ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​នារា​ត្រី​នេះ គឺ​លោក ​យង់ គឹម​អេង ប្រធាន​មជ្ឈ​មណ្ឌល​ប្រជាពលរដ្ឋ​ ដើម្បី​អភិវឌ្ឍន៍​ និង​សន្តិភាព។ នៅ​ថ្ងៃ​នេះ​ក្រសួង​មហា​ផ្ទៃ បាន​បើក​កិច្ច​ប្រជុំ​ពិភាក្សា និង​ពិគ្រោះ​យោបល់​លើសំ​ណើ និង​អនុសាសន៍​របស់​អង្គការ​សង្គម​ស៊ីវិល ពាក់ព័ន្ធ​នឹង​ការ​ធ្វើ​វិសោធនកម្ម​ស្តីពី​សមាគម និង​អង្គការ​មិន​មែន​រដ្ឋាភិបាល​។ លោក យង់ គឹមអេង ដែល​បាន​ចូល​រួម​ក្នុង​កិច្ច​ប្រជុំ​នោះ​បាន​អះអាង​ថា ការ​ពិភាក្សា​ច្បាប់​នេះ​មាន​ការ​សម្រប​សម្រួល​ទន់ភ្លន់​ពី​ក្រសួង​មហា​ផ្ទៃ ក្នុង​ការ​ស្តាប់​យោបល់ និង​ការ​ទទួល​​ធាតុ​ចូលពី​អង្គការ​សង្គម​ស៊ីវិល​។ ប៉ុន្តែ​លោក យង់ គឹមអេង មិន​ទាន់​សន្និដ្ឋាន​ថា​ការ​ធ្វើ​វិសោធនកម្ម​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល​នា​ពេល​នេះ នឹង​ស្រប​តាម​ការ​ចង់បាន​របស់​អង្គការ​សង្គម​ស៊ីវិល​ឬ​យ៉ាង​ណា​ទេ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​RFI​នៅ​រាត្រី​នេះ ​គឺ​លោក​ ព្រាប កុល ជា​អ្នក​តាម​ដាន​ស្ថាន​ការណ៍​នយោបាយ​នៅកម្ពុជា​។​ ស្ថាន​ការណ៍​នយោបាយ​ដែល​លោក ព្រាប កុល មាន​ការ​ព្រួយ​បារម្ភ​ ហើយ​ស្នើ​ឲ្យ​ភាគី លោក សម រង្ស៊ី និង​ភាគី​រដ្ឋាភិបាល​ដក​ថយ​មួយ​ជំហាន​ម្នាក់​។ ​បើ​តាម​ លោក ព្រាប កុល ​ដំណោះ​ស្រាយ​ដែល​សម​ស្រប​បំផុត​នៅ​ក្នុង​កាលៈទេសៈ​គឺ​មាន​តែ​ការ​ចរចា​ប៉ុណ្ណោះ ​ដើម្បី​បញ្ជៀស​ហិង្សាកើត​ឡើង​។ តើ​ការ​ចរចា ត្រូវ​ធ្វើ​ឡើង​យ៉ាង​ដូចម្តេច?

ក្រសួង​ការ​ងារ តាម​រយៈ​ទីភ្នាក់​ងារ​ជាតិ និង​មុខ​របរ នឹង​រៀប​ចំ​ពិព័រណ៌​ការងារ​ធំ​មួយ​ប្រចាំ​ឆ្នាំ​២០១៩ នៅ​ថ្ងៃទី២ និងទី៣ ខែ​វិច្ឆិកា​នេះ ដោយ​មាន​ក្រុម​ហ៊ុន សហ​គ្រាស​ឯក​ជន​ធំៗ​ចំនួន​១៥០ ចូល​រួម នៅ​ក្នុង​ព្រឹត្តិការណ៍​នេះ​។ លោក ហៃ ហ៊ុនឡេង នាយក​ទីភ្នាក់ងារ​ជាតិ​មុខ​របរ​ និង​ការ​ងារ នៃ​ក្រសួង​ការ​ងារ និង​បណ្តុះ​បណ្តាល​វិជ្ជា​ជីវៈ ថ្លែង​ថា ពិព័រណ៌​ការងារ​នេះ នឹង​ផ្តល់​ឱកាស​ការងារ​គ្រប់​ប្រភេទ​ដល់​យុវ​ជន​ខ្មែរ ប្រមាណ​២ម៉ឺន​មុខ​តំណែង និង​តម្រូវ​ឲ្យ​អ្នក​ស្វែង​រក​ការងារ​ធ្វើ កាន់​តែ​មាន​សមត្ថ​ភាព និង​បទ​ពិសោធន៍ ប្រកប​ដោយ​ការ​ប្រកួត​ប្រជែង​។

កង​កម្លាំង​ចំរុះ​ខេត្ត​បន្ទាយ​មាន​ជ័យ​នឹង​បើក​ការ​ហ្វឹក​ហាត់​រួមគ្នា​ នៅ​ថ្ងៃទី​០១ ​ខែ​វិច្ឆិកា​នេះ ​ដើម្បី​បង្កើន​ការ​ថែរក្សា​សន្តិសុខ​ សណ្តាប់​ធ្នាប់​សាធារណៈ ​និង​សុវត្ថិភា​ព​នៅ​ក្នុង​ខេត្ត​។ យ៉ា​ង​ណាក្តី ​ការ​ប្រមូល​ផ្តុំ​កង​កម្លាំង​ក្នុង​ខេត្ត​បន្ទាយមាន​ជ័យ​នេះ ​ត្រូវ​បាន​គេ​មើល​ឃើញ​ថា ​គឺ​ជាកា​រ​ប្រមូល​ផ្តុំ​កម្លាំង​ ដើម្បី​ត្រៀម​វិធាន​ការ​ទប់​ទល់​នឹង​មាតុ​ភូមិនិវត្តន៍​របស់​លោក​ សម រង្ស៊ី ​តាម​ច្រក​ព្រំដែន​អន្តរជាតិ​ប៉ោយ​ប៉ែត​ ខេត្ត​បន្ទាយ​មាន​ជ័យ​។​ ទន្ទឹម​គ្នា​នេះ ​លោក​ ឈុំ សុ​ជាតិ ​អ្នក​នាំ​ពាក្យ​ក្រសួង​ការពារ​ជាតិ​កម្ពុជា​ បាន​អះអាង​ថា ​កងទ័ព​ដាច់​ខាត​មិន​អនុញ្ញាត​ឲ្យ​លោក ​សម ​រង្ស៊ី ​បង្ក​អសន្តិសុខ​នៅ​តាម​ព្រំដែន​បាន​ឡើយ​។

សាលា​ដំបូង​រាជ​ធានី​ភ្នំពេញ បាន​បើក​សវនា​ការ​ជុំវិញ​បណ្តឹង​របស់​រោង​ចក្រ​កាត់​ដេរ និង​បោក​គក់ SL កាល​ពី​៦ឆ្នាំ​មុន ប្តឹង​ចោទ​ប្រកាន់​មេដឹក​នាំ​សហ​ជីព លោក អាត់ ធន់ ពី​បទ​ញុះញង់​ឲ្យ​ប្រព្រឹត្ត​បទ​ល្មើស​ជា​អាទិ៍​។ លោក អាត់ ធន់ ប្រធាន​សហ​ភាព​ការងារ​កម្ពុជា មិន​មាន​វត្ត​មាន​ទេ ដោយ​លោក​ជាប់​បេសកកម្ម​នៅ​ក្រៅ​ប្រទេស ក៏​ប៉ុន្តែ​មេធាវី​របស់​លោក បាន​ចូល​រួម​សវនាការ​ព្រឹក​មិញ​នេះ​។ ជុំវិញ​សវនាការ​ជា​ថ្មី​ទៅ​លើ​មេដឹក​នាំ​សហជីព​ដូច្នេះ លោក អាត់ ធន់ បាន​សម្តែង​នូវ​ការ​ភ្ញាក់​ផ្អើល ខណៈ​ពេល​នេះ ប្រទេស​កម្ពុជា​កំពុង​ប្រឈម​នូវ​ភាព​មិន​ច្បាស់​លាស់​នៃ​ការ​ព្យួរ​ភាព​អនុគ្រោះ​ពន្ធ​របស់​សហ​ភាព​អឺរ៉ុប EBA សម្រាប់​កម្ពុជា​។

ភ្ញៀវ​ប្រចំាថ្ងៃ​របស់​វិទ្យុ​បារំាងអន្តរជាតិ​នៅ​ថ្ងៃ​អង្គារ ទី២៩ តុលា​នេះ គឺ​លោក​សម រង្ស៊ី អតីត​ប្រធាន​គណបក្ស​សង្រ្គោះជាតិ និង​ជា​ប្រធាន​ចលនា​សង្រ្គោះជាតិ។ ឆ្លើយ​នឹង​សំណួរ​របស់​គួច គន្ធារ៉ា លោក​សម រង្ស៊ី​បាន​បញ្ជាក់​ជា​ថ្មី​ពី​មាតុភូមិនិវត្តន៍​ចូល​កម្ពុជា​នៅ​ថ្ងៃទី៩ វិច្ឆិកា​ខាង​មុខ។ តែ​កម្មវិធី​លំអិត​ទាក់ទង​នឹង​មាតុភូមិនិវត្តន៍​នេះ​ត្រូវ​បាន​លោក​សម រង្ស៊ី​អះអាង​ថា លោក​នឹង​ប្រាប់​នៅ​ថ្ងៃទី៦ វិច្ឆិកា។

ភ្ញៀវប្រចាំថ្ងៃ​របស់​វិទ្យុបារាំង​អន្តរ​ជាតិ​នារា​ត្រី​នេះ គឺ​លោក​បណ្ឌិត​ ឆេង​ គីមឡុង នាយក​នៃ​មជ្ឈ​មណ្ឌល​នវានុវត្តន៍​ផ្នែក​អភិបាល​កិច្ច​ និង​ប្រជាធិបតេយ្យ​របស់​វិទ្យា​ស្ថាន​ចក្ខុ​វិស័យ​អាស៊ី។ កាល​ពី​ថ្ងៃទី២៥ ខែ​តុលា កន្លង ADBបាន​ត្រៀម​ថវិកា១.៤៥ពាន់​លាន​ដុល្លារ សម្រាប់​ជួយ​ដល់​កម្ពុជា ក្នុង​ទម្រង់​ជា​ឥណទាន​សម្បទាន ហិរញ្ញប្ប​ទាន​ឥត​សំណង និង​ជំនួយ​បច្ចេក​ទេស​។ ប្រាក់​ទាំង​នោះ​ក៏​មាន​គោលដៅ​លើក​កម្ពស់​បរិយាកាស​ធុរកិច្ចផង​ដែរ​។ ឆ្លើយ​នឹង​សំនួរ​របស់​វិទ្យុបារាំង​អន្តរជាតិ លោក​បណ្ឌិត ឆេង គីមឡុង លើក​ឡើង​ថា បរិយាកាស​ធុរកិច្ច​នៅ​មាន​ចំណុច​ច្រើន​គួរ​តែ​កែ​លម្អ ប៉ុន្តែ​បើ​ប្រៀបធៀប​នឹង​១០​ឆ្នាំ​មុន គឺ​មាន​ភាព​អំណោយ​ផល​ច្រើន​ជាង​។ លោក​បណ្ឌិត ក៏​យល់​ឃើញ​ដែរ​ថា​ស្ថាន​ភាព​នយោបាយ​បច្ចុប្បន្ន​នេះ ក៏​មាន​ប៉ះពាល់​ខ្លះ ​ដល់​បរិយាកាសធុរកិច្ច​កម្ពុជា​ដែរ​។

ភ្ញៀវ​ប្រចាំ​របស់​វិទ្យុ​បារាំង​អន្តរជាតិ​RFIនៅរាត្រី​នេះ គឺ​លោក នួន ប៊ុនថុល អភិបាល​ក្រុង​កោះរ៉ុង នៃខេត្ត​ព្រះ​សីហនុ​។ សមត្ថ​កិច្ច​ខេត្ត​ជាប់​សមុទ្រ​មួយ​នេះ​ដែល​បាន​បើក​ប្រតិបត្តិការ​ទ្រង់​ទ្រាយធំ​មួយ តាម​ស្វែង​រក​នារី​ជន​ជាតិ​អង់​គ្លេស​វ័យ​ជាង​២០​ឆ្នាំ​ដែល​បាត់​ខ្លួន​នៅកោះ​រ៉ុង​សន្លឹម​ កាល​ពី​៣​ថ្ងៃមុន​។​ ​ក្រោយ​បាត់​ខ្លួន សមត្ថកិច្ច​មូលដ្ឋាន​បាន​រក​ឃើញ​កាបូប​ដៃ ​និង​សម្ភារៈ​មួយ​ចំនួន​របស់​នាង​នៅ​លើ​ផ្ទាំង​ថ្ម​ក្នុង​ទឹក​ជាប់​ឆ្នេរ ក្បែរ​កន្លែង​ជប់​លៀង​មួយ​ដែល​នាង​បាន​ចូល​រួម​រហូត​ដល់​ម៉ោង​ជាង​៣​ទៀប​ភ្លឺ​។​ បើ​តាម​ លោក នួន ប៊ុនថុល សមត្ថកិច្ច​ពិបាក​នឹង​សន្និដ្ឋាន​ពី​សុវត្ថិភាព​របស់​នារី​រូប​នេះ ​​ព្រោះ​នាង​ពិសារ​គ្រឿង​ស្រវឹង​ច្រើន មុន​ពេល​បាត់​ខ្លួន​។

ទិវា​សត្វ​ផ្សោត​ទន្លេ​មេគង្គ ឆ្នាំ​២០១៩ កំពុង​រៀប​ចំ​ធ្វើ​នៅ​ក្នុង​ខេត្ត​ក្រចេះ ពី​ថ្ងៃ​ទី ២៥ ដល់​ថ្ងៃ​ទី ២៧​ខែតុលា​នេះ​! ទិវា​សត្វ​ផ្សោត​ទន្លេ​មេគង្គ​លើក​ទី​ ៦ ឆ្នាំ ២០១៩​នេះ ធ្វើ​ឡើង​ក៏​ដើម្បី​ជា​ការ​អបអរ​ដល់​ភាពជោគជ័យ​ក្នុង​ការ​អភិរក្ស​សត្វ​ផ្សោត​ទន្លេ​មេគង្គ​ផង​ដែរ​។ យ៉ាង​ណា​មិញ លោក សេង ទៀក ប្រធាន​អង្គការ​មូល​និធិ​សកល​សម្រាប់​អភិរក្ស​ធនធាន​ធម្មជាតិ ហៅ​កាត់​ថា WWF ក៏​បាន​សម្តែង​ការ​ព្រួយ​បារម្ភ​ផងដែរ ពាក់​ព័ន្ធ​នឹង​ការ​ស្រក​ចុះ​នៃ​ទឹក​ទន្លេ​មេគង្គ ថា​អាច​ប៉ះ​ពាល់​ដល់​ការ​អភិរក្ស​សត្វ​ផ្សោត​ដែល​កំពុង​មាន​ការ​កើន​ឡើង​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ។ តាម​លោក​សេង ទៀក ដើម្បី​ការ​ពារ​សត្វ​ផ្សោត​ប្រឈម​នឹង​ការ​ស្រក​ចុះ​នៃ​ទឹក​ទន្លេ​មេគង្គ គឺ​ទាល់​តែ​មាន​ការ​ពង្រឹង​ការ​អនុវត្ត​ច្បាប់​ឲ្យ​បាន​តឹង​រ៉ឹង​។

មិនដល់​មួយ​សប្តាហ៍​ផង ​សមត្ថកិច្ច​កម្ពុជា​ចាប់​បាន​គ្រឿងញៀន ​សរុប​ចំនួន​១២០​គីឡូក្រាម ​នៅ​ក្នុង​ភូមិសាស្ត្រ​ខេត្ត​កំពង់ធំ ​និង​នៅ​ព្រលាន​យន្តហោះ​ខេត្ត​សៀមរាប ​ដោយ​ចាប់​ខ្លួន​ជនសង្ស័យ​ទាំង​ពីរ​ករណី​ចំនួន​៦​នាក់ ​ក្នុងនោះ​មាន​ស្ត្រី​២​នាក់ ​និង​បុរស​ម្នាក់​ជា​ជន​ជាតិ​ថៃ​។ ​នាយឧត្តមសេនីយ៍ ​មាស វីរិទ្ធ ​អគ្គលេខាធិការ ​នៃ​អាជ្ញាធរ​ជាតិ​ប្រយុទ្ធប្រឆាំង​គ្រឿងញៀន ​ថ្លែង​ឲ្យដឹង​ថា ​ការ​ជួញដូរ​គ្រឿងញៀន​ដោយ​រូបភាព​ធំដុំ​បែប​នេះ ​ជា​សញ្ញា​មួយ ​ដែល​ក្រុម​ឧក្រិដ្ឋជន​ព្យាយាម​ចរាចរ​គ្រឿងញៀន​ចេញពី​តំបន់​ត្រីកោណមាស ​ឆ្ពោះទៅ​កាន់​ទីផ្សារ​ប្រើប្រាស់​ ដោយ​ឆ្លងកាត់​កម្ពុជា ​និង​មាន​អង្គការ​ចាត់តាំង​ច្បាស់លាស់​។