ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ RFI នៅ​រាត្រី​នេះ គឺ​លោក​ស្រី មូរ សុខហួរ អនុ​ប្រធាន​អតីត​គណបក្ស​សង្គ្រោះ​ជាតិ​។ លោក​ស្រី មូរ សុខហួរ ដែល​ពេល​នេះ​បាន​ធ្វើ​ដំណើរ​ទៅ​ដល់​សហរដ្ឋ​អាមេរិក​ហើយ​នោះ បាន​អះអាង​ប្រាប់​វិទ្យុ​បារាំង​អន្តរ​ជាតិ RFIថា លោក​ស្រី​នឹង​វិល​ត្រលប់​មក​កាន់​ប្រទេស​នៅ​តំបន់​អាស៊ាន​វិញ នៅ​ក្រោយ​ថ្ងៃទី ២៦ ខែតុលា ខាង​មុខ​នេះ​។ ការ​អះ​អាង​នេះ គឺ​បន្ទាប់​ពី​លោក​ស្រី ត្រូវ​បាន​អាជ្ញាធរ​ថៃ​ហាម​ឃាត់​មិន​ឲ្យ​ចូល​ទឹកដី​ថៃ​កាល​ពី​ថ្ងៃ​អាទិត្យ ហើយ​ត្រូវ​បាន​បង្ខំ​ឲ្យ​វិល​ត្រលប់​ទៅ​កាន់​ប្រទេស​ម៉ាឡេស៊ី​វិញ​។ បើ​តាម​លោក​ស្រី មូរ សុខហួរ ករណី​អាជ្ញាធរ​ថៃ​ហាម​ឃាត់​មិន​ឲ្យ​ចូល​ទឹក​ដី​ថៃ នឹង​ត្រូវ​លើក​ឡើង​ដោយ​សមាជិក​សភា​ថៃ​នៅ​ក្នុង​កិច្ច​ប្រជុំ​ពេញ​អង្គ​នៅថ្ងៃទី ២៥ តុលា​។

សម្ព័ន្ធ​អ្នក​សារព័ត៌មាន​កម្ពុជា ​ហៅ​កាត់​ថា ​(Cambo Ja) ​គឺ​ជា​សមាគម​សារព័ត៌មាន​ថ្មី​មួយ ​ដែល​ត្រូវ​បាន​បង្កើត​ឡើង ​និង​ទទួល​ស្គាល់​ដោយ​ក្រសួង​ព័ត៌មាន​កាលពី​ខែ​កញ្ញា​កន្លង​ទៅ​។ ​លោក​ ម៉ៃ ទិត្យថារ៉ា ​ស្ថាបនិក​នៃ​សម្ព័ន្ធ​អ្នក​សារព័ត៌មាន​កម្ពុជា ​បាន​លើក​ឡើង​ថា ​ការ​បង្កើត​សមាគម​ថ្មី​នេះ​ឡើង​ គឺ​ដើម្បី​ជួយ​គាំពារ​ និង​ជំនួយ​ផ្លូវ​ច្បាប់​ដល់​អ្នក​សារព័ត៌មាន ​ដែល​ជួប​ប្រទះ​នឹង​បញ្ហា ​ដោយសារ​តែ​ការ​បំពេញ​វិជ្ជាជីវៈ​របស់​ពួក​គេ​។ ​តាម​លោក ​ទិត្យថារ៉ា ​សម្ព័ន្ធ​ក៏​នឹង​មាន​ទិសដៅ​ផ្តល់​ការ​បណ្តុះបណ្តាល​ដល់​អ្នក​កាសែត​កម្ពុជា​ផង​ដែរ​។

កម្ពុជា​បាន​ត្រៀម​រួច​រាល់​អស់​ហើយ ក្នុង​ការ​បញ្ជូន​អត្ត​ពលិក​របស់​ខ្លួន​ជាង​៣០០​នាក់ ទៅ​កាន់​ប្រទេស​ហ្វីលីពីន នៅ​ចុង​ខែ​វិច្ឆិកា​ខាង​មុខ ដើម្បី​ចូល​រួម​ប្រកួត​កីឡា​ស៊ីហ្គេម​លើក​ទី៣០​។ លោក វ៉ាត់ ចំរើន អគ្គ​លេខា​ធិការ​គណៈ​កម្មាធិការ​ជាតិ​អូឡាំ​ពិក​កម្ពុជា លើក​ឡើង​ថា កម្ពុជា​នឹង​បញ្ចូន​ប្រភេទ​កីឡា​សក្តា​នុ​ពល​ជា​ច្រើន ក្នុង​ចំណោម​វិញ្ញាសារ​កីឡា​ទាំង​៣០​ប្រភេទ ដែល​កម្ពុជា​បាន​ចូល​រួម​នៅ​ឆ្នាំ​នេះ​។ លោកថា ស៊ី​ហ្គេម​លើក​ទី៣០​នេះ គឺ​ជា​ការ​ប្រកួត​ដ៏​យុទ្ធ​សាស្ត្រ ដែល​មាន​លទ្ធ​ផល​ជាទី​សង្ឃឹម ក្នុង​ដំណើរ​ឆ្ពោះ​ទៅ​កាន់​ស៊ី​ហ្គេម​ឆ្នាំ ២០២៣ ដែល​កម្ពុជា​ធ្វើ​ជា​ម្ចាស់​ផ្ទះ​។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ​នា​រាត្រី​នេះ គឺ​លោក​បណ្ឌិត ឈាង វណ្ណារិទ្ធិ នាយក​វិទ្យា​ស្ថាន​ចក្ខុ​វិស័យ​អាស៊ី​។ នា​រយៈ​ពេល​ចុង​ក្រោយ​នេះ ក្នុង​ជំនួប​ជាមួយ​មេ​ដឹក​នាំ​អាស៊ាន លោក​នាយក​រដ្ឋ​មន្ត្រី​កម្ពុជា តែង​បាន​លើក​ឡើង និង​បញ្ហា​ពី​ក្តី​សង្ឃឹម​ថា មេ​ដឹក​នាំ​អាស៊ាន គាំទ្រ​ប្រទេស​ទីម័រ​ខាង​កើត​ជា​សមាជិក​ថ្មី​របស់​អាស៊ាន​។ ឆ្លើយ​នឹង​សំនួរ​របស់​វិទ្យុ​បារាំង, លោក​បណ្ឌិត ឈាង វណ្ណារិទ្ធិ បាន​លើក​ឡើង​ពី​មូល​ហេតុ​ដែល​កម្ពុជា​ជួយ​ជ្រោម​ជ្រែង និង​គាំទ្រ​ទីម័រ​ខាង​កើត​ជា​សមាជិក​ថ្មី​របស់​អាស៊ាន​។ លោក​បណ្ឌិត ឈាង វណ្ណារិទ្ធិ​បាន​លើក​ឡើង​ថា កម្ពុជា​អាច​យល់​ច្រើន​ទាក់​ទង​នឹង​ភាព​លំបាក ដែល​ប្រទេស​ទីម័រ​ខាង​កើត​កំពុង​តែ​ជួប​ប្រទះ​ក្នុង​ការ​ដាក់​បេក្ខ​ភាព​របស់​ខ្លួន​ជា​សមាជិក​ពេញ​សិទ្ធិ​របស់​អាស៊ាន​។

ភ្ញៀវ​ប្រ​ចាំ​ថ្ងៃ​របស់​វិទ្យុ​បារាំង​អន្តរ​ជាតិ​RFI​នៅ​រាត្រី​នេះ គឺ លោក គឹម សន្តិភាព អ្នក​នាំ​ពាក្យ​ក្រ​សួង​យុត្តិ​ធម៌​។​ រដ្ឋ​មន្រ្តី​ក្រសួង​យុត្តិធម៌ នៅ​រសៀល​ថ្ងៃ​ចន្ទ​ស្អែក​នេះ ​នឹង​ដឹក​នាំ​កិច្ច​ប្រជុំ​គណៈ​កម្មការ​ជាតិ ​ដើម្បី​ពិនិត្យ​បញ្ជី​ស្នើ​សុំ​បន្ថូរ​បន្ថយ​ទោស និង​លើក​លែង​ទោស​ដល់​ទណ្ឌិត ​ក្នុង​ឱកាស​ពិធី​បុណ្យ​អុំទូក ខាង​មុខ​នេះ​។​ តាម​លោក គឹម សន្តិភាព គឺ​មាន​មាន​ទណ្ឌិត​សរុប ៥១២ នាក់ មាន​ឈ្មោះ​ក្នុង​បញ្ជី​ស្នើ​សុំ​បន្ធូរ​បន្ថយ​ទោស និង​លើក​លែង​ទោស​ពី​ពន្ធនាគារ​ចំនួន​២៣ និង​ពី​មណ្ឌល​អប់​រំ​កែប្រែ​ចំនួន​ ៤​។​ ប៉ុន្តែ​ក្នុង​នោះ​មិន​មាន​អ្នក​ទោស​នយោបាយ​ឡើយ​។​ ចំណែក អ្នក​ទោស​គ្រឿង​ញៀន និង​អ្នក​ទោស​ដែល​ប្រព្រឹត្តិបទ​ល្មើស​សាហាវ​ព្រៃផ្សៃ​ក៏​គ្មាន​កា​រលើក​លែង​ដែរ​។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ ​RFI ​នៅ​រាត្រី​នេះ ​គឺ​លោក ​សុវណ្ណ ​ភីឡុង ​នាយក​សមាគម​រូប​ថត​ភ្នំពេញ​។ ​ចាប់​ពី​ថ្ងៃទី ​២៤​ តុលា ​ដល់​ថ្ងៃទី ​២៤​ វិច្ឆិកា​ ខាង​មុខ​នេះ ​នឹង​មាន​ការ​ដាក់​តាំង​បង្ហាញ​រូប​ថត​សហសម័យ​ចំនួន​៣៦៥​សន្លឹក​នៅ​ក្នុង​ទីក្រុង​ភ្នំពេញ ​និង​ខេត្ត​សៀមរាប​ តាម​រយៈ ​មហោ​ស្រព​រូបថ​តភ្នំពេញ​។ ​រូបថត​សហ​សម័យ​ចំនួន​៣៦៥​សន្លឹក​នេះ ​គឺ​ជា​ស្នាដៃ​រូប​ថត​របស់​សិល្បករ​ និង​អ្នក​ថត​រូប​អាជីព​​ដល់​ទៅជា​ង​៤០​នាក់ ​មក​ពី​ប្រទេស​នានា​មក​ពី​តំបន់​អឺរ៉ុប ​និង​អាស៊ី ​ដោយ​ក្នុងនោះ​មាន​អ្នក​ថត​រូប​ជន​ជាតិ​ខ្មែរ​ចំនួន​១៣​នាក់​ផង​។ ​នៅ​ភ្នំពេញ​នឹង​មាន​ការ​តាំង​បង្ហាញ​ដល់​ទៅ​១១​ទីតាំង​ឯណោះ។​ ​បើ​តាម​លោក សុ​វណ្ណ ​ភីឡុង ​មហោស្រព​រូប​ថត​ភ្នំពេញ ​គឺ​ជា​សាលា​រៀន​សម្រាប់​អ្នក​ជំនាន់​ក្រោយ​។

សកម្មភាព​ធ្វើ​កឋិន​ទាន នៅ​ឆ្នាំ​នេះ ត្រូវ​បាន​កត់​សម្គាល់​ថា មាន​សភាព​ផុល​ផុស​ខ្លាំង​ជាង​ឆ្នាំ​កន្លង​ទៅ និង​មាន​ភាព​ទាន់​សម័យ​ជាង​ការ​ធ្វើ​បុណ្យ​កឋិន កាល​ពី​ប៉ុន្មាន​ទសវត្ស​មុន​។ លោក សេង សុមុនី អ្នក​នាំ​ពាក្យ​ក្រសួង​ធម៌ការ និងសាសនា បាន​លើក​ឡើង​ថា សេដ្ឋ​កិច្ច​គ្រួសារ និង​ប្រទេស​ជាតិ​មាន​លក្ខណៈ​ល្អ​ប្រសើរ ជា​ហេតុ​ធ្វើ​ឲ្យ​ប្រជាជន​ចាប់​អារម្មណ៍ និង​ធ្វើ​បុណ្យ​កឋិន​ច្រើន រួម​នឹង​ពលរដ្ឋ​មួយ​ចំនួន​មាន​ឱកាស​ទទួល​បាន​ផល​ប្រយោជន៍​ពី​វិស័យ​អចលន​ទ្រព្យ​ផង​ដែរ​។

វេទិកា​កសិករ​ថ្នាក់​ជាតិ​លើក​ទី​៨ ក្រោម​ប្រធានបទ «លើកកម្ពស់​ការចូលរួម​ដៃគូ​ពហុភាគី ដើម្បី​ឲ្យ​កសិករ​មាន​លទ្ធភាព​គ្រប់គ្រាន់​ក្នុងការ​វិនិយោគ​លើ​វិស័យ​កសិកម្ម» បាន​បិទ​បញ្ចប់​នៅ​ល្ងាច​ថ្ងៃ​ព្រហស្បតិ៍​នេះ។ លោកស្រី យ៉ាន់ ស្រីយ៉ាត តំណាង​កសិករ​ស្ត្រី​ឆ្នើម មក​ពី​ខេត្ត​បាត់​ដំបង បាន​គូស​បញ្ជាក់​ថា មាន​បញ្ហា​សំខាន់​ៗ៣​ដែល​កសិករ​បាន​លើក​ឡើង​ក្នុង​វេទិកា​រយៈ​ពេល​២ថ្ងៃ​នេះ គឺ​បញ្ហាទឹក ទុន(ដើមទុន) និង​ទីផ្សារ​។ បើ​តាម លោក​ស្រី យ៉ាន់ ស្រីយ៉ាត ដើម្បី​ឲ្យ​ស្រូវ ឬផលិផល​កសិកម្ម​លក់​បាន​ថ្លៃ គឺកសិករ​​ត្រូវ​ចង​ក្រងគ្នា​ជា​សហគមន៍​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ RFI នៅ​រាត្រី​នេះ គឺ​លោក​ឧកញ៉ា សុង សារ៉ន ប្រធាន​សហព័ន្ធ​ស្រូវ​អង្ករ​កម្ពុជា​។ ឆ្លើយ​តប​នឹង​ភាព​មិន​ច្បាស់​លាស់​នៃ​ការ​ដក​ប្រព័ន្ធ​អនុ​គ្រោះ​ពន្ធ EBA លោក សុង សារ៉ន ក្នុង​នាម​ជា​ប្រធាន​សហព័ន្ធ​ស្រូវ​អង្ករ​កម្ពុជា បាន​អះអាង​ថា កម្ពុជា​បាន​ត្រៀម​ផ្លូវ​ដើរ​ចំនួន​ពីរ​រួច​ហើយ​។ សូម​បញ្ជាក់​ថា តាម​របាយ​ការណ៍​នាំចេញ​អង្ករ​កម្ពុជាទៅ​កាន់​ទីផ្សារ​អន្តរជាតិ​ក្នុង​រយៈពេល ៩ខែ​ ឆ្នាំ​២០១៩ សម្រេច​បាន៣៩៨- ៥៨៦ តោន​កើនឡើង ២.៣ ភាគរយ​ បើ​ធៀប​នឹង​រយៈពេល​ដូចគ្នា​ឆ្នាំ​មុន​​។ ក្នុងនោះ​ការនាំ​ចេញ​ទៅ​ទីផ្សារ​ចិនមាន ១៥៧ ៧៩៣​តោន​ កើនឡើង​ជាង៤៤ភាគរយ និង​ទៅទីផ្សារ​អឺរ៉ុប​មាន​ចំនួន១៣៥ ៤៧១​ ​តោន​ ធ្លាក់​ចុះ​ជិត​៣០​ភាគរយ​។ យ៉ាង​ណា​ក្តី លោក​ឧកញ៉ា សុង សារ៉ន សង្ឃឹមថា នៅ​ចុង​ឆ្នាំ​២០១៩​នេះ ការ​នាំ​ចេញ​អង្ករ​កម្ពុជា​ទៅ​កាន់​ទីផ្សារ​អឺរ៉ុប​នឹង​កើន​ឡើង​វិញ​។ តើ​មាន​មូល​ហេតុ​អ្វីខ្លះ​?

នៅ​ថ្ងៃ​ទី ​១៥​ខែ​តុលា ​ឆ្នាំ​២០១៩​នេះ ​គឺ​ជា​ខួប​ទី​៧ ​នៃ​ការ​យាង​ចូល​ទិវង្គត​នៃ​ព្រះ​ករុណា ​ព្រះបាទ​សម្តេច​ព្រះ ​នរោត្តម ​សីហនុ ​ព្រះមហា​វីរក្សត្រ ​ព្រះ​បរមរតនកោដ្ឋ​។ ​ឆ្លៀត​ក្នុង​ឱកាស​នេះ ​ព្រះអង្គ​មា្ចស់ ​ស៊ីសុវត្ថិ ​ធម្មិកោ ​ដែល​ជា​អតីត​ព្រះ​រាជ​លេខា​ផ្ទាល់​របស់​ព្រះ​បរម​រតន​កោដ្ឋ នៅតែ​នឹក​ឃើញ​ពី​គុណ​បំណាច់​របស់​អង្គ​សម្តេច​ឳ​នៅក្នុង​តួនាទី​ព្រះ​អង្គ​ជា​អ្នក​សម្របសម្រួល​អ្នក​នយោបាយ​ខ្មែរ​។ ​ព្រះ​អង្គមា្ចស់​មាន​ព្រះ​បន្ទូល​បន្ថែម​ថា ​អ្នក​នយោបាយ​ខ្មែរ​មិន​បាន​យក​បណ្តាំ​ចុងក្រោយ​របស់​ព្រះ​ករុណា ​ព្រះ​មហាវីរក្សត្រ ​មកធ្វើ​ជា​មេរៀន​ទេ ​ក្នុងការ​រួបរួម​គ្នា​ដើម្បី​ការពារ​ប្រទេស​ជាតិ ​និង​បំរើ​ប្រជាពលរដ្ឋ​។