is Van der Byl. Haar pa was Pieter van der Byl, alias Piet Pompies. Johan Rademan het met haar gesels tydens ‘n onlangse besoek aan Suid-Afrika.

Ontdek vier roetes met verskillende gewaarwordings en ervarings in die Riebeekvallei en omgewing. Sluit aan by die Weskus, ontdek kunste, kultuur, landskappe, kookvernuf, wynbou en geskiedenis. Johan Rademan het met Shawn Hewitt hieroor gesels.