«Rocksresort» a Laax, «Pradas Resort» a Breil, «Catrina Resort» a Mustér ed en l'avegnir in resort a Dieni en la Val Tujetsch. Las surbajegiadas tar las staziuns sut dals territoris da skis creschan e dattan en egl cun lur dimensiuns.

Ils resorts turistics cun lur tschients letgs e lur purschidas attiran ils turists en massas. Il Pradas Resort a Breil ha dapi sia avertura gì success e questa stad vegnan dapli bajetgs, dapli letgs e consequentamain dapli turists vitiers. L'economia locala, en emprima lingia la gastronomia e la scola da skis, profitescha dals osps dal resort, ma ella senta era ch'i vegn plaunsieu stretg. Senza reservar in plaz baud avunda, na marscha durant la stagiun auta nagut.

Sch'il Pradas Resort a Breil ha sin questa stad ina capacitad da 600 letgs, alura prevesa il project a Dieni 1'800 letgs. Il «mega-resort» en la Val Tujetsch è per ils ins ina speranza economica e per ils auters in excess da grondezza.