លោក​នាយក​រដ្ឋ​មន្ត្រី ហ៊ុន សែន កាល​ពី​ព្រឹក​មិញ​នេះ បាន​អំពាវ​នាវ​ឲ្យ​សកម្មជន​អតីត​គណបក្ស​ប្រឆាំង​ដែល​រង​ការ​ចោទ​ប្រកាន់ ហើយ​កំពុង​រត់​គេច​ខ្លួន​នៅ​ក្នុង​ប្រទេស​ថៃ និង​ប្រទេស​ហ្វីលីពីន វិល​ត្រលប់​មក​កាន់​ប្រទេស​កម្ពុជា​វិញ ដោយ​មិន​យក​ទោស​ពៃ​នោះ​ទេ​។ ចំណែក​អ្នក​ដែល​កំពុង​ជាប់​ឃុំ ក៏​ត្រូវ​បាន​ប្រមុខ​រដ្ឋា​ភិបាល​កម្ពុជា​បញ្ជា​ឲ្យ​ក្រសួង​យុត្តិ​ធម៌ ធ្វើ​ការ​ជាមួយ​តុលា​ការ ដើម្បី​ឈាន​ទៅ​ដោះ​លែង​ឲ្យ​នៅ​ក្រៅ​ឃុំ​ជា​បណ្តោះ​អាសន្ន​។ ប៉ុន្តែ លោក ជិន ម៉ាលីន អ្នក​នាំ​ពាក្យ​ក្រសួង​យុត្តិ​ធម៌​ដែល​ជា​ភ្ញៀវ​របស់​វិទ្យុ​បារាំង​អន្តរ​ជាតិ RFI នៅ​រាត្រី​នេះ បាន​ពន្យល់​ថា ជា​គោល​ការណ៍​ច្បាប់ អតីត​សកម្មជន​បក្ស​ប្រឆាំង​ដែល​សារ​ភាព ឬ​សហការ​ជាមួយ​សមត្ថ​កិច្ច ទើប​ទទួល​ការ​អនុ​គ្រោះ​នេះ​។

ទំនាក់​ទំនង​ដ៏​ស្អិត​ល្មួត​រវាង​កម្ពុជា​និង​ចិន​នា​ពេល​បច្ចុប្បន្ន និង​មូលដ្ឋាន​ទ័ព​ចិន​លើ​ទឹក​ដី​កម្ពុជា បាន​ក្លាយ​ទៅ​ជា​ប្រធានបទដែល​​លោក សម រង្ស៊ី ប្រធាន​ស្ដី​ទី​អតីត​គណបក្ស​ប្រឆាំង យក​ទៅ​ប្រើ​ប្រាស់​ដើម្បី​វាយ​ប្រហារ​រដ្ឋាភិបាល​កម្ពុជា​។ លោកបណ្ឌិត គី សិរីវឌ្ឍន៍ ប្រធាន​មជ្ឈមណ្ឌល​សិក្សា​ចិន​នៃ​រាជ​បណ្ឌិត្យ​សភា​កម្ពុជា ដែល​ជា​ភ្ញៀវ​ប្រចាំ​ថ្ងៃ​របស់​យើង យល់​ឃើញ​ថា វោហារ​សាស្ត្រ​របស់​លោក សម រង្ស៊ី ដូច្នេះ ទំនង​ជា​ធ្វើ​ឡើង​ដើម្បី​គៀងគរ​ស្វែង​រក​ការ​គាំទ្រពី​ប្រទេស​សមាជិក​អាស៊ាន​ដែល​មាន​ទំនាស់​ជាមួយ​ចិន ក្នុង​សំណុំ​រឿង​សមុទ្រ​ចិន​ខាង​ត្បូង​។ យ៉ាង​ណា​ក៏​ដោយ បើ​តាម​លោក​បណ្ឌិត គី សិរីវឌ្ឍន៍ យុទ្ធសាស្ត្រ​របស់​លោក​សម រង្ស៊ី ដូច្នេះ ពិបាក​ទទួល​បាន​ជោគជ័យ​ណាស់​។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរ​ជាតិ​នារាត្រី​នេះ គឺ លោក ជិន ម៉ាលីន ​អ្នក​នាំ​ពាក្យ​​ក្រសួងយុ​ត្តិធម៌។ សាលា​ដំបូង​រាជធានី​ភ្នំពេញ នៅ​ព្រឹក​ថ្ងៃទី១០ ខែ​វិច្ឆិកា​ ...

ភ្ញៀវ​ប្រ​ចាំ​ថ្ងៃ​របស់​វិទ្យុ​បារាំង​អន្តរ​ជាតិ​RFI​នៅ​រាត្រី​នេះ គឺ​លោក ផែង ហេង សហ​មេធាវី​ការ​ពារ​ក្តី​ឲ្យ ​លោក កឹម សុខា ។ លោក កឹម សុខា ប្រធាន​អតីត​គណ​បក្ស​សង្គ្រោះ​ជាតិ ដែល​ទើប​ត្រូវ​បាន​តុលា​ការ​បន្ធូរ​បន្ថយ​លក្ខខណ្ឌ​មួយ​ចំនួន​នៃ​ការ​រស់​នៅ​ក្នុង​ផ្ទះ ​ដោយ​អនុញ្ញាត​ឲ្យ​លោក​អាច​ធ្វើ​ដំណើរ​បាន​ទូ​ទាំង​ប្រទេស តែ​ហាម​ចេញ​ទៅ​ក្រៅ​ប្រទេស និង​ហាម​ធ្វើ​នយោបាយ​។ សម្រាប់​ លោក កឹម សុខា ដែល​ជាប់​ឃុំ​អស់​រយៈ​ពេល​២​ឆ្នាំ​មក​នេះ ចាត់​ទុក​ការ​​បន្ធូរ​បន្ថយ​នេះ​ថា​ជា​ជំហ៊ាន​ទី១​ ប៉ុន្តែ​លោក​នៅ​តែ​ត្រូវ​ការ​ឲ្យ​មាន​ដំណោះ​ស្រាយ​ដោយ​មាន​យុត្តិធម៌​ពិត​ប្រាកដ​។

ភ្ញៀវ​ប្រ​ចាំ​​ថ្ងៃ​​របស់​​វិទ្យុ​​បារាំង​​អន្តរ​ជាតិ​​RFI​​នៅ​រាត្រី​នេះ ​គឺ​លោក​ ហៃ ​ភិរម្យ​ អគ្គ​នាយក​​ក្រុម​ហ៊ុន​ Bosch​ និង​ជា​សហ​ស្ថាប​និក​នៃ​គម្រោង​ភ្នំ​ពេញ​ស្អាត​។​​​«យុទ្ធនា​ការ​ភ្នំ​ពេញ​ស្អាត»​ ដែល​ជា​ផ្នែក​មួយនៃ​ គម្រោង​ស្អាត​ បាន​បើក​ដំណើរ​កាល​ពី​ថ្ងៃ​សៅរ៍​ចុង​សប្តាហ៍​មុន​ ដើម្បី​អប់រំ​ប្រ​ជាជន​ឲ្យ​ផ្លាស់​ប្តូរ​ឥរិយា​បថ​ក្នុង​​ការ​គ្រប់​គ្រង​សំរាម​ និង​កាក​សំណល់​ផ្សេងៗ​ នៅ​រាជ​ធានី​ភ្នំពេញ​។ ​ឆ្លង​កាត់​​រយៈ​ពេល​២​ឆ្នាំ​នៃ​គម្រោង​នេះកន្លង​មក​ ​លោក​ ហៃ ​ភិរម្យ​ កត់​សំគាល់​ថា ​យើង​មិន​រំពឹង​ថា​​ពលរដ្ឋ​អាច​​ប្តូរ​​ឥរិយាបថ​​ក្នុង​​ការ​​ចោល​សំរាម​បាន​ងាយ​នោះទេ​ ពោល​ត្រូវ​ពេល​​វេលា​​វែង​​ឆ្ងាយ​ទៀត​​ដើម្បី​​អប់​រំ​​ពលរដ្ឋ​ក្នុង​​ការ​​ទុក​ដាក់​ និង​​គ្រប់​​គ្រង​សំរាម​ទៅតាម​បច្ចេក​ទេស​។

ភ្ញៀវ​ប្រចាំថ្ងៃ​របស់​យើង​នៅ​រាត្រី​នេះ គឺ​លោ​កអំ សំអាត នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO)។ នៅ​ថ្ងៃទី០៩ ខែវិច្ឆិកា​នេះ គឺ​តាំងពីព្រឹក​មក លោក​អំ សំអាត បាន​ចុះទៅ​សង្កេត​តាមដាន​ដោយផ្ទាល់​នៅ​ក្រុង​ប៉ោយប៉ែត ទី​ដែល​ក្រុម​លោក​សម រង្ស៊ី អះអាងថា នឹង​ចូលមក​កម្ពុជា​តាម​ច្រកទ្វារ​អន្តរជាតិ​ប៉ោយប៉ែត។ បើតាម​លោក​អំ សំអាត ប៉ូលីស និង ទាហាន​ជាច្រើន​នាក់​ត្រូវបាន​ដាក់ពង្រាយ​នៅ​ក្រុង​ប៉ោយប៉ែត ហើយ​ច្រកទ្វារព្រំដែន​ត្រូវបាន​បិទ​ជាច្រើន​ម៉ោង​មិនឱ្យ​ឆ្លងកាត់​នោះទេ។ ជាមួយគ្នានេះ លោក​ក៏បាន​លើកឡើង​ដែរ​ថា នៅ​ក្រុង​ប៉ោយប៉ែត លោក​ហាក់​ដូច​ជា​មិន​សង្កេតឃើញ​មាន​ប្រជាពលរដ្ឋ​ពី​ខេត្តផ្សេងៗទៅ​រង់ចាំ​ទទួល​លោក​សម រង្ស៊ី នោះឡើយ។

អ្នក​នាំ​ពាក្យ​សាលា​រាជ​ធានី​ភ្នំពេញ លោក ម៉េត មាសភក្តី ថ្លែង​ថា សាលា​រាជ​ធានី​ភ្នំពេញ នឹង បង្កើន​ការ​ការពារ​សន្តិ​សុខ នៅ​ក្នុង​ឱកាស​ព្រះ​រាជ​ពិធី​បុណ្យ​អុំទូក បណ្តែត​ប្រទីប សំពះ​ព្រះ​ខែ និង​អក​អំបុក ចាប់​ពី​ថ្ងៃទី១០ ដល់១២ ខែវិច្ឆិកា រួម​នឹង​ថ្ងៃ​បុណ្យ​ឯករាជ្យ​៩វិច្ឆិកា​ស្អែក​នេះ​ផង​ដែរ​។ ក្រៅ​ពី​នេះ បញ្ហា​សំរាម​ក៏​ជា​ការ​យក​ចិត្ត​ទុក​ដាក់​របស់​អាជ្ញាធរ​ក្រុង​ដែរ ដោយ​បញ្ហា​នេះ​ត្រូវ​បាន​ចាត់​ចែង​រួច​រាល់​អស់​ហើយ ដោយ​មាន​អ្នក​ចូល​រួម​ប្រមូល និង​សម្អាត​ពី​ក្រុម​ការងារ និង​អ្នក​ស្ម័គ្រ​ចិត្ត រាប់​ពាន់​នាក់​។ ការ​បង្កើន​កម្លាំង​សន្តិ​សុខ​នេះ ធ្វើ​ឡើង​ស្រប​ពេល​ដែល លោក សម រង្ស៊ី ប្រកាស​ធ្វើ​មាតុ​ភូមិ​និវត្តន៍​នៅ​ថ្ងៃទី៩​វិច្ឆិកា ចំ​ថ្ងៃ​បុណ្យ​ឯករាជ្យ​ជាតិ​។

ដូច​ការ​គ្រោង​ទុក លោក សម រង្ស៊ី ប្រធាន​ស្តីទី​អតីត​គណ​បក្ស​សង្គ្រោះ​ជាតិ បាន​រៀប​ចំ​វ៉ាលី​ឡើង​ជិះ​យន្ត​ហោះ​ពី​ទីក្រុង​ប៉ារីស​ប្រទេស​បារាំង មក​កាន់​ទីក្រុង​បាង​កក​ប្រទេស​ថៃ​ហើយ នៅ​ល្ងាច​ថ្ងៃទី ០៧ វិច្ឆិកា នេះ ប៉ុន្តែ​ត្រូវ​បាន​ក្រុម​ហ៊ុន​យន្ត​ហោះ​ថៃ​មិន​អនុញ្ញាត​ឲ្យ​ឡើង​ជិះ​យន្ត​ហោះ​នោះ​ទេ​។ នេះ​បើ​តាម​ព័ត៌មាន​ដែល​បាន​ធ្លាក់​មក​នៅ​មុន​នេះ​។ ស្រប​ពេល​ជាមួយ​គ្នា​នេះ អតីត​អ្នក​តំណាង​រាស្ត្រ​នៃ​អតីត​គណបក្ស​សង្គ្រោះ​ជាតិ លោក អ៊ូ ច័ន្ទរ័ត្ន ដែល​ជា​ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ RFI នៅ​រាត្រី​នេះ បាន​អះអាង​ថា ក្នុង​ស្ថាន​ភាព​ដូច​ពេល​បច្ចុប្បន្ន​នេះ លោក សម រង្ស៊ី មិន​គួរ​ធ្វើ​មាតុ​ភូមិ​និវិត្តន៍​មក​កាន់​ប្រទេស​កម្ពុជា​នោះ​ទេ​។ បើ​តាម​លោក អ៊ូ ច័ន្ទរ័ត្ន លោក សម រង្ស៊ី គួរ​ចរចារ​ជាមួយ​រដ្ឋា​ភិបាល​ក្រុង​ភ្នំពេញ​ជាមុន​សិន មុន​នឹង​ធ្វើ​មាតុ​ភូមិ​និវត្តន៍​។

ដំណើរ​ការ​រៀប​ចំ​ការ​ប្រណាំង​ទូក នៅ​ក្នុង​ឱកាស​ព្រះ​រាជ​ពិធី​បុណ្យ​អុំទូក បណ្តែត​ប្រទីប អក​អំបុក និង​សំពះ​ព្រះ​ខែ នៅ​ឆ្នាំ​២០១៩​នេះ ត្រូវ​បាន​រៀប​ចំ​ស្ទើរ​រួច​រាល់​ទាំង​ស្រុង​អស់​ហើយ​។ នេះ​បើ​តាម លោក ប៊ូ ជុំសេរី អនុ​រដ្ឋ​លេខា​ធិការ​ក្រសួង​អប់រំ ជា​អនុ​ប្រធាន​គណៈ​កម្មការ​បច្ចេក​ទេស និង​ជា​ប្រធាន​គណៈ​មេ​ប្រយោគ​ការ​ប្រកួត​ទូក «ង»​។ លោក ប៊ូ ជុំសេរី បញ្ជាក់​ថា​ចំនួន​ទូក និង​ចំនួន​កីឡា​ករ​អុំទូក​នៅ​ឆ្នាំ​២០១៩​នេះ គឺ​ប្រហាក់​ប្រហែល​នឹង​ឆ្នាំ​កន្លង​ទៅ​ដែរ ដោយ​មាន​ទូក​សរុប​ចំនួន​២៩៧​ទូក និង​មាន​កីឡា​អុំទូក​ចំនួន​ជិត​២ម៉ឺន​នាក់ ក្នុង​នោះ​នារី​ជិត​២០០​នាក់​។

ស្ថាន​ភាព​នៅ​តាម​ព្រំដែន កម្ពុជា-ថៃ កំពុង​ស្ថិត​ក្នុង​ការ​ត្រៀម​លក្ខណៈ​ការពារ និង​ទប់​ទល់​ការ​មក​ដល់​របស់​លោក សម រង្ស៊ី ប្រធាន​ស្តី​ទី​អតីត​គណបក្ស​សង្គ្រោះ​ជាតិ និង​អ្នក​គាំទ្រ ជាមួយ​នឹង​កង​ទ័ព ដែល​មាន​ស្រាប់​។ ជាមួយ​គ្នា​នេះ ភាគី​ថៃ​ក៏​បាន​បិទ​រូប​ថត​លោក សម រង្ស៊ី និង​មន្ត្រី​ជាន់​ខ្ពស់​អតីត​គណបក្ស​សង្គ្រោះ​ជាតិ​មួយ​ចំនួន​ទៀត នៅ​ច្រក​ព្រំ​ដែន​សំខាន់ៗ​ផង​ដែរ​។ លោក​ឧត្តម​សេនីយ៍​ឯក ស្រី ឌឹក មេ​បញ្ជា​ការ​កង​ពល​ធំ​អន្តរាគមន៍​លេខ​៣ ថ្លែង​ថា ច្រក​ព្រំ​ដែន​នានា​មិន​ត្រូវ​បាន​បិទ​ទេ ដោយ​សារ​ប្រជា​ពល​រដ្ឋ​ចេញ ចូល ប្រកប​មុខ​របរ និង​ធ្វើ​ការ​នៅ​ក្នុង​ប្រទេស​ទាំង​ពីរ​។ មេ​ទ័ព​ធំ ប្រចាំ​ព្រំ​ដែន​កម្ពុជា-ថៃ រូប​នេះ បញ្ជាក់​ថា​កង​ទ័ព នឹង​ចាប់​ខ្លួន​បញ្ជូន​ទៅ​ពន្ធនា​គារ នៅ​ពេល​ដែល​លោក សម រង្ស៊ី និង​អ្នក​គាំទ្រ​ចូល​ជាន់​ដី​កម្ពុជា ហើយ​ប្រសិន​បើ​មាន​ការ​តដៃ លោក​នឹង​បញ្ជា​បាញ់​កំទេច​ចោល​។